Yosue 10

1Adoni Sedɛki, Yerusalɛmun sunɔ u nua ma Yosue u Ayi kamia u ye kpeerasia u yen sunɔ go, nge mɛ u raa Yeriko ka yen sunɔ kua. U maa nua ma Gabaonigibu ba ka Isireliba arukawani bɔkua, ba wãa ben suunu sɔɔ. 2Yeniba kpuron sɔ̃ u nanda gem gem, domi Gabaoni wuu bɔkɔwa nge sìn mi tem yɛ̃robu ba ra n wãa. Ga maa Ayi kere. Yen biru gen tɔmbu kpuro tabu durɔ wɔrugɔbara. 3Yen sɔ̃na Adoni Sedɛki, Yerusalɛmun sunɔ wi, u sinam beni gɔria. Beya Hohamu Heboronin sunɔ, ka Pireamu Yaamutin sunɔ, ka Yafia Lakisin sunɔ ka Debiri Egolonin sunɔ. 4U nɛɛ, bu na win mi, kpa bu nùn somi bu ka Gabaoni wɔri yèn sɔ̃ yen tɔmbu ba ka Yosue ka Isireliba arukawani bɔkua. 5Nge mɛya Amɔreban sinambu nɔɔbu be, ba mɛnna ba ka ben tabu kowobu kpuro da ba ben sansani gira Gabaonin bɔkuɔ. Ma ba ye wɔri. 6Ma Gabaonigibu ba Yosue sɔmɔ gɔria win sansaniɔ Giligaliɔ ba nɛɛ, a ku wunɛn nɔma wuna bɛsɛ wunɛn bwãabun min di. A na fuuku a sun faaba ko, a sun somi. Domi Amɔreban sinambu kpuro be ba wãa guunun bera gia, ba mɛnna ba sun wɔrima. 7Ma Yosue u seewa saa Giligali min di, ka win tabu kowobu kpuro bè sɔɔ tabu durɔ wɔrugɔba ba wãa. 8Yinni Gusunɔ u nùn sɔ̃ɔwa u nɛɛ, a ku bu nasia domi na nun bu nɔmu bɛria. Ben goo sari wi u koo yɔ̃ra wunɛn wuswaaɔ. 9Yosue ka win tɔmbu ba sanum so wɔ̃ku giriru. Ma ba Amɔreba wɔri suaru sɔɔ. 10Yera Yinni Gusunɔ u dera Amɔre be, ba burisina Isireliban wuswaaɔ. Ma Isireliba ba bu go go gem ka tia Gabaonin bɔkuɔ. Ba ben gabu naa swĩi ba go Bɛti Horonin swaaɔ sere ba ka tura Asekaɔ ka Makedaɔ. 11Sanam mɛ ba Isireliba duki suurimɔ Bɛti Horonin swaaɔ, ye ya saramɔ guurun di, miya Yinni Gusunɔ u dera guru kpee bakanu nu bu wɔrikimɔ wɔllun di nu goomɔ, sere ba ka tura Asekaɔ. Be guru kpee ni, nu go, ba dabi ba kere be Isireliba ba go. 12Dɔma te Yinni Gusunɔ u Isireliba Amɔreba nɔmu bɛria, Yosue u nùn kana Isireliban nɔni biru u nɛɛ, a de sɔ̃ɔ u yɔ̃ra sau Gabaonin deedeeru kpa suru u maa yɔ̃ra Ayalonin wɔwan deedeeru. 13Ma sɔ̃ɔ u yɔ̃ra sɛ̃ɛ, mɛya maa suru u yɔ̃ra sere ba ka ben yibɛrɛ be kpuro kamia. Gari yi, yi yorua Yasarin tirerɔ, yi nɛɛ, sɔ̃ɔ u yɔ̃ra wɔllun suunu suunukaɔ. U ǹ ka dubu sɛnde nge sɔ̃ɔ teerun saka. 14Tɔ̃ru gara kun maa naare nge te, tè sɔɔ Yinni Gusunɔ u tɔnun gere wura mɛ, dɔma te u Isireliba sanna mi. 15Yen biru Yosue u gɔsira u da win sansaniɔ Giligaliɔ, wi ka Isireliba kpuro. 16Saa ye sɔɔ, sinambu nɔɔbu be, ba kpikiru sua ba da ba kukua kpee wɔruɔ Makedaɔ. 17Yera goo u na u Yosue sɔ̃ɔwa ma sinam be, ba wãa kpee wɔru gen mi. 18Ma Yosue u nɛɛ, i ge kɛnuɔ ka kpee bakanu kpa i kɔ̃sobu yi mi. 19Adama i ku tɛ mi, i yibɛrɛ be ba tie naa swĩiyɔ kpa i ku de bu du ben wusɔ, domi Gusunɔ bɛsɛn Yinniwa u sun bu nɔmu bɛria. 20Yosue ka Isireliba ba Amɔreba kpuro kamia, ma n kun mɔ be ba kpĩa ba duki sua ba kukua wuu si su gbãraru mɔ sɔɔ. 21Ma Yosuen tɔmbu ba wurama ka bɔri yɛndu win mi Makedaɔ. Tem mɛ sɔɔ, goo kun maa kãka u ben kɔ̃sa gere. 22Yen biruwa Yosue u nɛɛ, i man kpee wɔru ge wukio kpa i man sinambu nɔɔbu ye yarama. 23Ba bu yarama ba ka da Yosuen mi. Ba sãawa wuu sinin sinambu, Yerusalɛmu ka Heboroni ka Yaamuti ka Lakisi ka Egoloni. 24Ye ba ka sinam be kpuro na Yosuen mi, yera u Isireliba kpuro sokusia u nɛɛ, be ba sãa tabu kowobun wirugibu ba ka taa bi kua, bu na bu sinam ben wĩinu ka naasu taare. Ma ba kua nge mɛ u gerua. 25Yosue u maa bu sɔ̃ɔwa u nɛɛ, i ku bɛrum ko, i de i n wɔrugɔru mɔ kpa i ku mwia kpana. Nge mɛsuma Yinni Gusunɔ u ko n da bɛsɛn yibɛrɛba kpuro kue. 26Ye u gari yi gerua u kpa, ma u sinam be go u ben gonu bwɛ̃ dãnu nɔɔbu sɔɔ. U nu deri mi sere n ka kua yoka. 27Yoka yera u wooda wɛ̃ u nɛɛ, bu goo ni sarasio kpa bu nu kpɛ̃ɛ kpee wɔru ge sɔɔ. Yen biru ba kpee bakanu sua ba ka wɔru gen nɔɔ kɔrua. Kpee ni, nu wãa mi, sere ka gisɔn gisɔ. 28Yen tɔ̃ɔ tera Yosue u wuu ge ba mɔ̀ Makeda wɔri u mwa. U gen sunɔ go ka tɔn be ba wãa mi kpuro. Baa tɔn turo u ǹ deri. U Makedan sunɔ wi kuawa nge mɛ u Yerikogii kua. 29Yen biru saa Makedan di, Yosue ka win tɔn be, ba da ba Libina wɔri. 30Ma Yinni Gusunɔ u bu wuu ge nɔmu bɛria. Ba gen tɔmbu go kpuro. Baa tɔn turo, ba ǹ deri. Ma ba gen sunɔ kua nge mɛ ba Yerikogii kua. 31Saa Libinan di Yosue ka win tɔmbu ba maa da ba Lakisi tarusi ba ye wɔri. 32Ma Yinni Gusunɔ u bu wuu ge nɔmu bɛria. Ye ba gu wɔri mɛ, yen sɔ̃ɔ yirusera ba gu kamia ba gen tɔmbu kpuro go. Baa tɔn turo, ba ǹ deri, nge mɛ ba kua Libinaɔ. 33N deema Horamu Gesɛɛn sunɔ ka win tabu kowobu ba wãa mi, ba Lakisigibu somimɔ. Adama Yosue u be kpuro kamia u bu go, u ǹ ben goo deri. 34Saa Lakisin min diya Yosue ka win tɔn be, ba maa da Egoloniɔ ba ye tarusi ba wɔri. 35Yen dɔma tera ba wuu ge kamia, ma ba gen tɔmbu go nge mɛ ba kua Lakisiɔ. 36Egoloni min diya ba maa da ba Heboroni wɔri. 37Ma ba wuu gen tɔmbu mwɛɛra ba go go, ka gen sunɔn tii, ka sere maa gen baru kpaanugibu kpuro. Baa tɔn turo, ba ǹ deri, ba bu gowa nge mɛ ba kua Egoloniɔ. 38Yen biru ba maa gɔsira ba da Debiriɔ. Ma ba ye wɔri 39ba kamia ba yen tɔmbu ka yen sunɔ ka yen baru kpaanugibu kpuro mwɛɛra ba go. Baa tɔn turo, ba ǹ deri. Yosue u dera ba tɔn be kpuro gowa nge mɛ u Heboronigibu ka Libinagibu ka ben sinambu kua. 40U bera min tɔmbu gowa ka min sinambu wuu si su wãa guunun bera gia ka si su wãa sɔ̃ɔ yɛ̃san nɔm dwarɔ ka si su wãa wɔwaɔ ye ya wãa nim wɔ̃kun bera gia, ka sere maa si su wãa gungunɔ. Baa tɔn turo u ǹ deri. U bu gowa nge mɛ Gusunɔ, Isireliban Yinni u nùn sɔ̃ɔwa u ko. 41Ma Yosue u maa wusu kpuro wɔri saa Kadɛsi Baanɛa ka Gasan di si su wãa sɔ̃ɔ yɛ̃san nɔm dwaru gia n ka girari Gosɛnin bera gia Yudan temɔ sere n ka da Gabaoniɔ sɔ̃ɔ yɛ̃san nɔm geu gia. 42U wuu si su wãa mi kpuro mwɛɛra u sin sinambu kamia. Domi Gusunɔ Isireliban Yinniwa u bu sannammɛ. 43Yeniba kpuron biru Yosue ka win tɔmbu ba gɔsirama ben sansaniɔ Giligaliɔ.

will be added

X\