Yosue 6

1Yerikogibu ba ben wuun gbãrarun gamboba bɛri, ba dãa sɛ̃siki, Isireliba bu ku ka du. Goo kun duɔ mi, goo kun maa yariɔ min di. 2Ma Yinni Gusunɔ u Yosue sɔ̃ɔwa u nɛɛ, wee, na nun Yeriko nɔmu bɛria ka yen sunɔ ka yen tabu durɔ damgibu. 3Wunɛ ka wunɛn tabu durɔbu kpuro i n da sĩ sĩ i ka wuu ge sikerena nɔn teeru tɔ̃ru baatere sere n ka ko sɔ̃ɔ nɔɔba tia. 4Yãku kowobu nɔɔba yiru ba ko n Yinni Gusunɔn woodan kpakororu gbiiye ba n yaa kɔbi nɛni. Sɔ̃ɔ nɔɔba yiruse i ko wuu ge sikerenawa nɔn nɔɔba yiru kpa yãku kowo be, ba n kɔbi yi soomɔ. 5Bà n kɔbi yi so ba gawa, ma i yin swĩi nua, tɔmbu kpuro bu tabun kuuki koowo. Saa yera wuu gen gbãraru ta koo wɔruma, kpa baawure u du deedeeru mi u yɔ̃n di. 6Ma Yosue Nunin bii u yãku kowobu soka u bu sɔ̃ɔwa u nɛɛ, bu Yinni Gusunɔn woodan kpakororu suo bu senu sɔndi kpa ben nɔɔba yiru bu kɔbi sua bu woodan kpakoro te gbiiya. 7Yera u win tɔmbu sɔ̃ɔwa u nɛɛ, i seewo i sĩ sĩ i n ka wuu ge sikerenamɔ, kpa tabu kowobu gabu ba n woodan kpakoro te gbiiye. 8- 9Ye Yosue u ka tɔn be gari yi kua u kpa, ma ba swaa wɔri. Tabu kowo be, ba gbia, ma yãku kowo be ba kɔbi nɛni ba swaa wɔri ba kɔbi yi soomɔ. Ma ba ka bu woodan kpakoro te swĩi biruɔ. Tabu kowo be ba maa tie, ba kpakoro te swĩi. Saa ye be kpuro ba sĩimɔ ba wuu ge sikerenamɔ, yãku kowo be, ba ben kɔbi soomɔ. 10N deema Yosue u raa tɔn be yiire bu ku gbãra, bu ku wɔki, bu ku mam de gari gɛɛ yi yari ben nɔsun di, sere tɔ̃ɔ te u koo bu sɔ̃ bu kuuki ko. Tɔ̃ɔ tera ba koo kuuki ko. 11Yera ba ka woodan kpakoro te wuu ge sikerena nɔn teeru. Ma ba wura ben sansaniɔ sere maa sisiru. 12Yosue u seewa buru buru yellu ma yãku kowobu ba woodan kpakoro te sua. 13Ben nɔɔba yiru be ba kɔbi nɛni, ba swaa wɔri ba sĩimɔ ten wuswaaɔ. Tabu kowobu gabu ba bu gbiiye ba tabu yãnu bɛki. Ma gabu ba kpakoro te swĩi biruɔ, saa ye be kpuro ba sĩimɔ ma yãku kowo be, ba kɔbi yi soomɔ. 14Sɔ̃ɔ yiruse ba wuu ge sikerena nɔn teeru ma ba wura ben sansaniɔ. Nge mɛya ba kua sere n ka kua sɔ̃ɔ nɔɔba tia. 15Ye n kua sɔ̃ɔ nɔɔba yiruse, ma ba seewa buru buru yam sãreru ba wuu ge sikerena nɔn nɔɔba yiru. Tɔ̃ɔ te tɔnawa ba gu sikerena nɔn nɔɔba yiru. 16Nɔn nɔɔba yiruse te, saa ye yãku kowo be, ba kɔbi yi so, yera Yosue u tɔn be sɔ̃ɔwa u nɛɛ, i kuuki koowo. Domi Yinni Gusunɔ u bɛɛ wuu ge nɔmu bɛria. 17I ǹ ko i ko i kun wuu ge ka ye ya wãa ge sɔɔ kpuro kpeerasie. Ya ko n sãawa nge yãku dɔ̃ɔ mwaararugiru Yinni Gusunɔn sɔ̃. Adama i ko i Rahabu, kurɔ tanɔ wi, ka wigii be ba wãa win dirɔ deri, yèn sɔ̃ u tɔn be sa raa gɔra mi berua. 18I n tii sɛ ka gãa ni Yinni Gusunɔ u nɛɛ, i kpeerasia. Domi ì n nu sua, bɛsɛ Isireliba sa ko nɔni swãaru wa kpa su kam ko. 19Adama ye n sãa sii geesu ka wura, ka sii gandu ka sere sii wɔ̃kusu, ye kpurowa i ko Yinni Gusunɔ gura i yiiya win arumanin beru yerɔ. 20Ye yãku kowobu ba ben kɔbi so, tɔn be, ba yin swĩi nua ma ba kuuki kua. Yera wuu gen gbãrara wɔruma. Ma ben baawure u dua deedeeru mi u yɔ̃n di. Ma ba wuu ge mwa. 21Ma ba ye ya wãa ge sɔɔ kpuro go mam mam ka takobi, tɔn durɔbu ka tɔn kurɔbu, bibu ka bukurobu, ka yaa sabenu kpuro. 22N deema Yosue u raa durɔbu yiru be ba tem mɛn saria mɛɛrim da sɔ̃ɔwa u nɛɛ, bu doo kurɔ win dirɔ kpa bu wi ka wigibu kpuro yarama nge mɛ ba raa yen nɔɔ mwɛɛru kua ka bɔ̃ri. 23Ma durɔ be, ba dua ba Rahabu yarama ka win baa ka win mɛro ka win sesubu, win mɛro bisibu kpuro gesi, ba ka bu da Isireliban sansanin biruɔ. 24Yen biruwa ba wuu ge dɔ̃ɔ sɔka ka baayere kpuro ye ya wãa wuu ge sɔɔ ma n kun mɔ ye n sãa sii geesu, ka wura, ka sii gandu ka sere sii wɔ̃kusu. Yera ba doke Yinni Gusunɔn sãa yerun arumanin beru yerɔ. 25Yosue u Rahabu, kurɔ tanɔ wi faaba kua ka win mɛro bisibu kpuro. Ma ba wãa ka Isireliba sannu sere ka gisɔ yèn sɔ̃ u Yosuen tɔmbu berua be u gɔra bu Yerikon saria mɛɛri. 26Yen biruwa Yosue u bɔ̃rua u nɛɛ, baawure wi u seewa u Yeriko bana kpam, u koo ko bɔ̃ruro Yinni Gusunɔn wuswaaɔ. Ù n kpɛɛkpɛɛku suramɔ, win bii gbiikoowa u koo gbi. Ù n maa bana wiru go u gamboba dokemɔ, kpa win bii dãako u gbi. 27Ma Yinni Gusunɔ u wãa ka Yosue ma u yĩsiru yara tem mɛ kpuro sɔɔ.

will be added

X\