Kparobu 2

1Sɔ̃ɔ teeru Yinni Gusunɔn gɔrado u seewa Giligalin di u da Bokimuɔ. Ma Gusunɔ u Isireliba sɔ̃ɔwa saa gɔrado win nɔɔ sɔɔn di u nɛɛ, na bɛɛ yarama Egibitin di na ka bɛɛ na tem mɛ sɔɔ, mɛ na bɛɛn baababa nɔɔ mwɛɛru kua ka bɔ̃ri. Na nɛɛ, na ǹ nɛn arukawani kusiamɔ pai ye na ka bɛɛ bɔkua. 2Na maa bɛɛ sɔ̃ɔwa na nɛɛ, i ku ra ka tem mɛn tɔmbu arukawani bɔke. I ben bũu sãa yenu kɔsukuo. Adama i ǹ nɛn gere mɛm nɔɔwɛ. Mban sɔ̃na i kua mɛ. 3Yen sɔ̃na na bɛɛ sɔ̃ɔmɔ ma na ǹ bu giramɔ bɛɛn min di. Ba ko n wãawa bɛɛn bɔkuɔ, ba n sãa bɛɛn wɛrɔbu, kpa ben bũnu nu ko bɛɛn yina. 4Saa ye Yinni Gusunɔn gɔrado wi, u gari yi gerua u kpa, yera Isireliba kpuro ba nɔɔgiru sua ba swĩ. 5Yen sɔ̃na ba yam mi soka Bokimu. Miya ba Yinni Gusunɔ yãkunu kua. 6Sanam mɛ Yosue u wãa wãaru sɔɔ, u dera Isireli baawure u dawa u win tem mwa mɛ mu kua wigim. 7Tɔn be, ba Yinni Gusunɔ sãwa Yosuen waati kpuro sɔɔ ka maa guro guro be u derin waati sɔɔ, be ba sɔm maamaakiginu kpuro wa ni Yinni Gusunɔ u Isireliba kua. 8Yosue, Nunin bii, Yinni Gusunɔn sɔm kowo, u kuawa wɔ̃ɔ wunɔbu ka wɔkuru (110) ma u gu. 9Ba nùn sika win temɔ Tinnati Herɛsiɔ, Efaraimuban bera gia Gaasin guurun sɔ̃ɔ yɛ̃san nɔm geu gia. 10Saa yen tɔmbu kpuro ba gu, ma be ba seewa ben ayenɔ ba ǹ Yinni Gusunɔn bɛɛrɛ yɛ̃. Mɛya ba maa duari ye u raa ben baababa kua. 11Ye Isireliba ba kua, ya ǹ Yinni Gusunɔ dore. Domi ba nùn deri ba da ba bũnu sãamɔ ni ba ra soku Baaliba. 12- 13Ba Gusunɔ ben baababan yinni deri wi u bu yarama Egibitin di. Ma ba be ba bu sikerenɛn bũu ni ba mɔ̀ Baaliba ka Asitaateba sãamɔ ba nu wiru kpĩiyammɛ. Yera n dera Yinni Gusunɔn mɔru seewa. 14Ma u bu tɔn diobu nɔmu bɛria ba bu ye ba mɔ kpuro gurari. U maa bu ben yibɛrɛ be ba bu sikerenɛ dɔre. Ba ǹ maa kpĩa ba ka tii yinɛ. 15Baama mi ba tabu da, Yinni Gusunɔ u ra dewa bu kɔ̃sa wa nge mɛ u raa gerua ka bɔ̃ri. Ba nɔni swãaru wa ta kpã. 16Yen biruwa u bu kparobu seeya be ba koo bu faaba ko tɔn diobun nɔmun di. 17Ka mɛ, ba ku ra kparo ben gere wure. Ba ǹ ka Gusunɔ turo yɔ̃re. Bũna ba ra sã. Mii mii ba swaa ye deri ye ben baababa ba raa swĩi. Ba ǹ maa Yinni Gusunɔn wooda mɛm nɔɔwɛ. 18Yinni Gusunɔ ù n bu kparo wɛ̃, u ra n wãawa ka yɛ̃ro u ka bu wɔra ben yibɛrɛban nɔman di, kparo win waati kpuro sɔɔ. Domi u ra ben wɔnwɔndu wa sanam mɛ ba weeweenu mɔ̀, be ba bu tɔ̃ya mɔ̀ ba bu nɔni sɔ̃ɔmɔn sɔ̃. 19Adama kparo wi, ù n gu, ba ra maa kɔ̃sa kowa n kere ben baababa. Bũna ba ra kasu bu wiru kpĩiya bu sã. Ben gɔ̃ru ga ra bɔbiewa bu ka swaa kɔ̃sa ye swĩi ka degangam. 20Kpa Yinni Gusunɔ u ka bu mɔru ko gem gem u nɛɛ, tɔn be, ba nɛn wooda sanka ye na ben baababa wɛ̃. Ba ǹ maa nɛn gere mɛm nɔɔwɛ. 21Yen sɔ̃na na ǹ maa bu bweseru garu girammɛ bwese ni Yosue u deri sɔɔ sanam mɛ u gu. 22Bwese niya kon ka ben laakari mɛɛri, kpa n wa bà n koo lasabu ko, bu nɛn swaa swĩi, nge mɛ ben baababa ba kua. 23Ma Yinni Gusunɔ u bwese ni deri, u ǹ ka nin girabu sɛnde.

will be added

X\