Yosue 4

1Saa ye tɔn be kpuro ba Yuudɛni tɔbura ba kpa, yera Yinni Gusunɔ u Yosue sɔ̃ɔwa u nɛɛ, 2i durɔbu wɔkura yiru gɔsio bɛɛn bweseru baatere sɔɔ tɔn tia tia. 3I bu sɔ̃ɔwɔ bu kpenu wɔkura yiru sua Yuudɛnin tora minin di, mi yãku kowoba yɔ̃ra sim sim mi, kpa i ka da i yi mi i ko bɛɛn sansani gira i kpuna yoka ye. 4Ma Yosue u durɔbu wɔkura yiru ye soka be u gɔsa Isireliba sɔɔ, 5u bu sɔ̃ɔwa u nɛɛ, i gɔsiro Gusunɔ bɛsɛn Yinnin kpakoro ten mi, Yuudɛnin daarun tora sɔɔ, kpa bɛɛn baawure u da u kperu sua u seru sɔndima kpa nu n sãa wɔkura yiru nge mɛ bɛsɛ Isireliban bwesenun geera nɛ. 6Kpa nu n sãa seeda ye ya koo sun yaayasia ye ya koora mini. Bɛsɛn bibu bà n sun bikia sɔ̃ɔ teeru, mba kpee nin tubusianu, 7kpa su bu sɔ̃ ma Yuudɛnin daarun nim mu kokubu yɔ̃ra Yinni Gusunɔn kpakororun wuswaaɔ sanam mɛ ba ka tu tɔburɔ. Kpee nini nu ko n sãa yen seeda bɛsɛ Isireliban sɔ̃ sere ka baadommaɔ. 8Ma ba kua nge mɛ Yosue u bu sɔ̃ɔwa. Ba kpenu wɔkura yiru sua Yuudɛnin tora sɔɔn di nge mɛ ben bweserun geera nɛ, ba ka da ba yi yam mi ba ben sansani gira dɔma te, nge mɛ Yinni Gusunɔ u Yosue sɔ̃ɔwa. 9Yosue u maa kpenu wɔkura yiru ganu sua u sɔnna Yuudɛnin tora sɔɔ mi yãku kowo be, ba yɔ̃ra. Nu maa wãa mi sere ka gisɔn gisɔ. 10Yãku kowo be, ba yɔ̃ra Yuudɛnin tora sɔɔ, sere ye Yinni Gusunɔ u Yosue sɔ̃ɔwa u tɔmbu sɔ̃ kpuro ya ka koora. N deema mɛya Mɔwisi u raa maa Yosue yiire. Ma tɔn be, ba kua bara bara ba tɔbura. 11Ye tɔn be kpuro ba tɔbura ba kpa, saa yera be ba kpakoro te sɔɔwa ba maa tɔbura, ma ba besira ba da tɔn ben wuswaaɔ. 12N deema Rubɛniba ka Gadiba ka sere Manaseban sukum ba tɔbura ka ben tabu yãnu Isireli be ba tien wuswaaɔ nge mɛ Mɔwisi u raa bu sɔ̃ɔwa bu ko. 13Ben geera sãawa nɔrɔbun suba weerun (40.000) saka be ba tɔbura Yinni Gusunɔn wuswaaɔ ba da wɔwaɔ Yerikon bɔkuɔ ka ben tabu sɔɔru. 14Tɔ̃ɔ tera Yinni Gusunɔ u Yosue wɔlle sua Isireliba kpuron wuswaaɔ ma ba nùn nasia win wãarun tɔ̃ru kpuro sɔɔ nge mɛ ba raa Mɔwisi nasie. 15Yinni Gusunɔ u Yosue sɔ̃ɔwa u nɛɛ, 16a yãku kowo be ba woodan kpakoro te sɔɔwa sɔ̃ɔwɔ bu yario Yuudɛnin toran di bu da guruɔ. 17Ma Yosue u bu sɔ̃ɔwa mɛ. 18Saa yè sɔɔ yãku kowo be, ba yara daa ten min di, ye ben naasu maka guruɔ, saa yera daa ten nim mɛ, mu wura mɛn ayerɔ mu yiba mu tɛrie sere ka ten guruɔ nge yellu. 19Ben wɔ̃ɔn suru gbiikoon sɔ̃ɔ wɔkuruse, yera tɔn be, ba Yuudɛni tɔbura. Ma ba ben sansani gira Giligaliɔ, Yerikon sɔ̃ɔ yari yeru gia. 20Kpenu wɔkura yiru ye ba gurama Yuudɛnin daa tora yen di, Giligali miya Yosue u nu sɔnna. 21Ma u Isireliba sɔ̃ɔwa u nɛɛ, bɛɛn bibu bà n bɛɛ bikia sɔ̃ɔ teeru ba nɛɛ, mba kpee ninin tubusianu, 22kpa i bu tubusia nge mɛ bɛsɛ Isireliba sa ka Yuudɛni yeni tɔbura yen gbeba, 23i nɛɛ, Gusunɔ bɛsɛn Yinniwa u yen nim gberasia bɛsɛn wuswaaɔ sere sa ka tɔbura sa kpa, nge mɛ u nim wɔ̃ku ge ba mɔ̀ Naa yari kua. 24Kpa handunian tɔmbu kpuro bu ka gia ma win dam mu kpã, kpa sa n nùn nasie sere ka baadommaɔ.

will be added

X\