Yosue 21

1Lefin bwese kɛran bukurobu ba na ba yãku kowo Eleasaa ka Yosue Nunin bii ka Isirelin bwese kɛri yi yi tien bukurobu deema 2Siloɔ Kananin temɔ. Ba nɛɛ, Yinni Gusunɔ u Mɔwisi wooda wɛ̃ u nɛɛ, u sun wusu wɛ̃ mi sa ko n wãa ka sere maa kpara yenu. 3Yera Isireliba ba wusu gasu gɔsa ben bwese kɛra baayeren tem sɔɔ ka kpara yenu ba Lefiba wɛ̃ nge mɛ Yinni Gusunɔ u Mɔwisi sɔ̃ɔwa. 4Ye ba wuu si bɔnu mɔ̀ ka tɛtɛ, Kehatin yɛnugibu be ba sãa Aroni yãku kowon bibu, beya ba gbia ba tɛtɛ di. Wusu wɔkura itawa ba wa Yudaban tem sɔɔ ka Simɛɔbagim sɔɔ ka Bɛnyamɛɛbagim sɔɔ. 5Ben be ba maa tie yɛnu ge sɔɔ, beya ba wusu wɔkuru tɛtɛ di si su wãa Efaraimuban tem sɔɔ ka Danubagim sɔɔ ka Manasen bwese kɛra ye ya wãa sɔ̃ɔ duu yeru gian tem sɔɔ. 6Gɛɛsɔnin yɛnugibu ba maa wusu wɔkura ita tɛtɛ di si su wãa Isakariban tem sɔɔ ka Asɛɛbagim sɔɔ, ka Nɛfitalibagim sɔɔ ka Manasebagim sɔɔ mɛ mu wãa Basaniɔ sɔ̃ɔ yari yerɔ. 7Mɛrarin yɛnugibu, be, ba maa wusu wɔkura yiru tɛtɛ di si su wãa Rubɛniban tem sɔɔ ka Gadibagim sɔɔ ka Sabulonibagim sɔɔ. 8Mɛya Isireliba ba kua ba ka Lefin bwese kɛra ye wuu si wɛ̃ ka sin kpara yenu nge mɛ Yinni Gusunɔ u Mɔwisi sɔ̃ɔwa. 9- 10Lefin tɔn be ba sãa Kehatin yɛnugibu Aronin bweseru sɔɔ, beya ba gbia ba tɛtɛ di. Wuu si ba wa Yudaban tem sɔɔ ka Simɛɔbagim sɔɔ, si wee. 11Ba bu Ariban wuu wɛ̃ ge ba ra maa soku Heboroni ka gen kpara yenu. Anakiban sikado Ariban yĩsira ba ka gu sokumɔ. Ga wãawa Yudan guunun bera gia. 12Gen gberu kpaanɛbara ba raa Kalɛbu Yɛfunɛn bii wɛ̃. 13Heboroni yen biru, ba maa bu Libina wɛ̃, 14ka Yatiri ka Ɛsitemɔa, 15ka Holoni, ka Debiri, 16ka Aini, ka Yuta, ka Bɛti Semɛsi. Si kpuro su sãawa wusu nɔɔba nnɛ, gen baagere ka gen kpara yenu. Yudaba ka Simɛɔban tem sɔɔra si kpuro su wãa. 17Bɛnyamɛɛban tem sɔɔ, ba Gabaoni tɛtɛ di ka Geba, 18ka Anatɔtu ka Alimɔɔ. Wusu nnɛwa mi, gen baagere ka gen kpara yenu. 19Wuu si kpuro, si ba yãku kowo Aronin bweseru wɛ̃ su sãawa wɔkura ita, gen baagere ka gen kpara yenu. 20Kehatin yɛnugii be ba tie Aronin bwese te sɔɔ, ba maa wusu wa Efaraimuban tem sɔɔ. 21Siya Sikɛmu ye ya wãa Efaraimun guunun bera gia mi ba ko n da kpikiru de, ka Gesɛɛ, 22ka Kibisaimu ka Bɛti Horoni. Si kpuro su sãawa wusu nnɛ, gen baagere ka gen kpara yenu. 23Danuban tem sɔɔ, ba bu Ɛliteke wɛ̃ ka Gibetoni, 24ka Ayaloni ka Gati Rimɔɔ. Si kpuro su sãawa wusu nnɛ, gen baagere ka gen kpara yenu. 25Manasen bwese kɛra ye ya wãa sɔ̃ɔ duu yeru gian temɔ be, ba maa bu wusu yiru wɛ̃, Tanaki ka Gati Rimɔɔ, gen baagere ka gen kpara yenu. 26Wuu si ba bu wɛ̃ mi kpuro su sãawa wɔkuru, gen baagere ka gen kpara yenu. 27Lefi be ba tie ba sãa Gɛɛsɔnin yɛnugibu, ba maa wusu yiru wa Manasen bwese kɛra ye ya wãa sɔ̃ɔ yari yeru gian temɔ. Wuu siya Golani, Basanin temɔ mi ba ko n da kpikiru de ka Bɛsitara, gen baagere ka gen kpara yenu. 28Isakariban tem sɔɔ, ba bu Kisioni wɛ̃ ka Dabarati, 29ka Yaamuti, ka Eni Ganimu. Si kpuro su kuawa wusu nnɛ, gen baagere ka gen kpara yenu. 30Asɛɛban tem sɔɔ, ba bu Mikali ka Abudoni ka Hɛlikati 31ka Rehɔbu wɛ̃. Si kpuro su kuawa wusu nnɛ, gen baagere ka gen kpara yenu. 32Nɛfitalibagim sɔɔ maa, ba bu Kedɛsi wɛ̃ ye ya wãa Galilen temɔ, mi ba ko n da kpikiru de, ka Hamɔti Dori, ka Kaatani. Siya su kua wusu ita, gen baagere ka gen kpara yenu. 33Wuu si Gɛɛsɔni be, ba tɛtɛ di mi, su sãawa wɔkura ita, gen baagere ka gen kpara yenu. 34Be ba sãa Mɛrariba Lefin bwese te sɔɔ, ba maa bu wusu nnɛ wɛ̃, gen baagere ka gen kpara yenu Sabuloniban tem sɔɔ. Wuu siya Yokunɛamu ka Kaata 35ka Dimma ka Nahalali. 36Rubɛniban tem sɔɔ ba bu wusu nnɛ wɛ̃, gen baagere ka gen kpara yenu. Siya Besɛɛ ka Yasa, 37ka Kedemɔti ka Mɛfati. 38- 39Gadiban tem sɔɔ, Mɛrari be, ba maa wusu nnɛ wa, gen baagere ka gen kpara yenu. Wuu siya Mahanaimu ka Hɛsiboni ka Yesɛɛ ka Ramɔti ye ya wãa Galadin temɔ, mi ba ko n da kpikiru de. 40Wuu si Mɛrari be, ba tɛtɛ di, si kpuro su sãawa wɔkura yiru. 41- 42Wuu si Lefin bwese kɛri yi wa Isirelin bwese kɛri yi yi tien mi, su kuawa weeraakuru yiru sari, gen baagere ka gen kpara yenu. 43Nge mɛsuma Yinni Gusunɔ u ka Isireliba tem mɛ kpuro wɛ̃ nge mɛ u ben sikadoba nɔɔ mwɛɛru kua. Ma ba sina mɛ sɔɔ, mu kua begim. 44Mɛya u maa dera ba wãa bɔri yɛndu sɔɔ, nge mɛ u raa ben sikadoba nɔɔ mwɛɛru kua. U bu ben yibɛrɛba kpuro nɔmu bɛria. Ben goo sari wi u ka tii yina. 45Nge mɛya Yinni Gusunɔ u ka win nɔɔ mwɛɛ ni kpuro yibia ni u Isireliba kua, baa nin teeru ta ǹ kam wɔra.

will be added

X\