1 Na sãawa tɔnu wi u nɔni swãaru yɛ̃ te ta na Yinni Gusunɔn mɔrun sɔ̃. 2 U dera na da yam wɔ̃kuru sɔɔ, mi yam bururam sari. 3 Nɛ turowa u nɔma doke bururu ka yoka. 4 U dera na woora saa nɛn wirun di sere ka nɛn naasɔ. N sãare u nɛn kukunu kɔsuka, 5 u ka man nuku sankiranu ka nɔni swãaru bunana nge gbãraru. 6 U dera na da yam wɔ̃kuru sɔɔ nge gɔri be ba gu n tɛ. 7 U man gbãraru bunana n ku ka yari, ma u man bɔkua ka yɔni damgii. 8 Ma na nɔɔgiru sua na somiru kana. Adama u ǹ man swaa daki u sere nɛn kanaru mwa. 9 U nɛn swaa kɛnua ka kpee bakanu, u ye go. 10 U kukua u man mara nge gbeeku bɔ̃ɔ ge ga yaa mara. U man mara nge gbee sunɔ ge ga yaa yɔɔru bwɛ̃ɛyɛ. 11 U nɛn swɛɛ bɔɔra, ma u man mwa u gɛ̃ɛka. U man deri biti sɔɔ. 12 U win tɛndu bɛri ma u man kua nge yaa ye u koo to. 13 U nɛn yɛ̃sa yabura ka sɛ̃ɛnu. 14 Ma tɔmbu kpuro ba man yɛ̃ɛmɔ ba womusu dokemɔ tɔ̃ɔ baatere. 15 U dera na nɔni swãaru wa ma nuku sankirara man goomɔ nge tam. 16 U dera na kpenu tema ma nɛn donnu bɔɔkira. Ma u man torom wisi. 17 U dera na ǹ maa wãa bɔri yɛndu sɔɔ, na ǹ maa nuku dobu mɔ. 18 Ma na gerua na nɛɛ, na ǹ maa dam mɔ, na ǹ maa gãanu yĩiyɔ wi, Yinni Gusunɔn mi. 19 Nà n nɛn nɔni swãaru yaaya, n da n sãarewa nge dãa sosurarun nima na nɔra ka dɛ̃ɛ. 20 Nà n yeniba kpuro yaaya, na ra wururewa. 21 Adama wee ye ya man yĩiyɔbu wɛ̃ɛmɔ. Na kĩ n tii ye yaayasia n gere. 22 Yera, Yinni Gusunɔn durom kun kpa, win wɔnwɔnda kun maa nɔru kue. 23 Ta ra n wuramamɔwa bururu baatere. Win bɔrɔkiniru ta kpã. 24 Na nɛɛ, Yinni Gusunɔ u sãawa nɛgii. Yen sɔ̃na na yĩiyɔbu mɔ wi sɔɔ. 25 U ra wi u nùn naanɛ sãa kĩru sɔ̃ɔsi, kpa u wi u nùn kasu durom kua. 26 Ya wã tɔnu ù n Gusunɔn somiru mara ka tɛmanabu. 27 Ya wã tɔnu u Gusunɔn yoru wura win aluwaasiru sɔɔ. 28 Ù n laakari mɛɛribu gabu wa, u tii gawo sɛ̃ɛ u da u n wãa wi turo, domi Yinni Gusunɔwa u nùn bu kpɛ̃ɛ. 29 U n nùn wiru kpĩiyɛ win nuku sankiranu sɔɔ, kpa u n yĩiyɔ ma u koo nùn somi. 30 U wi u nùn baara soomɔ baaru tĩiyɔ u sɔmɛ, kpa u wura bu nùn wɔmɛ. 31 Domi Yinni Gusunɔ u ku ra tɔnu biru kisi ka baadommaɔ. 32 Baa ù n dera yɛ̃ro u nɔni swãaru wa, ka mɛ, u nùn kĩ too, domi win wɔnwɔnda kpã. 33 N ǹ win kĩru u ka tɔnu nɔni sɔ̃, kpa u nùn nuki sanku. 34 Yinni Gusunɔ u yɛ̃ sanam mɛ ba yobu nɔni sɔ̃ɔmɔ ba taakumɔ. U yɛ̃ sanam mɛ ba ǹ tɔmbu kuammɛ nge mɛ n weenɛ. U yɛ̃ sanam mɛ ba ǹ bu siriammɛ dee dee. 37 Goo kun kpɛ̃ u nɛɛ, gãanu nu kooro, Yinni Gusunɔ ù kun nin wooda wɛ̃. 38 Wi, Gusunɔ Wɔrukoo wiya u ra de gea ka kɔ̃sa yu na. 39 Ǹ n mɛn na, mban sɔ̃na tɔnu u ko n weeweenu mɔ̀. U de u weeweenu ko win durum sɔ̃. 40 Yen sɔ̃, i de su bɛsɛn daa mɛɛri kpa su ye wɛ̃ɛri su wa su ka gɔsirama Yinni Gusunɔn mi. 41 Gusunɔ u wãa wɔllɔ. I de su nɔma yiiya su nùn kana. 42 Su nɛɛ, Yinni, sa durum kua, sa nun seesi. A ǹ sun suuru kue. 43 A tii berua wunɛn mɔru bakan sɔ̃, ma a sun naa gira a go wɔnwɔndu sari. 44 A dua guru wiru sɔɔ a ku ka bɛsɛn kanaru nɔn sɔ̃. 45 A dera ba sun garisi nge kubanu bwesenun suunu sɔɔ. 46 Bɛsɛn yibɛrɛba kpuro ba sun nɔɔ kuurimɔ. 47 Ye ya sun tie, yera nandabu ka bɛrum, domi ba bɛsɛn yãnu gura, bɛsɛn tem mu kua bansu. 48 Wee na nɔni yĩresu kokumɔ yèn sɔ̃ nɛn tɔmba kam kua. 49 Nɛn nɔni yĩresu kokumɔ, su ǹ yɔ̃re, 50 na ka mara Yinni Gusunɔ u nɛn laakari kooma wɔllun di, 51 kpa u wa ma ye ya Yerusalɛmugibu deemamɔ, ya nɛn nuki sanka. 52 Be ba man tusa kam sɔɔ ba man naa gira nge gunɔ. 53 Ba kĩ bu nɛn wãaru kpeesia wɔru sɔɔ. Ba man kpenu kasuka. 54 Nim mu man mwɛɛmɔ, ma na nɛɛ, na kam kuawa. 55 Saa ye sɔɔ, na kanaru kua na nɛɛ, Yinni Gusunɔ, na nun soka saa wɔru ge sɔɔn di, 56 ma a nɛn nɔɔ nua. A ku wunɛn swaa kɔre. A nɛn wuri ka nɛn weeweenu nɔɔwɔ. 57 Dɔma te, a man susi, a man sɔ̃ɔwa a nɛɛ, n ku bɛrum ko. 58 Yinni a man siria ma a nɛn wãaru yakia. 59 A wa kɔ̃sa ye ba man kua, a man sirio. 60 A wa mɔru ye ba man kɔsiemɔ ka nɔɔ tia ye ba mɔ̀ bu ka man seesi. 61 Yinni Gusunɔ, a ben wɔma nua ye ba man koosimɔ. 62 A ben nɔɔ tia wa ye ba man koosi ba ka man gerusimɔ tɔ̃ɔ baatere. 63 Ye ba mɔ̀ kpuro sɔɔ gesi, nɛna ba ra n womu dokemɔ. 64 Yinni Gusunɔ, na yɛ̃ ma kaa bu kɔsie nge mɛ ben kookoosu nɛ. 65 Kaa ben gɔ̃run nɔni wɔ̃ke kpa a de wunɛn bɔ̃ri yi n sãa ben baa. 66 Kaa bu naa gira ka mɔru baka kpa a bu kpeerasia ba kun maa wãa tem mɛ sɔɔ.
