Yosue 8

1Yinni Gusunɔ u Yosue sɔ̃ɔwa u nɛɛ, a ku nanda, a seewo a tabu durɔbu kpuro sua kpa i Ayi wɔri. Domi na bɛɛ yen sunɔ ka win tɔmbu ka win wuu ka gen baru kpaanu kpuro nɔmu bɛria. 2Kaa bu kpeerasiawa nge mɛ a Yerikogibu ka ben sunɔ kua. Kpa i ben ye ba mɔ ka ben yaa sabenu mwɛɛri, ye kpuro yu ko bɛɛgia. Yen sɔ̃, ì n da, bɛɛn gaba koo kukewa wuu gen biruɔ, ba n bu yɔɔru bwɛ̃ɛyɛ. 3- 4Ma Yosue u seewa u ka Ayi wɔri ka win tabu durɔbu kpuro. Yera be sɔɔ, u nɔrɔbun suba tɛna (30.000) gɔsa u bu sɔ̃ɔwa u nɛɛ, i doo i kuke wuu gen biruɔ wɔ̃kuru, adama i kun ka bu toma kpa i n yɔ̃ mi, i n sɔɔru sãa. 5Nɛ ka maa tabu kowo be ba tie, sa ko wuu ge susi. Bà n sun wɔrim wee, kpa su duki gɔsirama nge yellu. 6Kpa bu sun naa gira. Mɛya sa ko ka bu yara wuun di mam mam. Domi ba koo nɛɛ, sa duki mɔ̀wa nge mɛ sa raa kua yellu ben wuswaaɔ. Kpa bu sun naa swĩi. 7Saa yera, bɛɛ be i kukua mi, i ko yarima i wuu ge wɔri, i gu mwa. Yinni Gusunɔwa u koo bɛɛ gu nɔmu bɛria. 8Wee, na bɛɛ wooda wɛ̃ɛmɔ. Sanam mɛ i gu mwa i kpa, i gu dɔ̃ɔ sɔ̃reo, nge mɛ Yinni Gusunɔ u gerua. 9Ma Yosue u dera ba da ba kukua Ayi ka Betɛlin baa sɔɔ, Ayin sɔ̃ɔ duu yeru gia. Adama win tii ka tɔn be ba tie ba kpuna sansaniɔ wɔ̃ku te. 10Ye n kua buru buru yellu, u seewa u win tabu kowobu mɛɛra mɛɛra ma wi ka Isireliban guro gurobu ba bu kpara ba ka da Ayi gia. 11Yosue ka win tabu kowo be, ba Ayi susi. Sanam mɛ ba tura yen deedeeru, yera ba ben sansani gira sɔ̃ɔ yɛ̃san nɔm geu gia. N deema wɔwa gaa wãa be ka Ayin baa sɔɔ. 12Yosue u maa dera tabu durɔbu nɔrɔbun suba nɔɔbu (5.000) ya da ya kukua Betɛli ka Ayin baa sɔɔ, sɔ̃ɔ duu yeru gia. 13Isireli be ba tie, ba ben sansani gira sɔ̃ɔ yɛ̃san nɔm geu gia. Ma ben gaba maa da ba kukua Ayin sɔ̃ɔ duu yeru gia. Adama Yosuen tii u da u kpunawa wɔwa yen mi, wɔ̃ku te. 14Ye n kua buru buru yellu, yera Ayin sunɔ u Isireliba wa. Ma wi ka win tabu kowobu ba seewa ka sɛndaru bu ka Isireliba wɔri Yuudɛnin wɔwa mi, mi ba raa bu kamia. Adama ba ǹ yɛ̃ ma Isireliban sukum mu kukua wuun biruɔ. 15Ye Yosue ka win tɔmbu ba bu wa, yera ba bwisi kua ba duki yakura ba swaa mwa ye ya dɔɔ gbaburu gia. 16Ma ba Ayin tɔn durɔbu kpuro soka. Yera ba yara ba bu naa gira sere mi n toma wuun di. 17Tɔn durɔ goo kun maa tiare Ayi ka Betɛlin wuu si sɔɔ. Ba wuu ge deriwa ba ǹ kɛnua ba Isireliba naa gira. 18Ma Yinni Gusunɔ u Yosue sɔ̃ɔwa u nɛɛ, a wunɛn yaasa ye a nɛni mi tĩiyɔ Ayi gia, domi kon nun wuu ge nɔmu bɛria. Ma Yosue u win yaasa ye tĩi mi. 19Saa yera tɔn be ba kukua mi, ba yara saa ben kuku yerun di ba wuu ge wɔri. Ye ba gu mwa ba kpa, ma ba yande gu dɔ̃ɔ sɔ̃re. 20- 21Ye Ayigibu ba biru sĩira, yera ba wa wee, dɔ̃ɔ wiira ta ben wuu wukiri ta wɔllu girari. Ma ba deema ba ǹ maa kpɛ̃ bu gam susi bu ka tii faaba ko. Saa yera Yosue ka Isireli be ba raa duki mɔ̀ ba dɔɔ gbaburu gia mi, ba wa ma begibu ba wuu ge dɔ̃ɔ sɔ̃re, yera ba gɔsirama ba Ayigii be wɔri. 22Sanam mɛya Isirelin tabu kowo be ba raa wuu ge dɔ̃ɔ mɛni mi, ba yara min di ba gen tabu kowo be mara. Ma ba bu suunu doke sere ba ǹ yɛ̃ mi ba koo da. Ba bu mwɛɛra ba go go kpuro. Ben goo kun bu kisirari, 23ma n kun mɔ ben sunɔ wi ba mwa wasiru ba ka da Yosuen mi. 24Ye Isireliba ba ben yibɛrɛ be mwa ba go go gbaburu mi, mi ba bu naa swĩi, yera ba maa gɔsirama Ayiɔ ba tɔn be ba tie go go. 25Tɔn be ba go dɔma te, kurɔbu ka durɔbu, ba sãawa nɔrɔbun suba wɔkura yiru (12.000). 26Saa ye ba taa bi mɔ̀ Yosue u win yaasa ye wuu ge tĩiwa sere ba ka gen tɔmbu kpuro go mam mam. 27Isireliba ba Ayigibun yaa sabenu gura ka ben arumani kpuro, nge mɛ Yinni Gusunɔ u Yosue sɔ̃ɔwa. 28Ma Yosue u wuu ge dɔ̃ɔ sɔka ma ga kua bansu sere ka gisɔn gisɔ. 29Saa yera u dera ba Ayin sunɔ wi soora doke ba bwɛ̃ ba deri saa bururun di sere sɔ̃ɔ ka kpa. Yoka u dera ba win goru bwɛ̃ɛya ba kɔ̃ wuu gen duu yerɔ. Ma ba tu kpenu sɛ̃siki. Kpee ni, nu wãa mi sere ka gisɔn gisɔ. 30Yeniban biru Yosue u Gusunɔ, Isireliban Yinni yãku yeru bania guu te ba mɔ̀ Ebalin wɔllɔ. 31U yãku yee te banawa nge mɛ Mɔwisi, Yinni Gusunɔn sɔm kowo u Isireliba sɔ̃ɔwa ye u yorua woodaban tireru sɔɔ. U nɛɛ, bu Yinni Gusunɔ yãku yeru kuo ka kpee ni ba ǹ dãke. Ye ba tu bana ba kpa ma ba yãku dɔ̃ɔ mwaararuginu ka siarabun yãkunu kua mi. 32Isireliba kpuron wuswaaɔ Yosue u wure u wooda yorua ye Mɔwisi u raa yorua. 33Isireliba kpuro ka ben wirugibu ka ben siri kowobu ka ben guro gurobu ka sere be ba sãa sɔbu kpuro ba yɔ̃ ba ka Yinni Gusunɔn woodan kpakoro te dɛsire. Ben gabu ba yɔ̃ guu te ba mɔ̀ Garisimun bera gia, gabu maa guu te ba mɔ̀ Ebalin bera gia. Ma be kpuro ba yãku kowobu Lefi be ba woodan kpakoro te sɔɔwa wuswaa kisi. Domi mɛya Mɔwisi u bu sɔ̃ɔwa bu ko saa ye ba koo bu domaru kua. 34Yen biru Yosue u bu wooda ye garia sere ka ye ya bɔ̃ri ka domarun gari mɔ̀, nge mɛ Mɔwisi u yorua yen tireru sɔɔ. 35Ye kpurowa u gara Isireliban wuswaaɔ, tɔn durɔbu ka tɔn kurɔbu ka bibu ka sere maa sɔbu be ba wãa ben suunu sɔɔ. Baa yen tia, u ǹ bure.

will be added

X\