Yosue 9

1- 2Sinam be ba wãa sɔ̃ɔ duu yeru gia, guunun bera gia ka nim wɔ̃ku ge ba mɔ̀ Mɛditeranɛ gia n ka da Libanin tem bera gia, ba nua ma Isireliba ba Yerikogibu ka Ayigibu kamia. Yera ba nɔɔ tia kua bu ka Isireliba ka ben wirugii Yosue wɔrima. Bwese ninin sinamba, Hɛtiba ka Amɔreba ka Kananiba ka Feresiba ka Hefiba ka Yebusiba. 3Adama ye Gabaonigibu be ba sãa Hefiba ba maa nua ye Yosue u Yerikogibu ka Ayigibu kua, 4- 5yera ba swaa kasu bu ka tii dwe. Ma ba dĩanu kusenu kua ba doke saaki tɔkɔnu sɔɔ, ma ba maa gɔni bɔɔ tɔkɔnu sua mì sɔɔ ba ra tam doke ka sere maa pɛ̃ɛ gbebi yi yi bukusa kua, ma ba ye kpuro ben kɛtɛkunu sɔbi. Ma ben tii ba yãa tɔkɔnu ka bara tɔkɔnu doke. 6Ma ba da ba Yosue ka Isireliba deema Giligaliɔ ba nɛɛ, saa tontonden diya sa wee su ka bɛɛ arukawani bɔke. 7Ma Isireliba ba bu wisa ba nɛɛ, sɔrɔkudo i wãawa bɛsɛn turuku mini, sa ǹ kpɛ̃ su ka bɛɛ arukawani bɔke. 8Ma ba Yosue wisa ba nɛɛ, sa wura su ko wunɛn sɔm kowobu. Ma Yosue u bu bikia u nɛɛ, man diya i wee. Bwese terà i sãa. 9Ma ba nùn wisa ba nɛɛ, bɛsɛ wunɛn bwãabu sa weewa saa tontonden di yèn sɔ̃ sa Gusunɔ wunɛn Yinnin baaru nua ka maamaaki ye u kua Egibitiɔ, 10ka nge mɛ u Amɔreban sinambu yiru ye kua, be ba wãa Yuudɛnin sɔ̃ɔ yari yeru gia. Beya Sihoni, Hɛsibonin sunɔ, ka Ogu, Basanin sunɔ wi u wãa Asitarɔtuɔ. 11Ye sa maa seewa bɛsɛn wuun bukurobu ka be ba tie ba sun kirɔ kua ba nɛɛ, su dĩanu kusenu koowo swaan sɔ̃ kpa su na su bɛɛ deema su bɛɛ bikia i ka sun arukawani bɔke kpa sa n bɛɛ sãamɔ. 12Bɛɛn tii i wa nge mɛ bɛsɛn pɛ̃ɛ ye, ya gbere ya bukusa sãa. Sanam mɛ sa seewa yɛnun di, ya sãawa pɛ̃ɛ suma. 13I maa bɛsɛn gɔni mɛɛrio yì sɔɔ sa tam doke. Yi raa sãawa gɔni kpɛɛ, wee tɛ̃ yi gɛ̃ɛkire. Mɛya maa bɛsɛn baranu ka yãa ni sa doke, nu gɛ̃ɛkira swaa sɔɔ gbabu ten dɛ̃ɛbun sɔ̃. 14Adama Isireliba ba ǹ Yinni Gusunɔ bikie bu nɔ ù n kĩ bu ka bu arukawani bɔke. Ma ba sibun dĩa kuse ni mura ba di. 15Ma Yosue u ka bu nɔɔ tia kua, ba arukawani bɔkua ba n ka wãasinɛ alafia sɔɔ. Ma Isireliban bukurobu ba wura ka bɔ̃ri ma ba koo ben arukawani ye yibia. 16Yen sɔ̃ɔ itasera Isireliba ba nua ma tɔn ben wusu wãawa ben turuku mi. 17Ma ba seewa ba wuu si mɛɛrim da. Ba sĩawa sɔ̃ɔ yiru, itase ma ba tura mi. Wuu siya, Gabaoni, ka Kefira ka Berɔtu ka Yarimun wuu. 18Adama ba ǹ bu go yèn sɔ̃ ben bukuroba ka bu arukawani bɔkua kɔ, ma ba koo bu deri alafia sɔɔ. Ma ba ye bɔ̃rua ka Gusunɔ ben Yinnin yĩsiru. Ka mɛ, be Isireli be, ba ka ben bukuro be wɔki. 19Ma bukuro be, ba wisa ba nɛɛ, sa ǹ kpɛ̃ su tɔn be nɔni sɔ̃, domi sa ka bu arukawani bɔkua kɔ. Sa bɔ̃rua ka Yinni Gusunɔn yĩsiru ma sa ǹ bu gãanu kuammɛ. 20Tilasiwa su ka bu deri. Ma n kun mɛ, sa ko Yinni Gusunɔn mɔru seeya. 21Yen sɔ̃, wee ye sa ko bu kua. Ba ko n da sun dãa kasuewa kpa ba n da sun nim takirie. 22Ma Yosue u Gabaonigii be kpuro sokusia. Ye ba tunuma u bu bikia u nɛɛ, mban sɔ̃na i sun weesu kua, i nɛɛ, i weewa tontonden di. Ma sa deema i wãa bɛsɛn turuku. 23Tɛ̃ i kua bɔ̃rurobu bɛɛ kpuro. I ko i n sãawa bɛsɛn yobu, kpa i n da nim takiri, i dãa kasu bɛsɛn Yinnin sãa yerun sɔ̃. 24Ma Gabaonigii be, ba nɛɛ, wee yèn sɔ̃ sa kua mɛ. Sa nua ma Gusunɔ wunɛn Yinni u win sɔm kowo Mɔwisi wooda wɛ̃ u bɛɛ tem mɛ kpuro wɛ̃ kpa i mɛn tɔmbu kpuro go be i ka gesi yinna kpuro. Yen sɔ̃na sa ka bɛsɛn wãaru nanda. 25Tɛ̃, wee sa wãa wunɛn nɔmuɔ. A ka sun koowo nge mɛ n weenɛ. 26Ma Yosue u ǹ wure Isireliba bu bu go. 27Adama u bu sure ba n da dãa kasu kpa bu nim takiri Isireliban sɔ̃ ka ben yãkunun sɔ̃ yam mi Yinni Gusunɔ u koo ra gɔsi bu nùn sã. Sere ka gisɔn gisɔ Gabaonigibun bibun bwese tera, ta sɔmbu te mɔ̀.

will be added

X\