Kparobu 21

1N deema Isireliba ba raa nɔɔ mwɛɛru kua Misipaɔ ba nɛɛ, ba ǹ Bɛnyamɛɛ goo ben bii wɔndia goo wɛ̃ɛmɔ u sua kurɔ. 2Ma ba na ba sina Betɛliɔ Yinni Gusunɔn wuswaaɔ sere n ka kua yoka. Ba wuri kua ka dam 3ba nɛɛ, Gusunɔ, bɛsɛ Isireliban Yinni, mban sɔ̃na bɛsɛn bwese kɛra tia ya kpeera. 4Ma ba seewa buru buru yellu ba yãku yeru kua mi, ma ba yãku dɔ̃ɔ mwaararuginu ka siarabun yãkunu kua ten wɔllɔ. 5Yen biruwa ba nɛɛ, geema sa nɔɔ mwɛɛru kua ka bɔ̃ri sa nɛɛ, be ba kun de Misipaɔ Yinni Gusunɔn sãa yerɔ sa ko bu gowa. Ǹ n mɛn na, berà bɛsɛ Isireliba sɔɔ, ba ǹ ka sun mɛnnɛ mi. 6N deema Isireliba ba gɔ̃ru gɔsia ba nɛɛ, wee sa bɛsɛn bwese kɛri tia go. 7Tɛ̃ amɔna sa ko ko su ka Bɛnyamɛɛ be ba tie kurɔbu waawa. Domi sa bɔ̃rua kɔ Yinni Gusunɔn wuswaaɔ sa nɛɛ, sa ǹ maa bu bɛsɛn bii wɔndiaba wɛ̃ɛmɔ bu sua kurɔbu. 8Ma ba bikiana ba nɛɛ, bɛsɛ sɔɔ berà ba ǹ nɛ Yinni Gusunɔn wuswaaɔ Misipaɔ. Ma ba deema goo kun nɛ saa Yabɛsin di ye ya wãa Galadiɔ. 9Domi sanam mɛ ba tɔmbu gara ba deema Yabɛsigii goo kun wãa mi. 10Saa yera Isireli be sɔɔ, ba tabu kowobu nɔrɔbun suba wɔkura yiru (12.000) gɔsa ba bu wooda wɛ̃ ba nɛɛ, i doo i Yabɛsigibu go kpuro. 11I tɔn durɔbu kpuro goowo ka kurɔ be ba durɔ yɛ̃ kɔ. 12Ye ba tura mi, ba wɔndiaba wa tɔnu nɛɛru (400) be ba kun durɔ yɛ̃. Ma ba bu mwɛɛrima ba ka na ben sansaniɔ Siloɔ Kananin temɔ. 13Yen biruwa Isireliba ba Bɛnyamɛɛ be ba da ba kukua Rimɔɔn kpee wɔruɔ gɔria ba nɛɛ, bu yarima, tabu kpa, ba dora. 14Yera Bɛnyamɛɛ be, ba yarima. Ma ba bu wɔndia be wɛ̃ ba sua kurɔbu, be ba mwɛɛrima saa Yabɛsin di mi, Galadin temɔ. Adama kurɔ be, ba ǹ bu dabiru tura. 15Ma Isireliba ba Bɛnyamɛɛ ben wɔnwɔndu wa yèn sɔ̃ Yinni Gusunɔ u dera ben bwese kɛra kanda. 16Ma Isireliban guro gurobu ba nɛɛ, wee tɔn kurɔbu sari Bɛnyamɛɛn bweseru sɔɔ. Mana ben tɔn durɔ be ba tie ba koo kurɔbu wa. 17Domi n ǹ weenɛ ben bweseru tu kam ko, kpa bɛsɛ Isireliban bwese kɛri tia ye, yu gbi. 18Adama sa ǹ kpɛ̃ su bu bɛsɛn bii wɔndiaba wɛ̃ bu sua kurɔbu, domi sa nɔɔ mwɛɛru kua ka bɔ̃ri sa nɛɛ, Isireli wi u win bii wɔndia Bɛnyamɛɛ goo wɛ̃ u sua kurɔ, yen yɛ̃ro u kam ko. 19Adama ba bwisika ba nɛɛ, wee wɔ̃ɔ ka wɔ̃ɔn tɔ̃ɔ bakara turuku kua te sa ra Yinni Gusunɔ kue Siloɔ. Silo ye, ya wãawa swaaɔ ye ya dɔɔ saa Betɛlin di sere Sikɛmuɔ sɔ̃ɔ yari yerɔ, Betɛli ka Lebonan baa sɔɔ. 20Ma ba Bɛnyamɛɛba bwisi yini kã ba nɛɛ, i doo i kuke resɛm gbaanɔ. 21Kpa i n yɔɔru bwɛ̃ɛ i n Silon wɔndiaba mara, be ba koo yarima ba n yaamɔ. Ì n bu wa mɛ, kpa i yarima gbaa nin min di, i bu sɛ̃re i mwɛɛri i ka doona bɛɛn temɔ bu ko bɛɛn kurɔbu. 22Ben mɔwɔbu bà n na, ba sun weeweenu koosi, sa ko bu wisi su nɛɛ, sa ǹ kpĩa sa bɛɛ kpuro kurɔbu waawe Yabɛsin taa bi sɔɔ. Nge mɛ n ǹ ben tii ba bɛɛ bii wɔndia be wɛ̃, ba ǹ ben nɔɔ mwɛɛru kɔbie. 23Ma Bɛnyamɛɛ be, ba ka tɔn ben gari sɔmburu kua. Ba wɔndia be mwɛɛra sanam mɛ ba yaamɔ Siloɔ. Ben baawure u wɔndia wa u sɛ̃re u sua kurɔ. Ma ba ka da ben temɔ. Ba wure ba ben wusu bana, ba sina mi. 24Yen biruwa Isireli be ba tie ba yarina. Baawure u da u win bwese kɛra deema win temɔ. 25N deema saa ye sɔɔ, Isireliba ba ǹ kparo mɔ. Ben baawure u mɔ̀wa nge mɛ u kĩ.

will be added

X\