Yoɛli 2

1I kɔba soowo Siɔniɔ. I de bu ye nɔ Yinni Gusunɔn guu dɛɛraru mi. Bɛɛ be i wãa tem mɛ sɔɔ kpuro, i diirio bɛrum sɔ̃. Domi Yinni Gusunɔn mɔrun tɔ̃ra wee. Wee ta mam turuku kua. 2Tɔ̃ɔ te, ta tĩriwa. Ta guru wiru ka bukɔ sɔɔwa. Ma twee wuura wee yi dabi, yi maa dam mɔ. Yin wuu te, ta tĩriwa nge yam wɔ̃kura guuru wukiri. Sa ǹ yen bweseru waare. Sa ǹ maa yen bweseru wasi. 3Mi yi sara kpuro, n da kowa nge dɔ̃ɔ mwaara u doona. Yi ku ra gãanu deri. Yellu bɛsɛn tem mu gea sãa nge gbaa te ba mɔ̀ Edɛni. Adama tɛ̃ yi mu kua nge mi gãanu ku ra kpi. 4Twee yi, yi sãawa nge tabu maasɔbu be ba dumi yakiamɔ. 5Yi yɔ̃ɔkumɔ yi guunu gasirimɔ. À n yen wɔkinu nua a ra n tamaa nge tabu kɛkɛbara, ǹ kun mɛ yaka si su dɔ̃ɔ mwaaramɔn wɔkinu. Yi ra n weewa nge tabu durɔ be ba tabun sɔɔru sãa. 6Tɔmbu kpuro ba ra n nandewa yì n tunuma. Kpa ben wuswaa yu burisina. 7Yi ra tii yɔ̃suwa nge tabu durɔbu, yi n gbãraru gasirimɔ, yen baayere ya n yen swaa swĩi. Yi ku ra gam gɛre. 8Yi ku ra maa baasinɛ. Yen baayere ya ra n yen sĩa swĩiwa. Gãa ni nu koo ye gɔngɛrɛ ko, yi ra nu wɔriwa sannu. Nu ku ra maa ye yɔ̃rasie. 9Yi ra wuu wukiriwa yi n gbãraru ka yɛnusu gasirimɔ, kpa yi n dumɔ fɛnɛntiban di nge gbɛnɔbu. 10Mi yi dua, tem mu ra diiriwa, kpa n sãare wɔlla koo wɔruma, kpa suru ka sɔ̃ɔ yam tĩra, kpa kperin ballibu kpe. 11Nge mɛya Yinni Gusunɔ ù n gari gerua win tabu kowobun wuswaaɔ, ba ra nùn mɛm nɔɔwɛwa. Ba dabi, ba maa dam mɔ. Yen sɔ̃na win tɔ̃ɔ te, ta nanum mɔ. Wara u koo yɔ̃ra u tu ma. 12- 13Yinni Gusunɔ u nɛɛ, na sãawa wɔnwɔndugii. Nɛn kĩru ta kpã. Nɛn mɔru ya ku ra fuuku se. Na ra maa tɔnu suuru kue kɔ̃sa ye na raa kĩ n nùn kua sɔɔ. Tɛ̃, i wurama ka bɛɛn gɔ̃ru kpuro nɛn mi, i nɔɔ bɔke, kpa i wuri ko. Bɛɛn gɔ̃ruwa i ko i gɔsia, n ǹ mɔ i yãnu gɛ̃ɛku tɔna. I wurama nɛ, Gusunɔ bɛɛn Yinnin mi. 14Sɔrɔkudo kon gɔ̃ru gɔsia, kpa n bɛɛ durom kua. Saa ye sɔɔra i ko i kpĩ i ka man alikama ka tam kɛ̃nu naawa. 15I kɔba soowo Siɔniɔ. I tɔmbu mɛnnɔ, kpa i nɔɔ bɔkurun tɔ̃ru yi. 16I tɔmbu mɛnnɔ bu man sã, guro gurobu ka bibu, ka bii wɛ̃ɛnɔ. Baa ka be ba wãa kurɔ kpaa dirɔ, bu yario ben kurɔ kpaa dirun di. 17Kpa yãku kowo be ba man sãamɔ bu du nɛn sãa yerɔ ka swĩi, yãku yeru ka kɔnnɔn baa sɔɔ, bu nɛ ben Yinni kana bu nɛɛ, n ben wɔnwɔndu waawo, be, nɛn tɔmbu. N ku bu sekuru doke. N ku de tɔn tukobu bu bu yɛ̃ɛ bu nɛɛ, mana nɛ, ben Yinni na wãa. 18Yinni Gusunɔ u nisinu mɔ win tem sɔ̃. U win tɔmbun wɔnwɔndu mɔ. 19Ma u win tɔmbun kanaru wisa, u nɛɛ, kon bɛɛ alikama kpaa wɛ̃, ka resɛm, ka gum. I ko i deburu wa. Na ǹ maa derimɔ bweseru garu tu bɛɛ yɛ̃ɛ. 20Kon bɛɛ yibɛrɛ be ba na saa sɔ̃ɔ yɛ̃san nɔm geu gian di gira, kpa n de bu da n toma mi tem mu gbere ma gãanu ku ra kpi. Kon de ben swaa gbiobu bu nim wɔ̃ku bɔruguu wɔri. Kpa be ba wãa biruɔ bu nim wɔ̃ku ge ba mɔ̀ Mɛditeranɛ wɔri. Ben gonu nu koo numia sere bu kpana bu wɛ̃sia. Geema, Yinni Gusunɔ u gãa bakanu kua. 21Tem, a ku bɛrum ko, a nuku dobu koowo, domi Yinni Gusunɔ u gãa bakanu kua. 22Bɛɛ gbeeku yɛɛ, i ku nanda. Domi yakasu su koo wure su kpi temɔ, kpa dãnu nu ma. Figie ka resɛm ya koo binu ma siki siki. 23Bɛɛ Siɔnigibu i nuku dobu koowo Gusunɔ bɛɛn Yinni sɔɔ. Domi u koo de gura yu nɛ yen saa sɔɔ nge yellu. U koo de yu nɛ saa ye ya ra tore kpa u de yu kpe saa ye ya ra kpe. 24Alikaman soo yera kun maa gberamɔ. Olifin gum, ka resɛm tam kun maa biaramɔ wekenɔ. 25Kon bɛɛ wɔ̃ɔ si ka dĩa nin kɔsire wɛ̃, ni nɛn tabu kowobu, kɔkɔnu, ka gbaanu, ka twee yi di wɔ̃ɔ si su doona sɔɔ. 26Bɛɛ nɛn tɔmbu, i ko i di i debu. I ǹ sekuru wasi. Kpa i nɛ, Yinni Gusunɔ bɛɛrɛ wɛ̃, nɛ wi na bɛɛ sɔm maamaakiginu kua. 27Saa ye sɔɔ, i ko i gia ma na wãa bɛɛ Isireliban suunu sɔɔ. Ma na sãa Gusunɔ bɛɛn Yinni. Nɛ baasi, Yinni goo maa sari. Bɛɛ nɛn tɔmbu, i ǹ maa sekuru wasi.

will be added

X\