Kparobu 13

1Abudonin biru Isireliba ba kpam kua ye ya ǹ Yinni Gusunɔ dore, ma u bu Filisitiba nɔmu bɛria wɔ̃ɔ weeru. 2N deema durɔ goo wãa Soreaɔ Danun bweseru sɔɔ, win yĩsira Manɔa. Win kurɔ u sãawa wĩro. 3- 5Sɔ̃ɔ teeru Yinni Gusunɔn gɔrado goo u kurɔ wi kure u nɛɛ, wee, a sãa wĩro, adama kaa gura sua kpa a bii tɔn durɔ ma. U ko n sãawa wi ba wuna nɛnɛm Gusunɔn sɔ̃ saa win marubun di. Yen sɔ̃, a n tii sɛ, a ku tam gam nɔ, kpa a ku gãa seseruginu di. A ku ra maa de bu bii win seri bura, domi wiya u koo Isireliba wɔram tore saa Filisitiban nɔman di. 6Ma kurɔ wi, u da u win durɔ sɔ̃ɔwa u nɛɛ, Gusunɔn tɔnu goowa u man deema. U sãawa nge Gusunɔn gɔrado goo. U nanum mɔ too. Na ǹ maa nùn bikie mìn di u na. U ǹ maa man win yĩsiru sɔ̃ɔwa. 7Adama u man sɔ̃ɔwa u nɛɛ, kon be gura sua kpa n bii tɔn durɔ ma. Yen sɔ̃, n ku be tam gam nɔ, kpa n ku gãa seseruginu di. Domi bii wi, u ko n sãa wi ba wuna nɛnɛm Gusunɔn sɔ̃ saa win marubun di sere ka win wãarun nɔrɔ. 8Yera Manɔa u kanaru kua nge mɛni, u nɛɛ, Yinni, a de wunɛn tɔnu wi a gɔrima mi, u kpam sun naawa kpa u sun sɔ̃ɔsi ye n weenɛ su bii wi kua wi sa ko ma mi. 9Ma Gusunɔ u Manɔan kanaru mwa, u dera win gɔrado wi, u wura kurɔ win mi, mi u sɔ̃ gberɔ. Adama win durɔ sari mi. 10Ma u duka da win durɔn mi, u nùn sɔ̃ɔwa u nɛɛ, durɔ wi u na nɛn mi gin teeru, wee u maa na tɛ̃. 11Manɔa u seewa u win kurɔ swĩi ba na durɔ win mi. Yera Manɔa nùn bikia u nɛɛ, wuna a ka kurɔ wi gari kua? Ma u nɛɛ, oo, nɛna. 12Manɔa u nɛɛ, wunɛn gari yi, yì n koora, wooda yerà sa ko swĩi bii win sɔ̃. Amɔna sa ko nùn kua. 13Ma Yinni Gusunɔn gɔrado wi, u nùn wisa u nɛɛ, ye na kurɔ wi sɔ̃ɔwa mi kpuro, yera u koo se. 14U ǹ koo gãanu di ni nu yara resɛm di. U ǹ tam gam nɔrumɔ, u ǹ maa gãa seseruginu dimɔ. Ye na nùn yiire mi kpuro, yera u koo ko. 15Manɔa u Yinni Gusunɔn gɔrado wi sɔ̃ɔwa u nɛɛ, na nun kanamɔ, a de su nun gɔ̃rasia, kpa su nun boo kpɛmu yaarɛ ko. 16Ma gɔrado wi, u nɛɛ, baa à n man gɔ̃rasia, na ǹ wunɛn dĩanu dimɔ. Adama à n kĩ a nu kon na ka mɛ, a ka ye Yinni Gusunɔ yãku dɔ̃ɔ mwaararugiru kuo. Manɔa u ǹ yɛ̃ ma Yinni Gusunɔn gɔradowa durɔ wi, u sãa. 17Ma u nɛɛ, amɔna wunɛn yĩsiru, kpa su wa su nun takaru ko, wunɛn gari yi, yì n koora. 18Yera gɔrado wi, u nɛɛ, mban sɔ̃na a nɛn yĩsiru bikiamɔ. Nɛn yĩsira, wi u ra maamaaki ko. 19Saa yera Manɔa u boo kpɛmu sua ka dĩanu ganu u yi kperu wɔllɔ u ka Yinni Gusunɔ yãkuru kua, wi, wi u ra maamaaki ko. Saa ye Manɔa ka win kurɔ ba yãku te mɛɛra, 20saa ye sɔɔra dɔ̃ɔ yara ya seewa wɔllɔ yãku ten min di, ma Yinni Gusunɔn gɔrado wi, u dua dɔ̃ɔ yara ye sɔɔ u ka suara. Ye Manɔa ka win kurɔ ba wa mɛ, ma ba kpuna ba wuswaa tem girari. 21Saa ye sɔɔra u den gia ma Yinni Gusunɔn gɔradowa mi. Saa dɔma ten di Gusunɔn gɔrado wi, u ǹ maa naare ben mi. 22Ma Manɔa u win kurɔ sɔ̃ɔwa u nɛɛ, sa ko gbiwa mi, domi sa Gusunɔ wa. 23Yera win kurɔ u nɛɛ, Yinni Gusunɔ ù n kĩ u sun gon na, u ǹ koo raa bɛsɛn yãku te mwa. U ǹ koo raa maa de su yeniba kpuro wa kpa su yenin bweseru nɔ ye sa nua tɛ̃. 24Amɛn biru kurɔ wi, u gura sua ma u bii tɔn durɔ mara. Ma ba nùn yĩsiru kã Sansom. Bii wi, u kpɛ̃a ma Yinni Gusunɔ u nùn domaru kua. 25Sanam mɛ u wãa Makanɛ Danuɔ, Sorea ka Ɛsitaolin baa sɔɔ, Yinni Gusunɔn Hunde u nùn yɔɔwa u ka win sɔmburu tore.

will be added

X\