1 Yinni Gusunɔ u Isireliba wɔra ben yibɛrɛ be ba ka bu sikerenɛn nɔman di. Ma ba wãa bɔri yɛndu sɔɔ sere n ka tɛ. Yosue u maa tɔkɔ kua gem gem. 2 Yera u Isireliba kpuro sokusia ka ben guro gurobu ka ben wirugibu ka ben siri kowobu ka ben tabu sinambu. Ma u bu sɔ̃ɔwa u nɛɛ, nɛ wee na tɔkɔ kua gem gem. 3 I maa wa nge mɛ Gusunɔ bɛɛn Yinni u bwese ni i deema mini kua. Wiya u ka bu tabu kua bɛɛn sɔ̃ u bu kamia. 4 Yen biru i wa nge mɛ tem mɛ sa mwa ka mɛ sa ǹ mwaabu kpa, na mu bɔnu kua ka tɛtɛ, ma na bwese kɛra baayere yegim wɛ̃. Tem mɛya mu wãa saa Yuudɛnin di sɔ̃ɔ yari yeru gia n ka girari nim wɔ̃ku ge ba mɔ̀ Mɛditeranɛɔ, sɔ̃ɔ duu yeru gia. 5 Tɔn be ba wãa mɛ sɔɔ, Yinni Gusunɔ u koo bɛɛ bu gira kpa ben tem mɛ, mu ko bɛɛgim, nge mɛ win tii u gerua. 6 Yen sɔ̃, i tɛmanɔ, i hania koowo kpa i wa i wooda ye mɛm nɔɔwa ye Mɔwisi u yorua tireru sɔɔ kpa i ku yen gaa gɛɛrari baa fiiko. 7 I ku ka bwese tuku ni nu wãa bɛɛn suunu sɔɔ arukawani bɔke i suana. I ku yiira i nin bũnu sã. I ku maa ka nin yĩsa bɔ̃re. 8 Adama i n yɛ̃ ma Yinni Gusunɔ tɔnawa i ko n ka maninɛ nge mɛ i sãa sere ka gisɔ. 9 Domi u bwese damginu gira bɛɛn suunu sɔɔn di. Goo maa sari wi u kpĩa u yɔ̃ra bɛɛn wuswaaɔ sere ka gisɔ. 10 Bɛɛn tɔn turo u koo kpĩ u yibɛrɛ nɔrɔbu (1.000) go, nge mɛ Gusunɔn tii u nɔɔ mwɛɛru kua, yèn sɔ̃ u ra n wãa ka bɛɛ tabu sɔɔ. 11 Yen sɔ̃ i de i nùn kĩa. 12 Ì n nùn biru kisi i ka bwese ni nu wãa bɛɛn suunu sɔɔ nɔɔ tia kua, i nin wɔndiaba sua kurɔbu kpa nin tii nu bɛɛgibu sua kurɔbu, 13 saa ye sɔɔ, i n yɛ̃ ma u ǹ maa yibɛrɛ be giramɔ. U koo dewa ba n sãa bɛɛn yina. Ba ko n bɛɛ wahala mɔ̀ ba n nɔni sɔ̃ɔwa, kpa i gbisuku tem durom mɛni sɔɔ mɛ Gusunɔ bɛɛn Yinni u bɛɛ wɛ̃. 14 Ǹ n nɛn sɔ̃n na, wee na gɔɔ tura. I n yɛ̃ sãa sãa ma nɔɔ mwɛɛ gee ni u bɛɛ kua, u ni kpuro yibia mam mam. Baa nin teera kun kam kue. 15 Mɛya i n maa yɛ̃ nge mɛ u nɔɔ mwɛɛ gee ni yibia mi, mɛya u koo maa kɔ̃sa ye u gerua kpuro ko. U koo bɛɛ go mam mam tem durom mɛ sɔɔ mɛ u bɛɛ wɛ̃ mini. 16 Ì n win arukawani ye kusia ye u ka bɛɛ bɔkua kpa i da i n bwese tukunun bũnu yiirammɛ i n sãamɔ, saa yera win mɔru koo se kpa i gbisuku tem durom mɛni sɔɔ.
