Kparobu 17

1Durɔ goo u wãa Efaraimun guunun bera gia, win yĩsira Mika. 2Sɔ̃ɔ teeru u win mɛro sɔ̃ɔwa u nɛɛ, sii geesun gobi nɔrɔbu ka wunɔbu (1.100) yi a nɛɛ, ba gbɛna, sere a gbɛnɔ wi bɔ̃rusi nɛn nɔni biru, yi wee. Nɛna na yi sua. Ma win mɛro u nɛɛ, Gusunɔ u bɔ̃ri yi gɔsia domaru wunɛ sɔɔ, nɛn bii. 3Ma Mika u gobi yi suama u win mɛro wesia. Yera mɛro u nùn sɔ̃ɔwa u nɛɛ, wee, na sii gee si Yinni Gusunɔ wɛ̃ɛmɔ, bu bwãaroku koowo wunɛn sɔ̃ kpa bu su pote. Ǹ n mɛn na, a yande su nɛnuɔ. 4Adama u yina. Ma u su mɛro wesia. Yera win mɛro wi, u sin gobi goobu (200) sua u seko wɛ̃. Ma seko wi, u bwãaroku kua u gu sii gee si pote. Yen biru ba gu yi Mikan dirɔ. 5N deema Mika u raa sãa yeru mɔ win yɛnuɔ. Ma u dera ba nùn bwãaroku ganu kua. Ma u win tiin bii turo gɔsa u kua nin yãku kowo. 6Domi saa ye sɔɔ, Isireliba ba ǹ kparo mɔ, baawure u mɔ̀wa ye u kĩ. 7Saa ye sɔɔ, aluwaasi goo wãa Bɛtelehɛmuɔ Yudan temɔ. Durɔ wi, u sãawa Lefin bweseru. 8Ma u seewa Bɛtelehɛmun di u win wasangariru doona. Ye u tura Efaraimun guunɔ, ma u dua Mikan yɛnuɔ. 9Yera Mika u nùn bikia u nɛɛ, man diya a wee. Ma u wisa u nɛɛ, nɛ yãku kowon bwesera. Na weewa Bɛtelehɛmun di ye ya wãa Yudan temɔ. Na nɛn bɔsunu mɔ̀wa, na kasu mi kon sina. 10Ma Mika u nùn sɔ̃ɔwa u nɛɛ, ǹ n mɛn na, a sinɔ nɛn mini kpa a n sãa nɛn yɛnun yãku kowo, kpa na n da nun sii geesun gobi wɔkuru wɛ̃ wɔ̃ɔ baagere, ka sere maa yãa ni kaa n da doke, kpa na n nun nɔɔrimɔ. Ma durɔ wi, u wura. 11Nge mɛya u ka sina Mikan mi. Ma Mika u nùn mɛɛra nge win tiin bii. 12Ma u nùn kua win yãku kowo. 13Yera Mika u tii sɔ̃ɔwa u nɛɛ, na yɛ̃ ma Yinni Gusunɔ u koo man domaru kua tɛ̃ domi na yãku kowo mɔ wi u sãa Lefin bweseru.

will be added

X\