Yosue 5

1Saa ye sɔɔ, Amɔreban sinam be ba wãa Yuudɛnin sɔ̃ɔ duu yeru gia ka Kananigii be ba wãa nim wɔ̃ku ge ba mɔ̀ Mɛditeranɛn bera gia, be kpuro ba nua ma Yinni Gusunɔ u Yuudɛnin nim gberasia Isireliban wuswaaɔ sere ba ka tɔbura ba kpa. Yera ba nanda ma ben toronu kara Isireli ben sɔ̃. 2Sanam mɛ sɔɔra Yinni Gusunɔ u Yosue sɔ̃ɔwa u nɛɛ, a wobunu koowo ka kpenu kpa a Isireli be kpuro bango ko be ba mara gbaburɔ. 3Ma Yosue u kua nge mɛ Yinni Gusunɔ u gerua, u Isireliba bango ye kua guuru garun mi, ma ba tu soka Bangon kperu. 4- 5N deema be ba yarima Egibitin di mi, be kpurowa ba bango sãa. Adama be ba mara gbaburɔ, ba ǹ ben goo bango kue. Ma ben tɔn durɔ be ba tabu toobun saka tura ba ka yara Egibitin di mi, be kpuro ba gu gbaburɔ swaa sɔɔ sanam mɛ ba wee. 6Domi Isireliba ba sĩa wɔ̃ɔ weeru gbaburu mi, ma ben tabu durɔ be ba raa bango sãa, ba kam kua, yèn sɔ̃ ba ǹ Yinni Gusunɔn gere mɛm nɔɔwɛ. Ma u gerua ka bɔ̃ri u nɛɛ, ba ǹ koo maa tem mɛ wa mɛ mu tim ka bom yiba, mɛ u ben baababa nɔɔ mwɛɛru kua. 7Ben bii be Yinni Gusunɔ u seeya ben ayenɔ, beya Yosue u bango kua, domi ba ǹ daa bu bango kue swaaɔ. 8Saa ye ba tɔn be bango kua, ba sina sansaniɔ sɛ̃ɛ sere ben boo u ka kpa. 9Yera Yinni Gusunɔ u Yosue sɔ̃ɔwa u nɛɛ, gisɔra na bɛɛ seku te wunari te i raa mɔ saa ye i sãa yobu Egibitiɔ. Yen sɔ̃na ba yam mi sokumɔ Giligali sere ka gisɔ. Yĩsi ten tubusiana, ba wuna. 10Isireliba ba sina ben sansaniɔ Giligali mi, ye ya wãa wɔwaɔ Yerikon bɔkuɔ. Ma ba Gɔɔ sararibun tɔ̃ɔ bakaru di surun sɔ̃ɔ wɔkura nnɛsen yoka. 11Tɔ̃ɔ baka ten sisira ba tem mɛn dĩanu dibu torua. Ba dobi sɔnwa ba tema, ba maa pɛ̃ɛ di ye ba kun seeyatia doke. 12Dɔma tera manna ya yɔ̃ra ma ba Kananin tem min dĩanu dim torua wɔ̃ɔ ge. 13Ye Yosue u Yeriko turuku kua, subaru sɔɔ u durɔ goo wa u yɔ̃ win wuswaaɔ u takobi womɛ u nɛni. Yera u susi durɔ win mi, u nɛɛ, wunɛ bɛsɛgiiwa? Nge wɛrɔwa a sãa. 14Durɔ wi, u wisa u nɛɛ, aawo, na ǹ yen goo. Na sãawa Yinni Gusunɔn tabu kowobun wirugii. Yen sɔ̃na na na wunɛn mi tɛ̃. Ye Yosue u nua mɛ, ma u kpuna u wuswaa tem girari, u nɛɛ, yinni, na sãawa wunɛn bɔ̃ɔ, mba a kĩ a man sɔ̃. 15Tabu kowobun wirugii wi, u Yosue sɔ̃ɔwa u nɛɛ, a wunɛn salubata poto, domi yam mi a yɔ̃ mi, Gusunɔ u wãa mi. Ma Yosue u kua mɛ.

will be added

X\