Yosue 16

1Tem mɛ ba Yosɛfun bibun bweseru wɛ̃, mɛn nɔɔ bura yeru ta wãawa saa Yuudɛnin di, Yerikon bɔkuɔ, n ka da bwiiyɔ yi yi wãa Yerikon sɔ̃ɔ yari yeru gia gbaburɔ, n ka girari Betɛliɔ mi guunu wãa. 2Saa maa min di, ta da Lusiɔ ka Atarɔtuɔ, Aakiban tem nɔɔ bura yerɔ. 3Ma ta da sɔ̃ɔ duu yeru gia mi Yafilɛtiban tem mu nɔɔ yɔ̃ra. Ma ta maa da Bɛti Horoniɔ ka Gesɛɛɔ n ka girari nim wɔ̃ku ge ba mɔ̀ Mɛditeranɛɔ. 4Tem mɛya mu kua Yosɛfun bibu Manase ka Efaraimun bweserun tubi. 5Efaraimuba ba mɛn sukum sua mɛ̀n nɔɔ bura yeru ta wãa saa Atarɔtu Adarin di sɔ̃ɔ yari yerɔ sere n ka girari Bɛti Horoniɔ ye ya wãa gunguru wɔllɔ. 6Min diya ta da nim wɔ̃ku ge ba mɔ̀ Mɛditeranɛɔ. Sɔ̃ɔ yɛ̃san nɔm geu gia ta da Mikimɛtatin di sere Taanati Siloɔ sɔ̃ɔ yari yeru gia, n ka girari Yanɔaɔ. 7Saa Yanɔan di ta da Atarɔtuɔ ka Naarataɔ ka Yerikoɔ n ka girari Yuudɛniɔ. 8Sɔ̃ɔ duu yeru gia maa, ta da saa Tapuan di n ka da Kanan daarɔ, n ka girari nim wɔ̃ku ge ba mɔ̀ Mɛditeranɛɔ. Mɛni kpurowa ba Efaraimun bwese kɛra wɛ̃. 9Ma ba maa Manasen tem wusu gasu ka sin baru kpaanu sua ba bu sosia. 10Efaraimuba ba ǹ Kananiba gire be ba wãa Gesɛɛɔ. Ba bu deriwa ben suunu sɔɔ ba yoo sɔma koosiamɔ sere ka gisɔn gisɔ.

will be added

X\