Yoobu 8

1Bilida Suagii u gari gerua u nɛɛ, 2sere saa yerà kaa gari saari nini mari. Wunɛn gari yi, yi dam mɔ nge woo bɔkɔ. 3A tamaa Gusunɔ Dam kpurogii u ra gem gɔsie weesu? 4A n yɛ̃ ma wunɛn bibu ba Gusunɔ torariwa, yen sɔ̃na u bu ten are wɛ̃. 5Adama wunɛ, à n Gusunɔ Dam kpurogii kasu, ma a win durom bikia, 6ma u ǹ taarɛ gaa wa wunɛ sɔɔ, saa yera u koo nun nɔɔri, kpa u nun nuku dobu wesia nge mɛ wunɛn gem mu nɛ. 7Kpa wunɛn tɛ̃n wãaru tu wɛ̃ra tu yellugiru kera. 8Tɛ̃, a bikio be ba sun gbiiyen mi, kpa a laakari ko a wa wahala ye ben sikadoba ba kua. 9Bɛsɛ, sa sãawa be ba mara gin tee te, sa ǹ gãanu yɛ̃. Bɛsɛn wãaru ta sãawa nge saaru handunia yeni sɔɔ. 10Adama a de bu nun keu ko. Kpa a swaa daki ye ba koo nun sɔ̃. 11Gbĩi yi koo kpi mi daara kun wãa? Naa yari yi koo kpi mi nim sari? 12Yì n nim bia, baa bà kun yi bure yi ra gberewa fuuku n kere yaka si su tie. 13Nge mɛya be ba Gusunɔ duari ba koo ko, kpa tɔn kɔ̃sobun yĩiyɔbu bu kam ko. 14Ben yĩiyɔbu bu koo nɔru ko, kpa yè sɔɔ ba tãsa yu ko nge naran wɛ̃ɛ. 15Bà n ben dirun gana nɛnua, ya koo diiriwa. Bà n ye tãsa, kpa yu wɔri. 16Ba ko n sãawa nge dãa beku te ta yɔ̃ sɔ̃ɔ sɔɔ, ma ten kãasi tɛria mi ba tu duura. 17Ta ra ten gbini gire kpenun sɔɔwɔ, kpa gbini yi, yi bɔsu yi wa ye n wãa mi. 18Bà n tu wuka min di, kpa yam mi, mu tu siki mu nɛɛ, mu ǹ daa tu yɛ̃. 19Kpa garu tu kpi ten ayerɔ. Nge mɛya tɔn kɔ̃sobun nuku dobu bu ko n sãa. 20Gusunɔ u ku ra gemgii biru kisi. Mɛya u ku ra maa tɔn kɔ̃so somi. 21U koo de a yɛ̃ɛri, kpa a nuku dobun kuuki ko. 22Wunɛn yibɛrɛba ba koo sekuru wa, kpa tɔn kɔ̃sobun yɛnu gu gbi.

will be added

X\