Yoɛli 1

1Gari wee yi Yinni Gusunɔ u Yoɛli, Pɛtuɛlin bii sɔ̃ɔwa u Yudaba sɔ̃. 2U nɛɛ, bɛɛ Yudaban guro gurobu, i swaa dakio i nɔ. Bɛɛ Yudaba kpuro kpuro i swaa tem kpĩiyɔ i gari yi nɔ. Gãa ninin bweseru nu koore bɛɛn waati sɔɔ, ǹ kun mɛ bɛɛn sikadoban waati sɔɔ? 3I bɛɛn bibu yen gari sɔ̃ɔwɔ. Kpa bii be, bu maa ben bibu sɔ̃, kpa be, bà n seewa bu maa begibu sɔ̃. 4Wee dĩa ni kɔkɔnu nu di n tiara, twee yi na yi di. Ye twee yi na yi di n tiara ma swĩini yi na yi di. Ye swĩini yi di n tiara, ma gbaanu na nu ye di. 5Bɛɛ be tam mu goomɔ, i dom yando kpa i swĩ. Bɛɛ tam nɔrobu, i weeweenu koowo. Domi tam mu koo kpe resɛm biarun sɔ̃. 6Domi twee wuura na nge tabu kowobu ta bɛsɛn tem wukiri. Yi dabi, yi maa dam mɔ. Yin donnu dam mɔwa nge gbee sinansuginu. 7Yi bɛsɛn resɛm gbaanu kam koosiamɔ. Yi bɛsɛn figie dãnu dimɔ. Yi yen kokosu wĩamɔ. Ma yi yen kãasi derimɔ kokosu sari. 8I wuri koowo nge kurɔ kpao wi gɔminira deema. 9Ba ku ra maa ka kɛ̃nu de Yinni Gusunɔn sãa yerɔ ni nu sãa alikama ka tam. Yen sɔ̃na Yinni Gusunɔn sɔm kowo be ba sãa yãku kowobu ba sãare ba gɔɔ sɔ̃. 10Gbea kpuro ya kam kua. Ma yen tem mu saara. Alikama sari, resɛm ka gum maa sari. 11Gbee wukobu ba sɔ̃ biti sɔɔ. Be ba ra resɛm yewe, weeweena ba mɔ̀. Domi dĩa bimi sari. Dĩanu kpuro nu kam kua. 12Resɛm gbaanu nu gbera. Figie ya dɛlla. Dãa gbaanu kpuro nu gea yina. Ya dera tɔmbu ba ǹ maa nuku dobu mɔ. 13Bɛɛ Yinni Gusunɔn sɔm kowobu, yãku kowobu, i saaki sebuo i ka kpuna wɔ̃ku giriru nuku sankiranun sɔ̃. Domi wee ba ku ra maa ka alikama ka tam kɛ̃nu nɛ Gusunɔ bɛsɛn Yinnin sãa yerɔ. 14I tɔ̃ru garu wunɔ tè sɔɔ i ko i nɔɔ bɔke. I tɔmbu kpuro mɛnnɔ sere ka durɔ tɔkɔnɔ Gusunɔ bɛsɛn Yinnin sãa yerɔ, kpa i nùn kana. 15Yinni Gusunɔn tɔ̃ru ta turuku kua. Tɔ̃ɔ te, ta sãawa win tɔ̃ru. Te sɔɔra wi, Dam kpurogii u koo kpuro kam koosia. Anna a tɔ̃ɔ kɔ̃suru wa te ta sisi mi. 16Wee sa mɛɛra ba ka bɛsɛn dĩanu doonɔ. Ma nuku dobu kpa Gusunɔ bɛsɛn Yinnin sãa yerɔ. 17Ye ba duura, ya gbera tem kusanu sɔɔ. Dĩanu kpa biranu sɔɔ. Ma bira ni, nu wɔrukumɔ. Domi nu ǹ maa dĩanu mɔ. 18I swaa dakio i nɔ nge mɛ yɛɛ yi wuri mɔ̀, ma yi bɔsu baama. Domi yi ǹ yakasu wa kpara yerɔ. Baa ka yãanɔ nu nɔni sɔ̃ɔre. 19Yinni Gusunɔ, wuna na nɔɔgiru suemɔ. Domi wee, yakasu ka dãa dɔ̃ɔ mwaara gberɔ. 20Ma yɛɛ yi nɔɔgiru sue yi nun kanamɔ. Domi daanu gbera, yakasu maa dɔ̃ɔ mwaakira gbaburɔ.

will be added

X\