Kparobu 14

1Sɔ̃ɔ teeru, Sansom u seewa u da Tinnaɔ. Ma u bii kurɔbu gagu wa mi, Filisitiban bii wɔndiaba sɔɔ, ga nùn wɛ̃re. 2Ye u wuma u win tundo ka win mɛro sɔ̃ɔwa u nɛɛ, na bii kurɔbu gagu wa Tinnaɔ Filisitiban bibu sɔɔ. I man nùn kasuo n sua kurɔ. 3Win tundo ka win mɛro ba nùn wisa ba nɛɛ, tɔn kurɔbu sariwa wunɛn mɛro bisibu sɔɔ, ǹ kun mɛ bɛsɛn bweseru sɔɔ, a ka da a kurɔ kasu Filisitiba sɔɔ be ba ku ra bango ko mi? Adama Sansom u win tundo sɔ̃ɔwa u nɛɛ, ka mɛ, a man nùn kasuo domi u man wɛ̃rewa. 4Win tundo ka win mɛro ba ǹ yɛ̃ ma gari yi, yi weewa saa Yinni Gusunɔn min di, domi swaa u kasu u ka Filisitiba sanna. N deema saa ye sɔɔ, Filisitibara ba sãa Isireliban yinnibu. 5Yera Sansom u seewa u dɔɔ Tinna mi ka win tundo ka win mɛro. Ye ba tura Tinnagibun dãa gbaarɔ, miya Sansom u gɛra ma gbee sunɔ kpɛmu gagu ga nùn kɛɛnu gurema subaru sɔɔ ga kukirimɔ. 6Saa yera Gusunɔn Hunde u nùn yɔɔwa ma u gbee sunɔ ge nɛnua u yakana ka win nɔma nge mɛ ba ra boo buu yakanɛ. Adama u ǹ win tundo ka win mɛro sɔ̃ɔwa ye u kua. 7Ma u doona u da u ka kurɔ wi gari kua. Kurɔ wi, u nùn wɛ̃re gem gem. 8Sɔ̃ɔ mɛɛrun biru Sansom u kpam sarɔ mi ka win tundo ka win mɛro u ka win kurɔ sua. Ma u gɛra gbee sunɔ goo ten mi, u tu mɛɛra. Yera u deema wee, tĩi yi mɔma te sɔɔ, yi tim koosi. 9Ma u nɔma kpɛ̃ɛ u tim mɛ wɔwa u dimɔ swaaɔ. Ye u win tundo ka win mɛro naamwɛ, u maa bu wɛ̃ ba di. Adama u ǹ bu sɔ̃ɔwa ma gbee sunɔ gorun diya u tim mɛ wunama. 10Ma win tundo u da kurɔ win yɛnuɔ. Miya Sansom u kurɔ kpaa dĩanu kua domi mɛya aluwaasiba ba ra ko. 11Sanam mɛ Filisitiba ba wa mɛ, ma ba aluwaasiba tɛna kasu ba da ba ka nùn sina. 12Ma Sansom u bu sɔ̃ɔwa u nɛɛ, kon bɛɛ sukuru garu kua. Sere n ka ko kurɔ kpaa ten sɔ̃ɔ nɔɔba yiru, kpa i man tu tubusia. Ì n tu tuba, kon bɛɛn baawure yaberu kɛ̃ ka tɔ̃ɔ baka yãnu. 13Adama ì kun tu tuba bɛɛya i ko man ye kpuro wɛ̃. Ma ba nɛɛ, oo, a sun tu kuo, sa swaa daki. 14Ma u nɛɛ, dion min diya dĩanu yara. Damgiin min diya gãa duronu yara. Ma ba kpana bu suku te tubusia sere n ka kua sɔ̃ɔ ita. 15Yen biru ba Sansom kurɔ wi sɔ̃ɔwa ba nɛɛ, a wunɛn durɔ kɔkirio u ka sun suku te tubusia. À n yina, sa ko bɛɛ dɔ̃ɔ mɛni, wunɛ ka wunɛn yɛnugibu kpuro. N ǹ i sun sokawa i ka bɛsɛn yãnu wɔra? 16Ma Sansom kurɔ u na u sumɔ win wuswaaɔ u nɛɛ, a man kam mɛɛrawa. A ǹ man kĩ. A nɛn tɔmbu sukuru kua, adama a ǹ man tu tubusie. Ma Sansom u nɛɛ, suku te na ǹ nɛn tundo ka nɛn mɛro tubusie, wuna kon sere tu tubusia? 17Ma u sumɔ tɔ̃ɔ baatere Sansom wuswaaɔ. Ye n kua sɔ̃ɔ nɔɔba yiruseru yera u nùn suku ten tubusianu sɔ̃ɔwa. Domi wuri yi, yi den nùn wasira. Ma kurɔ wi, u da u nu win tɔmbu sɔ̃ɔwa. 18Yera sɔ̃ɔ nɔɔba yiruse ten yoka tɔn be, ba Sansom sɔ̃ɔwa ba nɛɛ, mba n do n tim kere. Nge mba n dam mɔ n kere gbee sunɔ. Ma Sansom u nɛɛ, ì kun daa ka nɛn kurɔ sɔmburu kue nge naa wuku, i ǹ daa suku te tubu. 19Yande Yinni Gusunɔn Hunde u nùn yɔɔwa ma u da u Asikalonigibu go tɔnu tɛna tɔn durɔbu tɔna. U ben yãnu gura u ka da u be ba win suku te tuba wɛ̃. Ma u gɔsira win baan yɛnuɔ ka mɔru. 20Yera ba win kurɔ wi sua ba aluwaasi tɛna yen turo kã wi u kua win kurɔ kpaa saro.

will be added

X\