Yosue 14

1Yãku kowo Eleasaa ka Yosue, Nunin bii, ka Isireliban bwese kɛra baayeren guro gurobu bera ba Isireliba tem bɔnu kua. Wee nge mɛ ba mu bɔnu koosina. 2Bwese kɛra nɔɔba nnɛ ka Manasen bwese kɛran sukum ye ya tie ye ya ǹ daa tem wa, yera ba tem mɛ bɔnu kua. Tɛtɛwa ba ka mu bɔnu kua nge mɛ Yinni Gusunɔ u Mɔwisi sɔ̃ɔwa bu ko. 3N deema Mɔwisi u raa Isireliban bwese kɛra yiru ka Manasen bwese kɛran sukum tem wɛ̃ Yuudɛnin sɔ̃ɔ yari yeru gia. Adama u ǹ Lefiba tem gam wɛ̃, 4ma n kun mɔ wusu gasu ka sin kpara yenu. Manase ka Efaraimu ba sãawa Yosɛfun bibu. Bera ba kua bwese kɛra yiru. 5Isireliba ba tem mɛ bɔnu kuawa nge mɛ Yinni Gusunɔ u Mɔwisi sɔ̃ɔwa. 6Sɔ̃ɔ teeru Yudan bibu ba Yosue deema Giligaliɔ. Ma Kalɛbu, Yɛfunɛ Kenisin bii, u Yosue sɔ̃ɔwa u nɛɛ, wunɛn tii a yaaye ye Yinni Gusunɔ u win sɔm kowo Mɔwisi sɔ̃ɔwa nɛ ka wunɛn sɔ̃ Kadɛsi Baanɛaɔ. 7Nɛ Kalɛbu, wɔ̃ɔ weeruwa na mɔ sanam mɛ Mɔwisi Gusunɔn sɔm kowo u man gɔra Kadɛsi Baanɛan di n na n tem mɛ bɔsu bɔsu n mɛn saria mɛɛri. Na na na bɔsu na mɛɛra. Ma na wura na nùn sɔ̃ɔwa mam mam ye na wa. 8Adama be ba man yɔ̃sirima na ka tem mɛ mɛɛrim na mi, ba dera tɔmba tem mɛ bwɛ̃ra yara. Adama nɛ, na Gusunɔn gere mɛm nɔɔwawa mam mam. 9Yen dɔma tera Mɔwisi u bɔ̃rua u nɛɛ, bera mi nɛn tii na mɛɛrim da mi, ya koo ko nɛ ka nɛn bibun bweserugia sere ka baadommaɔ yèn sɔ̃ na Gusunɔn gere mɛm nɔɔwa mam mam. 10Yen wɔ̃ɔ weeru ka nɔɔbuwa mini ye Yinni Gusunɔ u ka Mɔwisi gari yi sɔ̃ɔwa saa ye bɛsɛ Isireliba sa wãa gbaburɔ. Saa maa dɔma ten diya Yinni Gusunɔ u man kɔ̃su nge mɛ u nɔɔ mwɛɛru kua sere na ka gisɔ wɔ̃ɔ wɛnɛ ka nɔɔbu tura. 11Ka mɛ, na dam mɔ sere ka gisɔ n ka tabu da, ǹ kun mɛ n ka sɔmburu garu ko, nge mɛ na raa mɔ sanam mɛ Mɔwisi u man gɔrima n tem mɛn saria mɛɛri. 12Yen sɔ̃ tɛ̃, a man guunun bera gia wɛ̃ɛyɔ mi Yinni Gusunɔ u man nɔɔ mwɛɛru kua. Na nùn sɔ̃ɔwa ma Anakin bwesera ta wãa bera mi. Ba ben wusu gbãranu toosiwa mam mam. Yen sɔ̃, Gusunɔ ù n ka man wãa, kon tem mɛ mwa nge mɛ win tii u gerua. 13- 14Yosue u Kalɛbu Yɛfunɛ Kenisin bii domaru kua. Ma u nùn Heboronin bera wɛ̃. Yera ya kua wigia yèn sɔ̃ u Gusunɔ ben Yinnin gere mɛm nɔɔwa mam mam. 15Heboroni yera ba ra raa soku Ariban wuu. Ariba wi, u yĩsiru yara Anakin bweseru sɔɔ. Yeniba kpuron biruwa Isireliba ba wɛ̃ra ba ǹ maa tabu kue.

will be added

X\