1 Durɔ goo u wãa Galadi mi, win yĩsira Yɛfite. Durɔ wi, tabu durɔn tiiwa. Galadiwa u nùn mara ka kurɔ tanɔ goo. 2 Galadi wi, u maa bibu gabu mara ka win kurɔ. Sanam mɛ bii be, ba kpɛ̃a ba Yɛfite gira win tundon yɛnun di ba nɛɛ, u ǹ tundon tubi dimɔ domi u sãawa kurɔ tanɔ bii. 3 Ma Yɛfite u win tundo turosi be duka suuri, u da u wãa Tobuɔ. Ma u garu koo sariba mɛnna u ka tɔmbu wɔraa daamɔ. 4 Yen biru Amɔniba ba Isireliba wɔri. 5 Sanam mɛ tabu swĩa, yera Isireliban guro gurobu be ba wãa Galadiɔ ba da ba Yɛfite deema Tobu mi. 6 Ba nɛɛ, a na a ko bɛsɛn kparo su ka Amɔniba wɔri. 7 Yera u guro guro be sɔ̃ɔwa u nɛɛ, nɛ wi na sãa bɛɛn yibɛrɛ? N ǹ bɛɛ i man gira saa nɛn tundon yɛnun di? Yèn sɔ̃ i wãa wahala sɔɔ, n ǹ yen sɔ̃na i man somiru kanamɔ? 8 Ma Galadigii be, ba nùn wisa ba nɛɛ, geema, yen sɔ̃na sa na wunɛn mi, a sun kpara su ka Amɔniba tabu ko. Yen biru kpa a n sãa bɛsɛn kparo, bɛsɛ be sa wãa Galadin bera mi. 9 Yɛfite u bu wisa u nɛɛ, ì n ka man da sa Amɔniba tabu wɔri, ma Yinni Gusunɔ u dera sa bu kamia, nɛna kon ko bɛɛn kparo ka gem? 10 Ma tɔn be, ba nùn wisa ba nɛɛ, Yinni Gusunɔwa ko n sãa bɛsɛn seeda sà kun kue ye sa gerua. 11 Yera Yɛfite u ka bu da, ma ba nùn kua ben kparo. Saa ye sɔɔra u win gari yi kpuro Yinni Gusunɔ saaria Misipaɔ. 12 Yera Yɛfite u Amɔniban sina boko gɔria u nɛɛ, mba n sun mɔɔsinɛ nɛ ka wunɛ, a ka nɛn tem tabu wɔrimɔ. 13 Ma sina boko wi, u nùn wisa u nɛɛ, sanam mɛ Isireliba ba wee Egibitin di, ba nɛn tem mwa saa daa te ba mɔ̀ Aanɔɔn di n ka girari daa te ba mɔ̀ Yabɔkuɔ ka Yuudɛnin wɔwaɔ. Yen sɔ̃, i sun bɛsɛn tem wesio ka bɛɛn tii. Ì n kua mɛ, sannɔ maa sari. 14 Yera Yɛfite u maa sunɔ wi gɔria u nɛɛ, 15 Isireliba ba ǹ Mɔabuban tem ka Amɔniban tem mwɛ. 16 Geema, sanam mɛ ba wee Egibitin di, ba gbaburu sara ma ba nim wɔ̃ku ge ba mɔ̀ Naa yari tɔbura. Yen biru ba da Kadɛsiɔ. 17 Saa min diya ba Edɔmun sunɔ gɔria ba nɛɛ, u de bu win tem sara bu da wuswaaɔ Kananin temɔ. Adama u yina mam mam. Mɛya ba maa Mɔabun sunɔ gɔria. Yera win tii, u maa yina. Ma Isireliba ba sina Kadɛsi mi. 18 Yen biruwa ba seewa Kadɛsin min di ba gbaburun swaa mwa ba Mɔabuba ka Edɔmuban tem sɛ̃ɛna sere ba ka tura Mɔabu ben tem sɔ̃ɔ yari yerɔ. Ma ba ben sansani gira daa te ba mɔ̀ Aanɔɔn bɔkuɔ mi Mɔabuban tem mu nɔɔ yɔ̃ra. 19 Saa min diya ba maa Sihoni, Amɔreban sina boko gɔria wi u wãa Hɛsiboniɔ ba nɛɛ, u de bu sara win temɔ bu doona Kananin tem gia. 20 Adama Sihoni u ǹ Isireliba naanɛ kue u sere de bu sara win temɔ. Ma u win tabu kowobu kpuro mɛnna ba ben sansani gira Yahasiɔ. Ma ba ka Isireliba tabu kua. 21 Yera Yinni Gusunɔ u Sihoni ka win tɔmbu kpuro Isireliba nɔmu bɛria. Ma Isireliba ba bu go go ba kamia ba tem mɛ kpuro mwa. 22 Ba mwawa saa daa te ba mɔ̀ Aanɔɔn di n ka girari daa te ba mɔ̀ Yabɔkuɔ. Saa maa gbaburun di te ta wãa sɔ̃ɔ yari yerɔ n ka girari Yuudɛniɔ. 23 Wee tɛ̃ Gusunɔ, bɛsɛ Isireliban Yinni u Amɔreban tem mɛ mwa u sun wɛ̃. Yera a kĩ a maa sun mu mwaari? 24 Tem mɛ wunɛn bũu Kemɔsi u nun wɛ̃, a ǹ mu nɛni wunɛ ro? Ǹ n mɛn na, sa ko maa tem mɛ Gusunɔ bɛsɛn Yinni u sun wɛ̃ nɛnɛwa. 25 Baa Balaki Siporin bii, Mɔabuban sunɔ wi u dam bakam mɔ, u ǹ wure u ka sun sikirina u sere nɛɛ, u koo sun tabu wɔri. Wunɛ a nùn dam kerewa? 26 Wee yen wɔ̃ɔ gooba wunɔbuwa (300) mini ye Isireliba ba ka wãa Hɛsiboniɔ ka Aroɛɛɔ ka sere wuu si su wãa mi kpuro ka si su wãa daa te ba mɔ̀ Aanɔɔn bɔkuɔ. Mban sɔ̃na i ǹ bu tem mɛ mwaari saa saa yen di. 27 Sina boko, n ǹ nɛ na tora, wuna a tora. Domi wuna a gbia a sun tabu wɔrima. Yen sɔ̃na Yinni Gusunɔ wi u ra tɔmbu sirie u sun siria gisɔ bɛsɛ ka bɛɛ. 28 Adama Amɔniban sina boko wi, u ǹ Yɛfiten gari wure. 29 Yera Yinni Gusunɔn Hunde u Yɛfite yɔɔwa. Ma u Manasen tem sara u da Misipaɔ Galadin temɔ. Min diya u maa da Amɔniban temɔ. 30 Miya u Yinni Gusunɔ nɔɔ mwɛɛ teni kua u nɛɛ, Yinni, à n man Amɔniba nɔmu bɛria, 31 ma na bu kamia na wee, tɔnu wi na gbia na ka yinna, wiya kon mwa n ka nun yãku dɔ̃ɔ mwaararugiru kua. 32 Min diya u seewa u da Amɔniban temɔ u ka bu tabu ko. Ma Yinni Gusunɔ u maa nùn bu nɔmu bɛria. 33 Ma u bu kamia u nasara sua u ben wusu yɛndu mwa si su wãa Aroɛɛn di n ka da Minitiɔ sere ka Abɛli Keramimuɔ. Ma Gusunɔ u dera Isireliba ba bu taare mam mam. 34 Sanam mɛ Yɛfite u gɔsirɔ win wuuɔ, Misipaɔ, yera win bii wɔndia u yarima u nùn sennɔ wee, u bara kpãru soomɔ u yaamɔ. N deema bii wɔndia wi turowa u mara. U ǹ maa bii goo mɔ. 35 Sanam mɛ u bii wi wa, yera u win tiin yaberu nɛnua u karana nuku sankiranun sɔ̃, u nɔɔgiru sua u nɛɛ, nɛn bii, nuku sankira bakanu sɔɔra a man doke mi. Domi na Yinni Gusunɔ nɔɔ mwɛɛru kua. Ta ǹ maa kɔbiarɔ. 36 Ma bii wɔndia wi, u win tundo wisa u nɛɛ, à n Yinni Gusunɔ nɔɔ mwɛɛru kua, a ka man koowo kpuro nge mɛ a gerua domi u dera a Amɔniba be ba sãa wunɛn yibɛrɛba mɔru kɔsia. 37 Adama a man suru yiru kɛ̃ɛyɔ gina kpa n da guunu wɔllɔ ka nɛn wɔndia kpaasibu su wuri ko mi, yèn sɔ̃ na ǹ durɔ sue na ka gbiɔ. 38 Ma Yɛfite u nùn suru yiru ye kã. U da guunu wɔllu mi, ka win wɔndia kpaasibu ba wuri kua. 39 Ye suru yiru ye, ya yiba, u da u win tundo deema. Ma tundo u ka nùn yãku te kua, tèn nɔɔ mwɛɛru u Yinni Gusunɔ kua. Nge mɛya wɔndia wi, u ka gu, u ǹ durɔ sue. Saa dɔma ten diya ba woro teni yi Isireliɔ. 40 Wɔ̃ɔ baagere Isireliban tɔn kurɔbu ba ra yariwa wuun di bu da bu Yɛfite Galadigiin bii wɔndia wi swĩiya sɔ̃ɔ nnɛ.
