Kparobu 15

1Ye n kua sɔ̃ɔ mɛɛru, alikama gɛ̃ɛbun saa, Sansom u boo kpɛmu gagu sua u ka win kurɔ beram da. Ye u tura mi, yera u win dokiri sɔ̃ɔwa u nɛɛ, na kĩ n da nɛn kurɔn dirɔ. Adama dokiri wi, u yina. 2U nɛɛ, na tamaa a ǹ maa nùn kĩwa mam mam. Ma na nùn wunɛn bɔrɔ kã. Win wɔnɔ wee, a nùn suo kɔsire. U maa nùn buram kere. 3Sansom u nɛɛ, nà n Filisitiba kɔ̃sa kua tɛ̃, na ǹ ko na n taarɛ mɔ ye sɔɔ. 4Ma u doona u sɛ̃usu gooba wunɔbu (300) mwa u sin sinu bɔkua yiru yiru. Yera u wii bɔnnu sɔrisi nin sii nin suunu sɔɔ. 5Ma u wii bɔn ni dɔ̃ɔ doke u sɛ̃u si sure Filisitiban alikama gbaanɔ. Ye ba gã ba suba ka ye ba ǹ gɛ̃ɛbu kpa sere ka ben dãa gbaanɔ mi ba olifiba duura, kpuro ya dɔ̃ɔ mwaarawa. 6Ma Filisitiba ba nɛɛ, wara u sun yenin bweseru kua. Ma ben gaba nɛɛ, Sansom, Tinnagibun dokiriwa, yèn sɔ̃ ba win kurɔ wɔra ba goo kã. Ma ba da ba kurɔ wi ka win tundo mwa ba bu dɔ̃ɔ mɛni. 7Sansom u bu sɔ̃ɔwa u nɛɛ, yeniwa i mɔ̀? Ǹ n mɛn na, na ǹ derimɔ na kun mɔru kɔsie. 8Ma u bu wɔri ka dam u bu go ta saka sara. Ma u da u wãa Etamun kpee baa sɔɔ. 9Saa ye sɔɔra Filisitiba ba seewa ba da ba ben sansani gira Yudaban temɔ ba tɛrie sere Lekiɔ. 10Ye Yudaba ba bu wa ba nɛɛ, mba n kua i ka sun wɔrima mɛni. Ba nɛɛ, Sansomwa sa kasu su mwa su bɔke su nùn kua nge mɛ u sun kua. 11Yera Yudaban tɔnu nɔrɔbun suba ita (3.000) ba seewa ba da Etamun kpee baa mi, ba Sansom deema ba nɛɛ, a ǹ yɛ̃ ma Filisitibara ba sãa bɛsɛn yinnibu? Mban bwesera a sun kua mɛni. Sansom u bu wisa u nɛɛ, nge mɛ ben tii ba man kua, nge mɛya na maa bu kua. 12Ba nùn sɔ̃ɔwa ba nɛɛ, sa nawa su ka nun mwa su bɔke su nun Filisitiba nɔmu bɛria. Ma u nɛɛ, i bɔ̃ruo bɛɛn tii i kun man goomɔ. 13Ba nɛɛ, ya wã. Sa kĩ su nun bɔkewa su nun Filisitiba nɔmu bɛria. Sa ǹ nun goomɔ. Ma ba nùn bɔkua ka wɛ̃ɛ kpɛɛ yiru. Ba nùn yarama kpee baa yen min di. 14Ye u tura Lekiɔ, Filisitiba ba nùn sennɔ na ka wure bakanu. Saa yera Yinni Gusunɔn Hunde u nùn yɔɔwa. Ma u wɛ̃ɛ yi ba ka nùn bɔkua kasuka yi kua nge wɛ̃ɛ yi yi dɔ̃ɔ soora. Ma yi wɔruma win nɔman di. 15Yera u kɛtɛkun baa saburo beku gagu dɔba u ka tɔmbu nɔrɔbu (1.000) go. 16Ma u nɛɛ, ka kɛtɛkun baa saburowa na tɔmbu nɔrɔbu go. Na bu suba suba nge takanu. 17Ye u gari yi saara u kpa, ma u kɛtɛkun baa saburo ge kɔ̃. Ma ba yam mi yĩsiru kã Ramati Leki. Yĩsi ten tubusiana baa saburon gunguru. 18Yen biru nim nɔru ga Sansom kua gem gem. Yera u Yinni Gusunɔ somiru kana u nɛɛ, wuna a dera na nɛn tɔmbu faaba baka yeni kua. Tɛ̃ kaa de n gbiwa ka nim nɔru? Kpa n wɔri tɔn tuko be ba ǹ bango kuen nɔma sɔɔ? 19Yera Yinni Gusunɔ u dera nim mu yara kpee wɔru gagun min di Leki mi, ma ya kua nim nɔnu. Sansom u nɔra ma win hunde ya wurama, u dam kua. Yen sɔ̃na ba nim nɔnu ge soka Eni Hakore. Yen tubusiana, wi u somiru kanan nim nɔnu. Ga wãa mi sere ka gisɔn gisɔ. 20Sansom u kuawa Isireliban kparo wɔ̃ɔ yɛndu saa ye Filisitiba ba sãa ben yinnibu.

will be added

X\