1 Dɔma tera Debora ka Baraki Abinɔamun bii ba womu geni kua ba nɛɛ, 2 i Yinni Gusunɔ siaro domi Isireliban wirugibu ba gɔ̃ru doke bu tabu ko. Tɔmbu kpuro ba maa tii wɛ̃ bu ka bu swĩi. 3 I nɔɔwɔ bɛɛ sinambu, i swaa dakio bɛɛ tem yɛ̃robu. Na kon Gusunɔ, Isireliban Yinni tɔma ka womusu. 4 Yinni, sanam mɛ a sarama Seirin guurun di Edɔmun temɔ, tem mu yĩira, guru winu gɔsira nim, ma gura na. 5 Guu bakanu nu yĩira wunɛ Gusunɔ Isireliban Yinnin wuswaaɔ, wunɛ wi a tii sɔ̃ɔsi Siɔniɔ. 6 Sangaa, Anatin biin waati sɔɔ, ka maa Yaɛlin saa sɔɔ, goo ku ra sĩ swaa dosɔ. Be ba gam dɔɔ, swaa kisiya ba ra ka de. 7 Wirugii goo sari wi u dam mɔ Isireliba sɔɔ, sere nɛ Debora na ra ka seewa nge ben mɛro. 8 Sanam mɛ ba Gusunɔ deri ba bũnu sãamɔ, saa yera ba bu tabu wɔrima. Adama baa ben tɔmbu nɔrɔbun suba weeru (40.000) sɔɔ, goo sari wi u tɛrɛru ǹ kun mɛ yaasa mɔ. 9 Nɛn gɔ̃ru ga dora Isirelin wirugibun sɔ̃, ka be ba tii wɛ̃ bu ka tabu ko. I Yinni Gusunɔ takaru koowo. 10 Bɛɛ sinambu, bɛɛ be i kɛtɛku kpikinu sɔni, i gari yi kparo. Bɛɛ gobigibu, bɛɛ be i sɔ̃ beku buranu wɔllɔ, i yi geruo. Bɛɛ maa bwɛ̃ɛbwɛ̃ɛbu, bɛɛ be i ka naasu sĩimɔ, i yi wonwɔ. 11 I swaa dakio. Dɔkɔban bɔkuɔ tɔmba Yinni Gusunɔn nasaran womusu mɔ̀, ye u Isireliba wɛ̃. Yen biru Yinni Gusunɔn tɔmbu ba sarama ba da ba wãa ben wusɔ. 12 A seewo, Debora, a tabun womu ko, a n ka sun gbiiye. A seewo, Baraki, Abinɔamun bii, a ka wunɛn yobu wurama. 13 Isireliban sukum ba damgibu kamia. Yinni Gusunɔ u dera na nasara wa tabu durɔbun wɔllɔ. 14 Be ba Amalɛkiba kamia, ba na Efaraimuban tem di. Bɛnyamɛɛba ba maa bu swĩi. Wirugiba na Makirin bweserun di. Tabu sinamba maa na Sabuloniban min di. 15 Isakariban wirugibu ba ka Debora yɔ̃ra. Ma ben tɔmbu kpuro ba Baraki swĩi. Ba duki na wɔwa mi. Adama Rubɛniba ba ǹ nɔɔ tia kue. Ba sika kua taa bin daabu sɔɔ. 16 Mban sɔ̃na ba yãanu sinɛ. Ba kĩwa bu kparobun nɔɔ nɔ be ba nu sokumɔ? Mɛya Rubɛniba ba ǹ nɔɔ tia kue. Ba sika kua taa bin daabu sɔɔ. 17 Galadigibu ba sina Yuudɛnin guruɔ. Mba n kua Danuba ba ka ben goo nimkusu sinɛ. Asɛɛba ba maa sɔ̃ nim wɔ̃kun bera gia ka gen goorɔ, ba ǹ nɛ. 18 Adama Sabuloniba ka Nɛfitaliba ba tii doke kari sɔɔ tabu gberɔ. 19 Kananin sinamba na ba ka bu tabu kua Tanakiɔ daarun bɔkuɔ te ba mɔ̀ Mɛgido. Adama ba ǹ bu kamiɛ bu sere ben arumani gaa gura. Baa sii geesu ba ǹ wa ba sue. 20 Wɔllun diya kperi yi ka Sisera tabu kua. Yi wãawa yin swɛɛ sɔɔ saa ye yi ka nùn sannamɔ. 21 Kisionin daaru te ta wãa yellun di, ten nim mu seewa mu bu gura. Su se su tabu wɔri ka wɔrugɔru. 22 Siseran tabu kowobu ba duki doona. Ben dumin naasun wɔkinu nɔɔra. 23 Yinni Gusunɔn gɔrado u gerua u nɛɛ, i Mɛrosi bɔ̃rusio, i yen tɔmbu bɔ̃rusio. Domi ba ǹ nɛ ka wɔrugɔba sannu bu ka Yinni Gusunɔ somi. 24 Kaa domaru wa, Yaɛli, Hebɛɛ Kenin kurɔ. Kaa domaru wa, Yaɛli, n kere kurɔbu gabu be ba wãa kunɔ. 25 Sisera u nun nim bikia, ma a nùn bom wɛ̃. A ka nùn naa bom gum naawa gbɛ̃ɛ bɛɛrɛgiru sɔɔ. 26 A kurun sii dɛka sua ka nɔm dwaru. Ma a matalaka sua wunɛn nɔm geuɔ. A Sisera kpare a win baa saburosu yabura. 27 Sisera u dwiiya u kpuna wunɛn naasɔ. Mi u kpĩ mi, miya u gbiisi. 28 Siseran mɛro u mɛɛra fɛnɛntin di u nɔɔgiru sua u nɛɛ, amɔna win tabu kɛkɛ ya ǹ ka tunumɛ. Mba n kua win dumi yi ka tɛ mɛ. 29 Win bwãa bwisigiba nùn sɔ̃ɔwa ba nɛɛ, ba arumani gura ba bɔnu mɔ̀wa, kpa tabu kowo baawure u wɔndia turo ǹ kun mɛ yiru sua. Sisera u beku gobiginu suamɔ win tiin sɔ̃, ka yabe ni ba sɔma dokea. N deema mɛya win mɛro u maa tii sɔ̃ɔmɔ. 31 Yinni Gusunɔ, a de wunɛn yibɛrɛba kpuro bu gbi nge Sisera. Adama be ba nun kĩ, ba n ballimɔ nge sɔ̃ɔ wii wɔllun sɔ̃ɔ. Yen biruwa tem mɛ, mu bɔri yɛndu wa wɔ̃ɔ weeru.
