1 Handunia yeni sɔɔ, tɔnun wãara sɛ̃wa nge tabu kowo, ǹ kun mɛ nge wi u sɔm sɛ̃sɔginu mɔ̀, 2 ǹ kun mɛ nge yoo wi u wãa sɔ̃ɔ sɔɔ u saaru kasu u wɛ̃ra, ǹ kun mɛ nge sɔm kowo wi u mara bu nùn kɔsia. 3 Nge mɛya nɛn tii na sãa. Suru dabinu na wãa nɔni swãaru sɔɔ. Wɔ̃ku dabina na ra n wãa wahala sɔɔ. 4 Nà n kpuna na ra tii bikiewa n nɛɛ, domma kon se. Domma wɔ̃kura koo kpe. Domi na wasira na n ka sunamɔ sere yam mu ka sãra. 5 Wee nɛn wasi kɔ̃simɔ, yi kɔkɔnu mɔ̀, ma yin kokosu wɔbiriramɔ. Mɛya nɛn gɔna ya booboosu mɔ si su numu. 6 Nɛn wɛ̃siaru ta weson kɔkɔrɔru sãabu kere. Na ǹ yĩiyɔbu mɔ, Yinni Gusunɔ. 7 A yaayo ma nɛn wãara sãawa wɛ̃sia teeru. Nɛn nɔni kun maa durom wasi. 8 Wunɛ wi a man mɛɛra, a ǹ maa man wasi. À n man kasu, na ǹ ko na n maa wãa mi. 9 Nge mɛ kakoru ta ra yarinɛ tu doona, nge mɛya tɔnu ù n gu, u ǹ maa seemɔ gɔribun wãa yerun di. 10 U ǹ maa wee u sina win yɛnuɔ. Ba koo nùn duariwa mam mam. 11 Na ǹ kpɛ̃ n nɔɔ mari, domi na nuki sankire. Kon nun weeweenu koosi, domi na nɔni sɔ̃ɔre. 12 Yinni Gusunɔ, a tamaa na sãawa nge nim wɔ̃kun nim, ǹ kun mɛ gen yaa gɔba gaa, a ka man ganua mɛ beri berika? 13 Nà n kpuna na nɛɛ, kon bɔri yɛndu wa, kpa n nɛn weeweenu mari, 14 saa yera a ra man nandasie ka dosu kɔ̃susu, ǹ kun mɛ ka kãsinu. 15 A yande man soora dokeo n gbi, ye ko na n ka kuku nini sɔɔwa. 16 Wãara den man tusa mɛ. Na ǹ maa kĩ na n wãa sere ka baadommaɔ. Nɛn wãara kun sãa gãanu, a man derio sɛ̃ɛ. 17 Yinni Gusunɔ, wara ra n tɔnu, a n ka sere win bwisikunu mɔ̀. Mban sɔ̃na a nùn garisi gãanu, 18 ma a nùn nɔni girari bururu baatere, ma a nùn wɛ̃ɛrimɔ saa baayere. 19 Sere domma kaa man deri sɛ̃ɛ. Sere domma kaa de n wɛ̃sia. 20 Toraru mba na tora. A man sɔ̃ɔwɔ wunɛ wi a ra n tɔmbun sanu sanusu mɛɛra. Mban sɔ̃na a man sɛɛyasiamɔ mɛ. Mban sɔ̃na na kua wunɛn sɔmunu. 21 Mban sɔ̃na a ǹ nɛn durum wunɛ. Mban sɔ̃na a ǹ nɛn toraru duari. Tɛ̃, wee kon kpuna n gbi. Kaa man kasu, kpa a kun man wa.
