Kparobu 4

1Ehudun gɔɔn biru Isireliba ba kpam kua ye ya ǹ Yinni Gusunɔ dore. 2Ma u bu Kananin sunɔ Yabini nɔmu bɛria wi u bandu dii Hasoriɔ. Win tabu sunɔwa Sisera wi u wãa Harosɛti Goimuɔ. 3Yabini wi, tabu kɛkɛ sisugii nɛnɛ ka wunɔbuwa (900) u mɔ. Ma u Isireliba dam dɔre sere n ka kua wɔ̃ɔ yɛndu. Yera ba Yinni Gusunɔ nɔɔgiru sue ba faaba kana. 4N deema Gusunɔn sɔmɔ tɔn kurɔ wi ba mɔ̀ Debora, Lapidɔtun kurɔ, wiya u sãa Isireliban kparo saa ye sɔɔ. 5U ra n sɔ̃wa kpakpa bãa gaan nuurɔ ye ya wãa Rama ka Betɛlin baa sɔɔ, Efaraimun guunun bera gia. Ma ba ye yĩsiru kã Deboran kpakpa bãa. Miya Isireliba ba ra de u ka bu siribu kua. 6Sɔ̃ɔ teeru u Abinɔamun bii Baraki sokusia wi u wãa Kedɛsiɔ Nɛfitaliban temɔ. U nùn sɔ̃ɔwa u nɛɛ, Gusunɔ, bɛsɛ Isireliban Yinni, wiya u nun wooda yeni wɛ̃ u nɛɛ, a tɔmbu nɔrɔbun suba wɔkuru (10.000) gɔsio saa Nɛfitaliba ka Sabuloniban min di a ka bu da guu te ba mɔ̀ Taboriɔ. 7U koo Sisera, Yabinin tabu sunɔ ka win tabu kɛkɛba ka win tabu kowobu gawama wunɛn mi, Kisionin daarɔ, kpa u nun bu nɔmu bɛria. 8Ma Baraki u nùn wisa u nɛɛ, à n kaa ka man da, kon da. Adama à kun ka man dɔɔ, na ǹ dɔɔ. 9Ma Debora u nɛɛ, ya wã, kon ka nun da, adama a ǹ siarabu wasi sà n da sannu. Domi Yinni Gusunɔ u koo Sisera tɔn kurɔ goo nɔmu bɛria. Ma Debora u seewa u ka Baraki da sere Kedɛsiɔ. 10Baraki u Sabuloniba ka Nɛfitaliba sokusia Kedɛsiɔ. Ma ben tɔmbu nɔrɔbun suba wɔkuru (10.000) ba ka nùn yɔ̃ra ka Debora sannu. 11N deema Mɔwisin kurɔn sesu Hobabu, win bwesera ba mɔ̀ Keniba. Ben turo Hebɛɛ u ka Keni be ba tie karana. Ma u da u win kuru gira dãa bakaru garun nuurɔ Sanaimuɔ, Kedɛsin bɔkuɔ. 12Yen biruwa ba Sisera sɔ̃ɔwa ba nɛɛ, Baraki, Abinɔamun bii, u da guu te ba mɔ̀ Taboriɔ. 13Ma Sisera u win tabu kowobu kpuro sokusia u nɛɛ, bu na Harosɛti Goimun di ka win tabu kɛkɛ sisugii nɛnɛ ka wunɔbu (900) ye. Ma ba mɛnna Kisionin daarɔ. 14Ma Debora u Baraki sɔ̃ɔwa u nɛɛ, a seewo, domi gisɔra Yinni Gusunɔ u koo nun gbiiya u ka nun Sisera nɔmu bɛria. Yera Baraki u sarama guu ten min di ka win tɔmbu nɔrɔbun suba wɔku (10.000) te ta nùn swĩi. 15Ye ba Sisera ka win tabu kowobu ka win tabu kɛkɛba wɔri, Yinni Gusunɔ u dera Siseran tɔn be, ba burisina Barakin wuswaaɔ. Ma Sisera u sara win kɛkɛn di u duka sua ka naasu. 16Baraki u Siseran tabu kowobu ka win tabu kɛkɛba naa gira sere Harosɛti Goimuɔ. Ma ba bu go be kpuro ka takobi. Baa ben turo ba ǹ deri. 17Adama Sisera u duka sua u da u kukua Hebɛɛ Kenin kurɔ wi ba mɔ̀ Yaɛlin kuu bekurugirɔ, domi Hebɛɛ ka Yabini, Hasorin sunɔ ba nɔɔsinamɔ. 18Yaɛli u yara u Sisera dam koosia u nɛɛ, a duuma nɛn yinni, a ku bɛrum ko. Ma u dua kurɔ win mi, ma kurɔ wi, u bekuru sua u nùn wukiri. 19Yera Sisera u nɛɛ, a suuru koowo, a man nim kɛ̃ɛyɔ n nɔ. Nim nɔru ga man mɔ̀wa. Ma kurɔ wi, u bom bwãaru sua u nùn wɛ̃ u nɔra. Yera u kpam nùn bekuru wukiri. 20Sisera maa nɛɛ, a yɔ̃ro dii kɔnnɔwɔ. Goo ù n na u nun bikia, u nɛɛ, goo wãa mini? A nɛɛ, aawo. 21N deema Sisera u wasire too, ma u dweeya mam mam. Yera Yaɛli, Hebɛɛn kurɔ wi, u kurun sii dɛka sua ka matalaka u durɔ wi susi sɛ̃ɛ u sii dɛka ye kpare win baa saburon deedeeru. Ma ya girari temɔ. Ma durɔ wi, u gu. 22N wee, saa ye sɔɔ, Baraki u Sisera naa gire. Ye Yaɛli u yara u nùn sennɔ da u nɛɛ, a na, kon nun durɔ wi sɔ̃ɔsi wi a kasu. U dua kurɔ win kuru mi, u wa wee, Sisera u kpĩ u guu, sii dɛka gire win baa saburoɔ. 23Dɔma te, Gusunɔ u dera Isireliba ba Yabini, Kananiban sunɔ kawa. 24Yen biru ba ra n ka nùn tabu mɔ̀wa sere ba ka nùn taare mam mam ba go.

will be added

X\