Yoobu 9

1Yoobu u gari sua u nɛɛ, 2na yɛ̃ mɛ. Amɔna tɔnu u ko n dɛɛre Gusunɔn wuswaaɔ. 3Gusunɔ ù n tɔnu gari konu nɔrɔbu (1.000) bikia, u ǹ wasi u wisi baa tia. 4Wiya u bwisi ka dam kpuro mɔ. Wara u koo nùn seesi kpa yɛ̃ron wãaru tu dakaa da. 5U ra guunu yiiye subaru sɔɔ, kpa u nu suriri ka mɔru. 6U ra de tem mu yĩiri sere mɛn sɔɔwɔ, kpa mɛn gbereba bu wɔruku. 7U ra sɔ̃ɔ wooda wɛ̃ u ku yari, kpa u win yĩreru doke kperi sɔɔ. 8Wi turowa u wɔllu tɛria. Ma u sĩimɔ nim kurenun wɔllɔ. 9Wiya u kperi bwese bweseka taka kua, ka kperi swaanu, ka kperi yi yi wãa sɔ̃ɔ yɛ̃san nɔm dwaru gia. 10U ra sɔm bakanu ko ni ba ǹ kpɛ̃ bu tubu. U ra sɔm maamaakiginu ko dabi dabinu. 11Baa ù n doonɔ nɛn bɔkun di, na ǹ nùn wasi. Ù n maa sarɔ, na ǹ tubu. 12Ye u nɛnua, wara u koo nùn ye wɔrari. Wara u koo kpĩ u nùn sɔ̃ u nɛɛ, mba a mɔ̀ mɛ. 13Gusunɔ ù n win mɔru seewa u ku ra ye yɔ̃rasie. Win naasun temɔwa u ra yaa gɔba ye ba mɔ̀ Rahabun dam taare. 14Nɛ maa ni, amɔna kon nùn wisi. Gari yirà kon gere win wuswaaɔ. 15Baa nà n gem mɔ, na ǹ kpɛ̃ n nùn gãanu wisi, wi, wi u sãa nɛn siri kowo. Suuruwa kon nùn kana ka bɛɛrɛ. 16Baa nà n nùn kana ma u man wisa, ka mɛ, na ǹ naanɛ mɔ̀ n nɛɛ, u nɛn nɔɔ nua. 17Domi u man wɔri nge woo guna. Ma u man mɛɛra dabinu kua kam, na ǹ gãanu kue. 18U ku ra de n wɛ̃sia, ma u dera nɛn wãara sosia. 19Ǹ n dam garin na, wiya u dam kpuro mɔ. Ǹ n maa siribun garin na, wara u koo kpĩ u nùn siribu soku. 20Baa nà n gem mɔ, ka mɛ, nɛn gere ya koo man taarɛ wɛ̃. Baa nà kun taarɛ mɔ, u koo man sɔ̃ɔsi ma na sãa durumgii. 21Baa mɛ na ǹ taarɛ gaa mɔ, nɛn wãara kun man nɛni, na tu tusa. 22Kon kpĩ n gere n nɛɛ, gãanu kpuro nu sãawa tia Gusunɔn mi. Domi u ra tɔn kɔ̃so ka taarɛ sarirugii kpeerasie. 23Bararu garu tà n taarɛ sarirugii wɔri subaru sɔɔ, ta go, Yinni Gusunɔ u ra n nùn yɛ̃ɛmɔwa nɔni swãa te u wan sɔ̃. 24Tem mù n wɔri tɔn kɔ̃son nɔmuɔ, Yinni Gusunɔ u ra mɛn kparobu wɔ̃koru kpɛ̃ɛwa. Ma n kun wi, wara u koo ye ko. 25Wee, na ǹ doo nɔɔru wa, ma sere nɛn wãarun tɔ̃ra doonɔ fuuku nge wi u duka mɔ̀. 26Ta saramɔ nge goo nimkuu si ba kua ka gbĩi, ǹ kun mɛ nge gunɔ bakeru te ta saram wee tu yaa so. 27Nà n nɛɛ, kon nɛn weeweenu deri n nɛn wuswaa dɛɛrasia, kpa na n nuku dobu mɔ, 28na ra nandewa nɛn wahala yeni kpuron sɔ̃. Domi na yɛ̃ ma Yinni Gusunɔ kun man gem wɛ̃ɛmɔ. 29Baa ǹ n mɛren na, na sãawa taarɛgii win mi. Mban sɔ̃na ko na n maa nùn sɔ̃ɔsimɔ ma na dɛɛre. 30Baa nà n wobura ka guru kpenun nim, kpa n nia ka werem, 31ka mɛ, u koo man surewa pɔtɔkɔ sɔɔ, kpa nɛn yãnun nuburu tu man bwɛ̃ra yɔ̃. 32Wee Gusunɔ kun sãa tɔnu nge nɛ, n sere nùn sɔ̃ n nɛɛ, su da siri yerɔ bu sun siria. 33Goo ù n daa wãa wi u koo du bɛsɛn suunu sɔɔ u sun yakiana, 34Gusunɔ u koo raa win bokuru yi te u ka man soomɔ, kpa u de nɔni swãa te na waamɔ mi, tu kpe. 35Saa ye sɔɔ, na ǹ maa bɛrum mɔ̀ n ka nùn gari ko. Adama n ǹ sãa mɛ.

will be added

X\