Yosue 3

1Yosue u seewa buru buru yellu, wi ka Isireliba kpuro, ma ba doona Sitimun di ba tura Yuudɛnin daarɔ. Ba kpuna mi sɔ̃ɔ ita bu sere tu tɔbura. 2Sɔ̃ɔ ita yen biru, yera wirugibu ba sansani bukiana ba tɔmbu sɔ̃ɔwa 3ba nɛɛ, sanam mɛ i yãku kowo Lefiba wa ba Gusunɔ bɛsɛn Yinnin woodan kpakororu sɔɔwa, i seewo i bu swĩi biruɔ. 4Ba ko n bɛɛ gbiiye yèn sɔ̃ i ǹ swaa ye swĩire. Adama i ku susi kpakoro ten bɔkuɔ. I de i n tu swĩi dandankuru nge kilo tian saka. 5Ma Yosue u tɔn be sɔ̃ɔwa u nɛɛ, i tii dɛɛrasio domi sia Yinni Gusunɔ u koo sɔm maamaakiginu ko bɛɛn suunu sɔɔ. 6U maa yãku kowobu sɔ̃ɔwa bu woodan kpakoro te suo bu swaa wɔri bu tɔn be gbiiya. Ma ba kua nge mɛ u bu sɔ̃ɔwa. 7Yen biru Yinni Gusunɔ u Yosue sɔ̃ɔwa u nɛɛ, saa gisɔn di, kon de a n yiiko mɔ Isireliba kpuron nɔni sɔɔ, kpa ba n yɛ̃ ma na wãa ka wunɛ nge mɛ na raa wãa ka Mɔwisi. 8Kaa yãku kowo be ba woodan kpakororu sɔɔwa sɔ̃ a nɛɛ, bà n tura Yuudɛnin daarɔ bu nim duo bu yɔ̃ra mɛn goorɔ. 9Ma Yosue u Isireliba sɔ̃ɔwa u nɛɛ, i susima mini kpa i Gusunɔ bɛɛn Yinnin gari nɔ. 10- 11Ì n wa Gusunɔ Yinni wason kpakororu ta bɛɛ gbiiye ta Yuudɛni duɔ, i ko i n yɛ̃ ma Gusunɔ u wãa bɛɛn suunu sɔɔ. U koo maa Kananiba ka Hɛtiba ka Hefiba ka Feresiba ka Girigasiba ka Amɔreba ka Yebusiba gira bɛɛn wuswaan di. 12I tɔn durɔbu gabu gɔsio tɛ̃ Isireliban bweseru baateren di tia tia, sɔmburu garun sɔ̃. 13Yãku kowo be ba Gusunɔ, tem kpuron Yinnin woodan kpakororu sɔɔwa, bà n ben naasu kpɛ̃ɛ Yuudɛnin daarɔ, nim mɛ, mu koo burana. Mɛ mu wee, kpa mu guna ko. 14Ma tɔn be, ba yara ben kunun di bu ka Yuudɛni tɔbura. Yãku kowo be, ba gbia wuswaaɔ. 15Saa ye, gɛ̃ɛbun saawa. Saa ye sɔɔra daa ten nim mu ra n yiba mu n tɛrie sere ka ten guruɔ. Ye yãku kowo ben naasu daa ten nim baba, 16yera mu burana mu guna kua sarun di wuu ge ba mɔ̀ Adamun beraɔ. Wuu ge, ga wãawa Saatanin bɔkuɔ. Ma nim mɛ mu daamɔ nim wɔ̃ku bɔruguu gia mu doona mam mam. Saa yera tɔn be, ba tɔbura Yerikon deedeeru. 17Be kpuro ba ka tɔbura ba kpa, yãku kowo be, ba yɔ̃wa sim sim daa te sɔɔ mi ba naasu kpɛ̃ɛ nim ka burana mi.

will be added

X\