Yosue 17

1Yosɛfun bii gbiikoo Manase, wigibu ba maa ben tem bɔnu wa. N deema ba raa Makiri, Manasen bii gbiikoon bwese kɛra ben tem wɛ̃ kɔ. Makiri wi, u sãawa tabu durɔ, wiya maa sãa Galadin tundo. Tem mɛ ba wa mi, mɛya Galadi ka Basani Yuudɛnin sɔ̃ɔ yari yeru gia. 2Manasen bibun bweserun kɛri yi yi tie ba maa bu tem gam wɛ̃ Yuudɛnin sɔ̃ɔ duu yeru gia. Bera Abiesɛɛba ka Helɛkiba ka Asiriɛliba ka Sikɛmuba ka Hefɛɛba ka Semidaba. Be kpurowa ba sãa Yosɛfun sikadominu. 3Galadi, Makirin bii, Manasen debubu u Efɛɛ mara. Efɛɛ wi, u Selofadi mara. Selofadi wi, u ǹ bii tɔn durɔ mara, sere tɔn kurɔbu tɔna. Bii ben yĩsa wee. Mala ka Nɔa ka Hogula ka Milika ka Tirisa. 4Beya ba da ba yãku kowo Eleasaa deema ka Yosue Nunin bii, ka Isireliban guro gurobu ba nɛɛ, Yinni Gusunɔ u Mɔwisi sɔ̃ɔwa bu maa sun tem wɛ̃ bɛsɛgibun suunu sɔɔ. Ma ba bu tem mɛ wɛ̃ n kua ben tubi. 5Yeya n dera Manase be, ba ka tem mɛn suba wɔkuru wa, Galadi ka Basani baasi. 6N ǹ mɔ tɔn durɔbu tɔnawa ba tem mɛ bɔnu kua, ka tɔn kurɔba be ba wãa bwese te sɔɔ. Ma Manasen bwese kɛran sukum mu sina Galadiɔ. 7Be ba wãa sɔ̃ɔ duu yeru gia, ben tem nɔɔ bura yeru ta wãawa saa Asɛɛn di sere Mikimɛtatiɔ Sikɛmun bɔkuɔ, ka Yaminiɔ n ka girari Eni Tapuagibun bera gia. 8Bera ye, ya sãawa Manaseban tem. Adama Tapua ye ya wãa ben tem nɔɔ bura yeru mi, ya sãawa Efaraimuban wuu. 9Nɔɔ bura yee te, ta maa dawa sere Kanan daarun sɔ̃ɔ yɛ̃san nɔm dwaru gia. Wuu si su wãa mi, su sãa Efaraimubagisu baa mɛ su ka wãa Manaseban temɔ. Ma ta da daa ten sɔ̃ɔ yɛ̃san nɔm geu gia n ka girari nim wɔ̃ku ge ba mɔ̀ Mɛditeranɛɔ. 10Nge mɛya ba tem mɛ bɔnu kua. Ma Efaraimun bwese kɛra ya wãa sɔ̃ɔ yɛ̃san nɔm dwaru gia. Manasegia maa wãa sɔ̃ɔ yɛ̃san nɔm geu gia. Nim wɔ̃ku ge ba mɔ̀ Mɛditeranɛ, gera ga sãa tem yiru ye kpuron nɔɔ bura yeru sɔ̃ɔ duu yeru gia. Ma Asɛɛban tem ka Isakariban tem mu maa sãa ben nɔɔ bura yeru sɔ̃ɔ yɛ̃san nɔm geu gia. Asɛɛban tem mu wãawa sɔ̃ɔ duu yeru gia, ma Isakarigibun tem maa wãa sɔ̃ɔ yari yeru gia. 11Yera ba Manaseba wusu gasu wɛ̃ si su wãa Isakariban tem sɔɔ, ka Asɛɛbagim sɔɔ. Wuu siya Bɛti Seani, ka Yibileamu, gen baagere ka gen baru kpaanu, ka sere maa Dori ka Eni Dori, ka Tanaki, ka Mɛgido, gen baagere ka gen baru kpaanu. 12Adama Manaseba ba kpana bu Kananiba gira wuu sin min di, ma ba dera ba wãa ka be sannu. 13Baa sanam mɛ Isireliba ba dam kua, ba ǹ kpĩa bu Kanani be kpuro gira, adama sɔm sɛ̃sɔgina ba bu koosia. 14Yera Efaraimun bwese kɛra ka Manasen bwese kɛran sukum ba Yosue bikia ba nɛɛ, mban sɔ̃na a sun tem bɛsi tia tɔna wɛ̃, bɛsɛ be Yinni Gusunɔ u domaru kua sa dabia. 15Ma Yosue u bu wisa u nɛɛ, ì n dabin na, ma Efaraimun guurun bera ya bɛɛ basa, i doo dãa sɔ̃ɔ mi Feresiba ka Refaba ba wãa i tii ayeru kasua. 16Ma tɔn be, ba nùn wisa ba nɛɛ, geema, guurun bera mi gian tem kun sun turi. Yen biru Kanani be ba wãa wɔwaɔ ba tabu kɛkɛ sisugii yi dumi gawe mɔ. Mɛya maa be ba wãa Bɛti Seaniɔ ka yen baru kpaanɔ, ka sere maa be ba wãa Yisirɛɛlin wɔwaɔ. 17Ma Yosue u Efaraimun bwese kɛra ye ka Manasen bwese kɛran sukum mɛ sɔ̃ɔwa u nɛɛ, i dabi, i maa dam mɔ. Yen sɔ̃, n ǹ tem bɛsi tia tɔna mu ko n sãa bɛɛgim. 18Bera mi dãa sɔ̃ɔ ga wãa mi, yera ya ko n maa sãa bɛɛgia. I ko yen dãa ye bɔɔri kpa i Kanani be kamia baa mɛ ba dam mɔ ba tabu kɛkɛ sisugii yi mɔ, kpa tem mɛ, mu ko bɛɛgim.

will be added

X\