Yosue 18

1Sanam mɛ Isireliba ba Kananiba kamia, yera ba mɛnna Siloɔ. Ma ba kuu bekurugii te gira tèn mi ba ra Yinni Gusunɔ sã. 2N deema Isireliban bwese kɛra nɔɔba yiruwa ya ǹ gina tem wa. 3Ma Yosue u bu sɔ̃ɔwa u nɛɛ, saa yerà i mara i sere da i tem mɛ mwa mɛ Gusunɔ bɛɛn baababan Yinni u bɛɛ wɛ̃. 4Yen sɔ̃, bwese kɛra baayere sɔɔ, i tɔmbu ita ita gɔsio n bu gɔri bu tem mɛ mɛɛrim da, kpa bu wa nge mɛ ba koo mu burana burana kpa bu wurama bu man sɔ̃ nge mɛ n sãa. 5Ba koo mu bɔnu kowa wasi nɔɔba yiru. Adama Yudaba ba ko n wãawa mi ba wãa mi, sɔ̃ɔ yɛ̃san nɔm dwaru gia, Yosɛfun bwese kɛri maa sɔ̃ɔ yɛ̃san nɔm geu gia. 6Ǹ n mɛn na, i doo tɛ̃, i tem mɛ bɔnu ko wasi nɔɔba yiru ye, kpa i na i man sɔ̃. Kpa su mu tɛtɛ toosi Gusunɔ bɛsɛn Yinnin wuswaaɔ su ka wa mɛ mu sãa bɛɛn baawuregim. 7Adama Lefiba ba ǹ ko ba n tem mɔ. Domi ba kon sãa Yinni Gusunɔn yãku kowobu. N deema Gadi ka Rubɛnin bwese kɛri ka Manasen bwese kɛran sukum ba tem wa kɔ Yuudɛnin sɔ̃ɔ yari yeru gia mɛ Mɔwisi, Yinni Gusunɔn sɔm kowo u bu bɔnu kua. 8Yen biru tɔn be, ba da ba tem mɛ bukiana ba kua ye Yosue u bu sɔ̃ɔwa. 9Ma ba ye kpuro yorua ye ba wa mi, ka nge mɛ ba tem mɛ ka mɛn wusu burana burana ma ba wurama Yosuen mi Siloɔ. 10Yen biru Yosue u bu tem mɛ bɔnu kua ka tɛtɛ Yinni Gusunɔn wuswaaɔ, u bwese kɛra baayere yen tem wɛ̃. 11Tem mɛ ba gbia ba tɛtɛ toosi, Bɛnyamɛɛn bwese kɛra ya mu di. Ben tem mɛ, mu wãawa Yudan bwese kɛragim ka Yosɛfun bwese kɛrigim baa sɔɔ. 12Sɔ̃ɔ yɛ̃san nɔm geu gia, tem mɛn nɔɔ bura yeru ta wãawa saa Yuudɛnin di n ka girari Yerikon sɔ̃ɔ yɛ̃san nɔm geu gia, ma ta da guunun bera gia sɔ̃ɔ duu yerɔ sere Bɛti Afɛniɔ mi gãanu ku ra kpi. 13Saa min diya ta da ta yɔ̃ra Lusiɔ ye ba ra maa soku Betɛli, sɔ̃ɔ yɛ̃san nɔm dwaru gia. Min diya ta maa da ta girari Atarɔtu Adariɔ. Ma ta guu te bɛwa te ta wãa Bɛti Horonin sɔ̃ɔ yɛ̃san nɔm dwarɔ. Bɛti Horoni ye, ya wãawa wɔwa sɔɔ. 14Sɔ̃ɔ duu yeru gia maa, ta dawa sɔ̃ɔ yɛ̃san nɔm dwaru gia saa guu ten di n ka girari Baalin wuuɔ ge ba maa sokumɔ Yarimun wuu. Wuu ge, ga sãawa Yudaban wuu. 15Sɔ̃ɔ yɛ̃san nɔm dwaru gia maa, ta dawa sɔ̃ɔ duu yeru gia saa Yarimun wuun di sere Nɛfitoan bwiiyɔ. 16Saa maa min di, ta dawa guu te ta wãa Bɛni Hinɔmun wɔwan deedeeru, Refaban wɔwan sɔ̃ɔ yɛ̃san nɔm geu gia. Ma ta da Yebusiban guunun sɔ̃ɔ yɛ̃san nɔm dwaru gia n ka girari Eni Rogɛliɔ. 17Saa maa min di, ta dawa Eni Semɛsiɔ sɔ̃ɔ yɛ̃san nɔm geu gia ka Gelilɔtuɔ, gunguu te ba mɔ̀ Adumimun deedeeru. Min di ta maa da sere Bohanin kperɔ. Rubɛnin biin yĩsira ba ka kpee te sokumɔ. 18Ma ta da Yuudɛnin wɔwaɔ guunun sɔ̃ɔ yɛ̃san nɔm geu gia 19sere ka Bɛti Hogulaɔ sɔ̃ɔ yɛ̃san nɔm geu gia mi Yuudɛnin daara suremɔ nim wɔ̃ku bɔruguuɔ, sɔ̃ɔ yɛ̃san nɔm dwarɔ. 20Yuudɛnin daara ta sãa tem mɛn nɔɔ bura yeru sɔ̃ɔ yari yeru gia. Mɛn nɔra Bɛnyamɛɛn bwese kɛran tem mu yasum nɛ. 21Wuu si su wãa tem mɛ sɔɔ, siya Yeriko ka Bɛti Hogula ka Emɛki Kesisi, 22ka Bɛti Araba ka Semaraimu ka Betɛli, 23ka Afimu, ka Para, ka Ofara, 24ka Kefaa Amɔnai, ka Ofini, ka Geba. Wuu si kpuro su sãawa wɔkura yiru, gen baagere ka gen baru kpaanu. 25Sin gasa, Gabaoni, ka Rama ka Berɔtu, 26ka Misipe, ka Kefira, ka Mɔsa, 27ka Rekɛmu ka Yiipɛɛli, ka Tareala, 28ka Sela, ka Elɛfu, ka Yebusi ye ba maa mɔ̀ Yerusalɛmu, ka Gibea ka Kiriati. Si kpuro su sãawa wusu wɔkura nnɛ, gen baagere ka gen baru kpaanu. Yeni kpurowa n kua Bɛnyamɛɛn bwese kɛran tubi.

will be added

X\