1 Adama Isireliba ba kua naanɛ sarirugibu gãa ni Yinni Gusunɔ u nɛɛ, bu kpeerasia mam mam Yerikoɔn sɔ̃. Domi Akani u gãanu sua min di, ma Yinni Gusunɔ u ka Isireliba mɔru kua. Akani wi, u sãawa Kaamin bii. U maa sãa Sabidin debubu ka sere maa Serakin sikadobu Yudan bweseru sɔɔ. 2 Yera Yosue u tɔmbu gɔra Yerikon di Ayiɔ, ye ya wãa Bɛti Afɛnin bɔkuɔ, Betɛlin sɔ̃ɔ yari yeru gia. U bu sɔ̃ɔwa u nɛɛ, i doo i tem mɛn saria mɛɛri. Ma ba da ba Ayin saria mɛɛra. 3 Ye ba wurama Yosuen mi, ba nɛɛ, wuu ge, ga ǹ tura ge tɔmbu kpuro ba koo daawa. A de tɔmbu nɔrɔbun suba yiru (2.000), ǹ kun mɛ ita bu da bu Ayi wɔri, a ku tɔmbu kpuro wahala doke. Domi wuu gen tɔmbu ba ǹ dabi. 4 Ma tɔmbu nɔrɔbun suba itan (3.000) saka ba swaa wɔri ba da mi, adama ba Ayin tɔmbu kpana ba duki gɔsirama. 5 Ayigibu ba bu naa swĩi saa wuu gen duu yerun di sere Sebarimuɔ, ma ba Isireliban tɔnu tɛna ka nɔɔba tia go sanam mɛ ba duki mɔ̀ ba wee. Yeya n dera Isireliba ba nanda, ba mwia kpana. 6 Yosue ka Isireliban guro gurobu ba ben yabenu nɛnua ba karana ba tii tua wisi wirɔ nuku sankiranun sɔ̃, ma ba wiru tem girari Yinni Gusunɔn woodan kpakoro ten wuswaaɔ sere sɔ̃ɔ ka kpa. 7 Yosue u nɛɛ, kuku, Yinni Gusunɔ, mban sɔ̃na a dera sa Yuudɛni tɔbura ma a sun Amɔreba nɔmu bɛria bu sun go. Sà n daa yɛ̃ mɛ, sa n sinɛ Yuudɛnin guru giɔ. 8 Yinni, mba kon gere. Wee, Isireliba ba ben yibɛrɛba nasia ba biruku yira wura. 9 Domi Kananiba ka tem mɛn tɔmbu kpuro ba koo ye nɔ kpa bu sun kooro bure bu bɛsɛn yĩsiru wuna handunian di. Amɔna kaa ko wunɛn yĩsi baka te, ta kun ka gu. 10 Yera Yinni Gusunɔ u Yosue sɔ̃ɔwa u nɛɛ, a seewo. Mban sɔ̃na a wunɛn wuswaa tem girari mɛsum. 11 Isireliba ba durum kuawa. Ba nɛn wooda sara ye na bu wɛ̃. Ba gãanu sua ni na nɛɛ bu kpeerasia. Ba nu gbɛna ba doke ben tiin yãnu sɔɔ ba berua. 12 Yen sɔ̃na ba ǹ kpɛ̃ bu yɔ̃ra bu ben yibɛrɛba ma. Ma ba biruku yira wura. Domi tɛ̃ ba sãawa be ba koo kpeerasia. Ì kun gãa ni wunɛ bɛɛn suunu sɔɔn di, na ǹ kpɛ̃ na n maa wãa ka bɛɛ. 13 A seewo a tɔn be sɔɔru koosia kpa bu tii dɛɛrasia sian sɔ̃, domi nɛ Gusunɔ, be Isireliban Yinni, na nɛɛ, ba gãanu nɛni ni na nɛɛ bu kpeerasia. Yen sɔ̃, ba ǹ kpɛ̃ bu yɔ̃ra bu ben yibɛrɛba ma, ma n kun mɔ ba nu wuna ben suunu sɔɔn di. 14 Yen sɔ̃na sia bururu bɛɛn bwesenu kpuro nu koo na nu sara nɛn wuswaaɔ tia tia. Bwese te na gɔsa, ten kãasi kpuro yi koo na yi sara tia tia. Bwese kãasa ye na gɔsa, yen yɛnusu kpurowa su koo na su sara tia tia. Yɛnu ge na gɔsa, gen tɔn durɔbu kpurowa ba koo na bu sara tia tia. 15 Sanam mɛ, kpa n gɔsi wi u gãa ni sua kpa i nùn dɔ̃ɔ mɛni, wi ka win ye u mɔ kpuro yèn sɔ̃ u nɛn wooda sara, ma u dera Isireliba ba sekuru wa. 16 Yen sisiru Yosue u seewa buru buru yellu u dera Isireliban bwesenu nu na nu sara Gusunɔn wuswaaɔ tia tia. Ma Yinni Gusunɔ u Yudan bweseru gɔsa. 17 Ma Yosue u dera Yudan bweserun kãasi yi na yi sara tia tia, ma Yinni Gusunɔ u Serakin kãasa gɔsa. Ma u dera win kãasan yɛnusu kpuro su na su sara tia tia. Ma Yinni Gusunɔ u Sabidin yɛnu gɔsa. 18 Ma u dera Sabidin yɛnun tɔn durɔbu kpuro ba na ba sara tia tia. Ma Yinni Gusunɔ u Akani gɔsa wi u sãa Kaamin bii, ka Sabidin debubu, ka Serakin sikadobu Yudan bweseru sɔɔ. 19 Yosue u Akani sɔ̃ɔwa u nɛɛ, nɛn bii, a Gusunɔ Isireliban Yinni bɛɛrɛ wɛ̃ɛyɔ, kpa a gem gere. A man sɔ̃ɔwɔ ye a kua. A ku man yen gaa berua. 20 Akani u Yosue sɔ̃ɔwa u nɛɛ, geema, na Gusunɔ Isireliban Yinni tora. Ye na kua wee. 21 Ye sa tabu di sa mwa sɔɔ, na yabe buraru garu wa te ba kua Babiloniɔ ka sii geesun gobi goobu (200) ka wura dɛka yèn bunum ka kilon bɔnu nɛ. Na ye binɛ kua ma na sua na sikua nɛn kurɔ, sii gee siya su wãa ten temɔ. 22 Yande Yosue u tɔmbu gɔra ba duki da Akanin kuru mi, ba deema wee, gãa ni kpuro nu berua kuu te sɔɔ. Ma sii gee si, su wãa nin temɔ. 23 Ba ni kpuro suama kuu ten min di ba ka da Yosue ka Isireliba kpuron mi, ba yi Yinni Gusunɔn woodan kpakororun wuswaaɔ. 24 Yosue ka Isireliba kpuro ba Akani Serakin sikadobu sua ka gãa ni u gura, ka win bibu ka win yaa sabenu ka win kuu te, ka sere win ye u mɔ kpuro gesi, ba ka da sere Akɔɔn wɔwaɔ. 25 Ma Yosue u nùn sɔ̃ɔwa u nɛɛ, mban sɔ̃na a dera sa wahala yeni wa. Yinni Gusunɔ u koo maa de a wahala wa gisɔ. Ma Isireliba kpuro ba wi ka win tɔmbu kpenu kasuka. Ma ba bu dɔ̃ɔ mɛni ka win ye u mɔ kpuro sannu. 26 Ma ba kpenu gura ba nin takanu kua ben wɔllɔ te ta wãa mi sere ka gisɔ. Ye kpuron sɔ̃na ba yam mi sokumɔ Akɔɔn wɔwa sere ka gisɔn gisɔ. Yĩsi ten tubusiana, nɔni swãarun wɔwa. Saa yera Yinni Gusunɔn mɔru ya sure.
