Swĩi 1

1Yerusalɛmu yè sɔɔ tɔmba raa dabi, wee ya wãa ye tɔna, ya kua nge gɔmini. Ya raa yĩsiru yara bwesenun suunu sɔɔ. Wee tɛ̃ ba ye yoru diisiamɔ. 2Ya wuri mɔ̀ wɔ̃ku giriru ma yen nɔni yĩresu kokumɔ. Be ba raa sãa yen kĩnasibu, ben goo sari wi u ye nukuru yɛmiasiamɔ. Be kpuro ba kuawa naanɛ sariba, ma ba kua yen yibɛrɛba. 3Ba Yudaba gura ba ka doona tem tukumɔ. Mɛya, ba bu dam dɔremɔ ba yoru diisiamɔ. Ba ku ra n wɛ̃rabu mɔ. Ben yibɛrɛba ba bu wɔri subaru sɔɔ ba deema ba wãa nɔni swãaru garu sɔɔ. 4Yerusalɛmu ya wãa nuku sankiranu sɔɔ, domi ba ku ra maa yen swɛɛ sĩ bu tɔ̃ɔ bakaru na. Goo kun maa wãa yen gbãra kɔnnɔwɔ. Yen yãku kowobu ba weeweenu mɔ̀. Yen wɔndiaban nuki sankira. Yen tii ya wãa nuku sankira bakaru sɔɔ. 5Yen yibɛrɛba ba ye tabu di, ma ba wãa bɔri yɛndu sɔɔ. Yinni Gusunɔwa u ye nuku sankira ni kpɛ̃ɛ yen tora dabinun sɔ̃. Wee yibɛrɛba ba yen bibu kpara ba ka da ba yoru diisiamɔ. 6Yerusalɛmun bɛɛrɛ ya kpa. Ma yen wirugibu ba ka gini weenɛ yi yi ǹ yakasu wa yi di. Yi ǹ maa dam mɔ ma yi duki mɔ̀ taason wuswaan di. 7Saa yeni sɔɔ, Yerusalɛmu ya wãa yãaru sɔɔ, yen tɔmba yaayaare mɔ̀. Yera ya yaaya gãa gee ni ya raa mɔ yellu. Sanam mɛ yen yibɛrɛba ba ye kamia, ya goo bia u na u ye somi, ma n yibɛrɛ be dore, ba ye yaakoru koosimɔ. 8Yerusalɛmu ya tora too. Yen sɔ̃na ba ye tusa. Be ba raa ye doke, bà n yen bansu wa ba ra ye gɛmwa. Wee, yen tii, ya weeweenu mɔ̀, ya wãa sekuru sɔɔ. 9Wee, yen durum yĩreru ta wãa yen yaberɔ. Adama ya ǹ daa yen kpeeru bwisika. Ya wɔruma subaru sɔɔ goo kun ye nukuru yɛmiasie. Ma ya nɔɔgiru sua ya nɛɛ, Yinni Gusunɔ, a nɛn nɔni swãaru mɛɛrio. A mɛɛrio nge mɛ yibɛrɛ u tii sue. 10Wee, ba nɛn gãa gee ni na mɔ gura. Wee, bwese tuku ni a yina nu n wãa ka wunɛn tɔmbu sannu, nu dua wunɛn sãa yerɔ. 11Wee, Yerusalɛmugibu kpuro ba wasire ba dĩanu kasu ni ba koo di. Ma ba ka ben gãa geenu dĩa ni kɔsina bu wa ba n ka wãa. Yerusalɛmu ya nɛɛ, Yinni Gusunɔ, a mɛɛrio nge mɛ na wɔnwɔndu soore. 12Bɛɛya na ka yã, bɛɛ be i sarɔ mini kpuro. I mɛɛrio nɔni swãaru garu tà n maa nɛgii teni kere, te Yinni Gusunɔ u man kpɛ̃ɛ win mɔrun saa sɔɔ. 13Saa wɔllun di n sãare u dɔ̃ɔ surema nɛn wasi sɔɔ, ma u man di. U nɛn naasu yina bɛria. Ma u man sura gbaru gbara u man kpɛ̃ɛ nuku sankiranu sɔɔ sere ka baadommaɔ. 14U nɛn toranu kpuro mɛnna nge wɛ̃ɛ yi ba tara. Ma u nu gbinisi nɛn wĩirɔ. U nɛn dam bua. Ma u man yibɛrɛ nɔmu bɛria mi na ǹ kpɛ̃ n ka tii yina. 15Yinni Gusunɔ u nɛn tabu kowobu surura. U tabu durɔbu mɛnna bu ka nɛn aluwaasiba kam koosia. U nɛ, Yerusalɛmu taaka nge mɛ ba ra resɛm taaku. 16Yen sɔ̃na na wura mɔ̀, na nɔni yĩresu kokumɔ. Wi u koo man nukuru yɛmiasia u man wãaru wesia, u man deri. Nɛn biba nuki sankire, domi yibɛrɛ u man kamia. 17Na nɔma yiiya na kanaru kua. Adama goo kun nɛ u man nukuru yɛmiasia. Yinni Gusunɔ u dera be ba ka nɛn tɔmbu Isireliba sikerenɛ ba kua nɛn yibɛrɛba, ma ba man garisi disi. 18Yinni Gusunɔ u gem mɔ ye u ka kua mɛ. Domi na ǹ win gere mɛm nɔɔwɛ. Bɛɛ bwesenu kpuro, i swaa dakio i nɔ, kpa i nɛn nuku sankiranu wa. Nɛn wɔndiaba ka nɛn aluwaasiba ba yoru da tem tukumɔ. 19Na nɛn kĩnasibu somiru kana, adama ba man bɔrɔ kɔ̃ɔru kua. Nɛn yãku kowobu ka wuun guro gurobu ba gu nɛn swɛɛ sɔɔ sanam mɛ ba dĩanu kasu ni ba koo di ba n ka wãa. 20Yinni Gusunɔ, a nɛn nɔni swãaru mɛɛrio, nɛn bwɛ̃ra kun kpĩ. Na nuki sankire too, domi na ǹ nun mɛm nɔɔwɛ. Tɔɔwɔ tabu sun dimɔ. Ma wuun sɔɔwɔ gɔɔ wãa. 21Ba nɛn weeweenu nua. Adama goo kun man nukuru yɛmiasie. Yibɛrɛban nukura dora, yèn sɔ̃ a man kua mɛ. Ǹ n mɛn na, a de tɔ̃ɔ te, tu na te a gerua mi, kpa bu ko nge nɛ. 22A ben nuku kɔ̃suru mɛɛrio, kpa a bu kua nge mɛ a man kua nɛn durum kpãarun sɔ̃. A mɛɛrio nge mɛ na weeweenu mɔ̀, nɛn nuki sankire.

will be added

X\