Yoɛli 4

1Yinni Gusunɔ u nɛɛ, yen tɔ̃ɔ te, kon Yudaba ka ben wuu Yerusalɛmu wesia nge yellu. 2Kpa n bwese tukunu kpuro mɛnna n nu sure Yosafatin wɔwa sɔɔ. Miya kon nu siri kɔ̃sa ye nu nɛn tɔmbu Isireliba kuan sɔ̃. Domi nu bu yarinasia tem kpuro sɔɔ. Ma nu ben tem bɔnu kua. 3Nu nɛn tɔmbu bɔnu kua ka tɛtɛ. Nu ben aluwaasiba mwɛɛra nu dɔra nu ka wa nu kurɔ tanɔbu dwe. Ma nu wɔndiaba mwɛɛra nu dɔra nu ka tam nɔ. 4Bɛɛ Tirigibu ka Sidonigibu ka sere be ba wãa Filisitiban temɔ, mba i kĩ nɛn mi. I kĩ i man mɔru kɔsiawa? Ǹ n mɛn na, na ǹ tɛɛmɔ n ka maa bɛɛ mɔru kɔsie. 5Wee i nɛn sii geesu ka nɛn wura ka nɛn arumani gura. Ma i da i ye kpuro yi bɛɛn bũu sãa yerɔ. 6Ma i Yudaba ka Yerusalɛmugibu mwɛɛra i Gɛrɛkiba dɔre. Nge mɛya i ka bu tondasia ben tem di. 7Adama nɛ, kon ka bu wurama mi ba raa wãa. Kon de kɔ̃sa ye i bu kua mi, yu wɔri bɛɛn wiru wɔllɔ. 8Kon bɛɛn bibu Yudaba dɔre. Kpa be maa, bu be Sabegibu dɔre, be ba wãa n toma. Yeniwa nɛ, Yinni Gusunɔ na gerua. 9Yoɛli u nɛɛ, i bwese tukunu nɔɔsio bu tabun sɔɔru ko. Nu tabu durɔ damgibu seesio, kpa bu swaa wɔri, tabu kowobu kpuro gesi. 10Nu nin naa tebonu gɔsio takobiba, kpa nu nin kɔmbɔnu gɔsia yaasi. Be ba raa sãa bɛrurobu, bu tii koowo tabu durɔbu. 11I seewo fuuku i na. Bɛɛ bwese ni i wãa turuku, i mɛnnama. Yinni Gusunɔ, a de wunɛn tabu kowobu bu na. 12Ma Yinni Gusunɔ u nɛɛ, bɛɛ bwesenu kpuro, i seewo i na Yosafatin wɔwa yen mi. Domi miya kon sina n bwese ni nu wãa mi kpuro siri. 13Domi ben nuku kɔ̃sura banda. I kɔmbɔnu suo i tɔn be gɛ̃ nge dĩa ni nu ye. I na i bu munku nge resɛm ye ba doke gama yerɔ, ma yen nim mu kotosu yiba. 14Wee tɔn wɔru ga wee wɔwa yèn mi ba koo tɔmbu siri. Domi nɛ, Yinni Gusunɔn tɔ̃ɔ te, ta tura tè sɔɔ kon nɛn mɔru sɔ̃ɔsi. 15Sɔ̃ɔ ka suru kun maa ballimɔ. Ma kperi yi yam tĩra. 16Nɛ, Yinni Gusunɔ na kukirimɔ Siɔnin guurun di. Nɛn nɔɔ ga nɔɔramɔ Yerusalɛmun di. Wɔllu ka tem mu yĩirimɔ. Adama na nɛn tɔmbu Isireliba kɔ̃su. Nɛna na sãa ben kuku yeru. 17Bɛɛ Isireliba, i ko i gia ma nɛ Gusunɔ na sãawa bɛɛn Yinni, nɛ wi na wãa Siɔniɔ nɛn guu dɛɛraru mi. Yerusalɛmu kpuro ya koo kpam ko nɛgia. Tɔn tukobu ba ǹ maa ye wɔrimɔ. 18Saa gaa wee yè sɔɔ resɛm ya koo gea ko sere ka gungunu wɔllɔ. Kpa sabenu nu di mi. Kpa nu bom ko mu n kpã. Yudan tem daanu kpuro nu koo nim koku. Daru koka gaa koo yari Yinni Gusunɔn sãa yerun di, kpa yen nim mu da sere Sitimun wɔwaɔ. 19Egibiti ya koo kam ko, kpa Edɔmun tem mu ko bansu. Domi ba Yudaba dam dɔre, ma ba taarɛ sarirugibu go. 20- 21Adama kon be ba tɔmbun yɛm yari mi mɔru kɔsia. Kpa Yudaba ka Yerusalɛmugibu ba n wãa ben temɔ sere ka baadommaɔ. Kpa nɛ, Yinni Gusunɔ na n wãa Siɔniɔ.

will be added

X\