Swĩi 2

1Yinni Gusunɔn mɔru baka ya seewa. Ma ya Yerusalɛmu wukiri nge guru wii bakaru. Yen bɛɛrɛ ye ya raa girari sere guru winɔ, u ye kara u kɔ̃ temɔ. Win mɔru yen saa sɔɔ, u ǹ yaaye ma Yerusalɛmu ya sãa win naa sɔnditia. 2U Isireliban wãa yenu ka ben wusun gbãranu kpuro surura ka mɔru wɔnwɔndu sari. Ni wee nu wɔruka temɔ. U ben bandu ka ten wirugibun dam bua. 3U Isireliban dam kpuro bua win mɔru bakan sɔ̃. U tii bɔkua sanam mɛ yibɛrɛba ba bu wɔrim na. Ma u Isireli be dɔ̃ɔ kare, ma dɔ̃ɔ wi, u bu di beri berika. 4U bu win tɛndu gawe ka win nɔm geu. Ma u bu yĩisi nge yibɛrɛ, u kpuro go ye ya gea sãa ben nɔni sɔɔ. U dera win mɔru yabura nge dɔ̃ɔ ben wãa yenɔ Yerusalɛmuɔ. 5Yinni Gusunɔ u Isireliba wɔri nge yibɛrɛ. U bu mwa nge dɔ̃ɔ u ben dii geenu di. U ben gbãranu kɔsuka, ma u dera wuri yi nɔɔramɔ baama ben suunu sɔɔ. 6U win sãa yeru kɔsuka. U dera ba ku ra maa sãarun tɔ̃ɔ bakanu ka tɔ̃ɔ wɛ̃rarugiru di. Win mɔru seewa ka dam. Ma u sina boko ka yãku kowobu yina. 7U win sãa yeru mi ba ra nùn yãkuru kue biru kisi. U yibɛrɛba Yerusalɛmun dii geenu nɔmu bɛria. Ma wɔkinu nɔɔra win sãa yeru mi, nge tɔ̃ɔ bakanun saa. 8Yinni Gusunɔ u gɔ̃ru doke u Yerusalɛmun gbãranu kɔsuku. Wee u nu kɔsuka kpuro mam mam. Ya kua wɔnwɔndu baama kpuro. Gbãranu yiru ye kpuro ya kua bansu. 9Yen kɔnnɔsu su numa temɔ. Sin dãa ye ba ra ka su sɛ̃suku ya bɔɔkira. Ma ba yen sina boko ka yen wirugibu gura ba ka da tem tukumɔ. Wooda maa sari. Baa Gusunɔn sɔmɔbu ba ǹ maa kãsinu waamɔ win min di. 10Wee, yen guro gurobu ba sɔ̃ temɔ ba nɔsu maari. Ba tii torom wisi winɔ, ba saaki deewa nuku sankiranun sɔ̃. Ma yen wɔndiaba ba sɔ̃ ba tuke. 11Nɛn nɔni yandamɔ wurin sɔ̃. Nɛn wasi gbisimɔ ma nɛn torora kare. Domi nɛn tɔmba kam kua. Wee, bii wɛ̃ɛnu ka bibu ba wãa Yerusalɛmun swɛɛ sɔɔ, ba ǹ maa dam mɔ. 12Ba ben mɛrobu sɔ̃ɔmɔ ba mɔ̀, mana sa ko dĩanu wa. Ma ba wɔrukumɔ swɛɛ sɔɔ nge be ba mɛɛra kua. Gaba gbisukumɔ ben mɛron tororu wɔllɔ. 13Yerusalɛmu, mba kon nun sɔ̃. Mba kon ka nun weesina. Wara u maa nɔni sɔ̃ɔre nge wunɛ, n ka kpĩ n nun nukuru yɛmiasia. Domi wunɛn nɔni swãara kpã nge nim wɔ̃kun nim. Goo sari wi u koo kpĩ u tu kpeesia. 14Wunɛn sɔmɔbu ba nun gari weesugii sɔ̃ɔwa. Ba ǹ nun wunɛn toranu sɔ̃ɔsi bu ka nun gbara yorun di. Gari weesugiiya ba nun sɔ̃ɔwa yi yi nun nɔni wɔ̃kua. 15Wee, tɛ̃ wi u sarɔ u ra nun taka koosiwa u yɛ̃ɛ, kpa u wia ko u nɛɛ, wuu geniwa ba ra raa soku wuu burɔ, gèn sɔ̃ handunian tɔmbu kpuro ba ra n nuku dobu mɔ̀? 16Kpa yibɛrɛba ba n nɔɔ tɛndu bɛri ba n nun yɛ̃ɛmɔ ba n mɔ̀, sa nun mwɛ nge dĩa dɔka. Wee, tɔ̃ɔ te sa mara ta tunuma, sa tu wa. 17Yinni Gusunɔ u kua ye u gɔ̃ru doke. U yibia ye u gerua saa yellun di u nɛɛ, u koo ko. Wee u wunɛ Yerusalɛmu kam kua. U ǹ wunɛn wɔnwɔndu wa. U dera yibɛrɛban nukura dora wunɛn sɔ̃, domi u bu dam kã. 18Yerusalɛmu, a Yinni Gusunɔ nɔɔgiru sueyo, a de u wunɛn wuri nɔ. A nɔni yĩresu kokuo nge daaru. A ku wɛ̃ra, a ku wuri mari. 19A seewo a wuri ko wɔ̃kuru, a wunɛn gɔ̃ru kpuro kusia Yinni Gusunɔn wuswaaɔ. A nɔma yiiyo a nùn kana wunɛn bibun sɔ̃ be ba gbimɔ swɛɛ sɔɔ gɔ̃ɔrun sɔ̃. 20Yinni Gusunɔ, a mɛɛrio a wa. Wara a kuare nge mɛ. Mban sɔ̃na a dera tɔn kurɔba ben bibu tema be ba kĩ mi. Mban sɔ̃na a dera yibɛrɛba ba maa wunɛn sɔmɔbu ka yãku kowobu go wunɛn sãa yerɔ. 21Wee bukurobu ka bibun gonu nu kpĩ swɛɛ sɔɔ. Ba nɛn wɔndiaba ka aluwaasiba go tabu sɔɔ. A dera ba bu sakira wɔnwɔndu sari, wunɛn mɔrun saa. 22A nɛn yibɛrɛ be na nasie sokusia baaman di ba mɛnna nge tɔ̃ɔ bakarun saa. Yen dɔma te, goo kun kisire. Goo kun maa seewe bii be na kĩ na seeya sɔɔ. A dera nɛn yibɛrɛ u bu go kpuro.

will be added

X\