Yosue 24

1Yosue u Isireliban bwesenu kpuro mɛnna Sikɛmuɔ ma u ben guro gurobu soka ka ben wirugibu ka ben siri kowobu ka ben tabu sinambu. Ma ba ben tii tusia Gusunɔn wuswaaɔ. 2Ma Gusunɔ Isireliban Yinni u be kpuro sɔ̃ɔwa saa Yosuen nɔɔn di u nɛɛ, yellu, bɛɛn baababa ba wãa daa te ba mɔ̀ Efaratin guruɔ. Miya ba bũnu sãamɔ. Ben turowa Tera, Aburahamu ka Nakorin tundo. 3Ma na bɛɛn baaba Aburahamu yara saa daa ten bera giɔn di. Na dera u bɔsu Kananin tem kpuro sɔɔ ma na win bibu dabiasia. Na nùn Isaki kã. 4Ma na maa Isaki Yakɔbu ka Esau kã. Na Esau Seirin guuru gia wɛ̃ u n mɔ, adama Yakɔbu ka win bibu, be, ba dawa Egibiti gia. 5Na Mɔwisi ka Aroni gɔra Egibitigibun mi. Ma na Egibitigii be tɔ̃ya kua ka gãa maamaakigii ni na kua. Yen biru na bɛɛ Isireliba yara min di. 6Ye na bɛɛn baababa yara min di, ma Egibitigiba bu naa gira ka ben tabu kɛkɛba ka maasɔbu. Saa ye bɛɛn baaba be, ba tura nim wɔ̃kuɔ ge ba mɔ̀ Naa yari, 7miya ba man nɔɔgiru sue ma na yam wɔ̃kuru doke be ka Egibitigibun baa sɔɔ. Na dera nim wɔ̃kun nim mɛ, mu Egibitigii be wukiri ba nim diira. Bɛɛn baababa ba wa ka nɔni ye na Egibitigibu kua. Yen biru i wɔ̃ɔ dabinu kua gbaburɔ. 8Ma na ka bɛɛ na Amɔreban temɔ be ba wãa Yuudɛnin guru giɔ. Ba ka bɛɛ sanna, na maa bɛɛ bu nɔmu bɛria, ma ben tem mu kua bɛɛgim. Ma na bu kpeerasia bɛɛn wuswaaɔ. 9Balaki, Siporin bii, Mɔabun sunɔ, u seewa u ka bɛɛ tabu kua. U Balamu Beorin bii sokusia u na u bɛɛ bɔ̃rusi. 10Adama na yina n Balamun gere swaa daki ma na dera u bɛɛ domaru kua, ma na bɛɛ wɔra Balakin nɔman di. 11Yen biru i Yuudɛni tɔbura i tura Yerikoɔ, ma Yerikogibu ka Amɔreba ka Feresiba ka Kananiba ka Hɛtiba ka Girigasiba ka Hefiba ka Yebusiba ba bɛɛ sannɔ seesi. Ma na bɛɛ bu nɔmu bɛria. 12Na susu bakanu gɔra bɛɛn wuswaaɔ, nu bu gira nge mɛ nu Amɔreban sinambu yiru ye kua. N ǹ mɔ bɛɛn takobiba, ǹ kun mɛ bɛɛn tɛnnu i ka bu kamia. 13Na bɛɛ gbea wɛ̃ ye i ǹ kasire, ka wusu mi i wãa si i ǹ banɛ, ka dãa yèn binu i dimɔ ye i ǹ duure. 14Yen biru Yosue u nɛɛ, yen sɔ̃, i de i Yinni Gusunɔ nasia kpa i nùn sã ka gɔ̃ru teu ka bɔrɔkiniru. I bɛɛn baababan bũnu derio ni ba raa sãamɔ daa te ba mɔ̀ Efaratin guruɔ ka maa Egibitiɔ. 15Ì kun maa kĩ i Gusunɔ sã, i gɔsio gisɔ wi i ko i sã, ǹ n bũnun na, ni bɛsɛn baababa ba sãwa daa ten guruɔ, ǹ n maa Amɔrebaginun na, bèn temɔ i wãa mi. Adama nɛ ka nɛn yɛnugibu, Yinni Gusunɔwa sa ko sã. 16Ma tɔn be, ba nùn wisa ba nɛɛ, sa ǹ Yinni Gusunɔ derimɔ su bũnu sã pai! 17Domi wiya bɛsɛn Yinni wi u sun yarama saa Egibitigibun yorun di, bɛsɛ ka bɛsɛn baababa. U maa sɔm maamaakigii dabinu kua bɛsɛn nɔni biru. Ma u sun kɔ̃su baama mi sa da kpuro bɛsɛn sanum sɔɔ ka bwese tukunun suunu sɔɔ. 18Ma u sun bwese dabinu gira, ka mam Amɔreba be ba raa wãa tem mɛ sɔɔ. Yen sɔ̃na sa ko Yinni Gusunɔ sã. Domi u sãawa bɛsɛn Yinni ka gem. 19- 20Yosue u tɔn be sɔ̃ɔwa u nɛɛ, ya sɛ̃ i ka Yinni Gusunɔ sã domi u sãawa dɛɛro, u ǹ wuramɔ i maa goo sã. Yen sɔ̃, ì n nùn deri ma i bũnu sãwa, u ǹ bɛɛ bɛɛn durum suuru kuammɛ. Baa mɛ u bɛɛ gea kua kɔ, u koo gɔsirawa u bɛɛ kɔ̃sa kua kpa u bɛɛ kam koosia. 21Ma tɔn be, ba Yosue sɔ̃ɔwa ba nɛɛ, baa ǹ n mɛren na, Yinni Gusunɔwa sa ko sã. 22Yosue u bu sɔ̃ɔwa u nɛɛ, bɛɛ, i bɛɛn tii seeda diiya ma Yinni Gusunɔwa i gɔsa i sã. Ma ba nɛɛ, mɛya sa gerua. 23Ma u nɛɛ, ǹ n mɛn na, i bũnu wunɔ i kɔ̃ ni nu wãa bɛɛn suunu sɔɔ, kpa i tii Gusunɔ bɛsɛn Yinni wɛ̃. 24Ma tɔn be, ba Yosue sɔ̃ɔwa ba nɛɛ, Gusunɔ bɛsɛn Yinniwa sa ko sã, kpa su nùn mɛm nɔɔwa. 25Dɔma tera Yosue u ka tɔn be arukawani bɔkua u bu wooda wɛ̃ Sikɛmu mi. 26Yen biru u gari yi yorua Gusunɔn woodan tireru sɔɔ ma u kpee bakaru sua u gira dãa bakaru garun nuurɔ mi ba Yinni Gusunɔn kuu bekurugiru gire. 27Yosue u tɔn be kpuro sɔ̃ɔwa u nɛɛ, wee kpee teni ta ko n sãawa bɛsɛn seeda domi ta gari kpuro nua yi Yinni Gusunɔ u sun sɔ̃ɔwa. Ta koo bɛɛ yi yaayasia kpa i ku ra ka ko naanɛ sarirugibu Gusunɔn sãaru sɔɔ. 28Ma Yosue u tɔn be yarinasia u dera ben baawure u da win tem mɛ u mwa sɔɔ. 29Yeniba kpuron biru Yosue Nunin bii, Yinni Gusunɔn sɔm kowo u gu. U kuawa wɔ̃ɔ wunɔbu ka wɔkuru (110). 30Ba nùn sika win temɔ Tinnati Serakiɔ Efaraimun guunun bera gia, Gaasin guurun sɔ̃ɔ yɛ̃san nɔm geu gia. 31Isireliba ba Yinni Gusunɔ sãwawa Yosuen waati ye kpuro sɔɔ ka maa guro guro be u derin waati sɔɔ, be ba yɛ̃ ye Yinni Gusunɔ u be Isireliba kua gesi. 32Yosɛfun kuku ni Isireliba ba ka na Egibitin di, ba nu sika Sikɛmun tem mɛ sɔɔ, mɛ Yakɔbu u dwa Hamɔrin bii Sikɛmu ka win wɔnɔbun mi, ka sii geesun gobi wunɔbu (100). N deema tem mɛya ba Yosɛfun bibun bweseru wɛ̃. 33Ma Aronin bii Eleasaa u maa gu ma ba nùn sika gunguru wɔllɔ te ba win bii Finɛɛsi wɛ̃. Ta wãawa Efaraimun guunun bera gia.

will be added

X\