Yonasi 1

1Sɔ̃ɔ teeru, Yinni Gusunɔ u Yonasi, Amitain bii sɔ̃ɔwa u nɛɛ, 2Yonasi, a seewo a da Ninifu wuu maro bɔkɔ gen mi. Kpa a nɔɔgiru sua a bu gerusi. Domi ben nuku kɔ̃suru ta banda sere ta man girari. 3Adama Yonasi u seewa u duka sua u Taasisin swaa wɔri, u wa u ka Yinni Gusunɔ tonda. Ma u da Yafoɔ u goo nimkuu dua. Ma u yen daabun gobi kɔsia. Nge mɛya u ka Taasisin swaa wɔri wi ka tɔn be ba dɔɔ Taasisi mi sannu u wa u ka Yinni Gusunɔ tonda. 4Adama Yinni Gusunɔ u dera woo bɔkɔ ga seewa nim wɔ̃ku gen mi. Ma n sãare goo ge, ga koo nim diira. 5Be ba goo ge tɛmamɔ, ba bɛrum soora. Ma ben baawure u win bũu soku. Ma ba goo gen sɔmunu kawa ba sure nim wɔ̃kuɔ gen bunum mu ka kaara. Adama Yonasi u da u kpĩ u dò mam mam sere goo gen sɔɔwɔ. 6Ma goo gen tɛmɔ tɔnwero u susi u Yonasi yamia u nùn bikia u nɛɛ, mban sɔ̃na a dò. A seewo a wunɛn bũu soku. Sɔrɔkudo u koo sun yaaya kpa sa kun kam kue. 7Ma ba geruna ba nɛɛ, i na su tubu tubu ko kpa su ka gia wìn sɔ̃ kɔ̃sa yeni ya sun deema. Yera ba tubu tubu ye kua. Ma ya Yonasi di. 8Yera ba nùn bikia ba nɛɛ, a sun sɔ̃ɔwɔ wi u sun kɔ̃sa yeni kparemɔ. Man diya a wee. Amɔna wunɛn yĩsiru. Bwese terà a sãa. Sɔmbu teren sɔ̃na a wãa mini. 9Ma Yonasi u bu wisa u nɛɛ, na sãawa Heberu. Yinni Gusunɔwa na ra sã wi u wɔllu ka tem ka nim wɔ̃ku taka kua. 10- 11Yera tɔn be, ba nanda ye ba gia ma Yonasi u Yinni Gusunɔ duka suurimɔwa domi win tii u bu sɔ̃ɔwa mɛ. Ma ba nùn bikia ba nɛɛ, mban sɔ̃na a kua mɛ. Amɔna sa ko nun kua nim mɛ, mu ka kpuna. N deema nim mɛ, mu seemɔ mu dɔɔwa. 12Ma u bu wisa u nɛɛ, i man suo i kpɛ̃ɛ nim wɔ̃ku ge sɔɔ. Saa yera nim mɛ, mu koo mari. Domi na yɛ̃ ma nɛn sɔ̃na woo bɔkɔ geni ga seewa. 13Ka mɛ, goo tɛmɔ be, ba seewa ba hania mɔ̀ bu ka turi nim mɛn goorɔ. Adama ba kpana. Domi nim mɛ, mu seewawa. 14Yera ba Yinni Gusunɔ soka ba nɛɛ, Yinni Gusunɔ, a ku sun kpeerasia tɔnu winin wãarun sɔ̃. A ku sun wi u kun sun gãanu kuen yɛm sɔbi. Domi a ra kowa ye a kĩ. 15Yera ba Yonasi sua ba kpɛ̃ɛ nim wɔ̃ku ge sɔɔ. Saa yera ga kpuna sɛ̃ɛ. 16Yera tɔn be, ba Yinni Gusunɔ nasia, ba nùn yãkuru kua. Ma ba nɔɔ mwɛɛru kua ma wiya ba koo sã.

will be added

X\