Yoobu 6

1Yoobu u Elifasi wisa u nɛɛ, 2bà n nɛn nɔni swãaru ka nɛn wahala kpuro kilo sɔndi, 3ya ko n nim wɔ̃kun yani sɛɛri bunum kere. Yen sɔ̃na na gari mɔ̀ nge wiiro. 4Domi Dam kpurogii u man yabura ka sɛ̃ɛnu. Ma nin dɛ̃ɛ nɛn wasi duuri. Ma u man gãa nanumginu kpare nge tabu kowo. 5Kɛtɛku gbeeku ga ra swĩ gà n yaka bekusu wa ga dimɔ? Kɛtɛ ya ra swĩ yà n yakasu wa ya dimɔ? 6Ba koo kpĩ bu dĩanu di ni nu maari sɔ̃ɔ sɔ̃ɔ nu ǹ bɔru mɔ? Goo sɛ̃ɛrun kpikum mu ra n do? 7Na ku ra dĩa nin bweseru kã. Nge mɛya na wahala ye na mɔ̀ mini tusa. 8Gusunɔ u nɛn kanaru mɔɔ, kpa u man kua ye nɛn gɔ̃ru ga kĩ. 9U den win nɔmu dɛmiɔ u man mwa, u munku u dakura. 10Saa ye sɔɔra kon nuku dobu ko nɛn wahala baka yeni sɔɔ. Kpa nɛn nukuru tu yɛmia. Na yɛ̃ ma Yinni Gusunɔ u dɛɛre, na ǹ maa win wooda gaa yinɛ. 11Mba ko na n maa yĩiyɔ sanam mɛ na ǹ dam mɔ. Mba na maa mara, domi na yɛ̃ ma na guwa mi kɔ. 12Na dam mɔwa nge kperu? Nɛn wasi yi sãawa nge sii gandu? 13Aawo, na sãawa dam sarirugii. Goo maa sari wi u koo man faaba ko. 14N weenɛwa wi u nɔni sɔ̃ɔre u durom wa win bɔrɔn mi, baa u kun Dam kpurogii nasie. 15Adama wee, bɛɛ nɛn bɔrɔba i man nuki sanka nge daa te ta nim gbera. 16Puran saa, kpa ta n nim yibumɔ baaman di mɛ mu dɛɛre. 17Yam susurun saa, kpa sɔ̃ɔ u tu gberasia. 18- 20Nim nɔru gà n tenkuba mɔ̀, be ba wee saa Tema ka Saban di, yera ba ra gɛre mi. Domi ba tu naanɛ sãa. Adama bà n tura mi, ben gɔma ra dwiiyewa, kpa bu yaayaare ko bu kɔ̃ɔra, bu gbi gbaburɔ. 21I sãawa nge daa te. I nɛn weeweenu nɔɔmɔ, ma i bɛrum soore. 22Na bɛɛ bikiare n nɛɛ, i man kɛ̃ru kɛ̃ɛma bɛɛn arumanin di, 23n wa n ka yari yibɛrɛn nɔmun di? N kun mɛ i ka man yakia tɔn kɔ̃so goon nɔman di? 24I man sɔ̃ɔsio mi na tora, kpa n mari. 25Tɔnu u koo gem wura. Adama ye i man gerusimɔ mi, mana yen asansi wãa. 26I kĩwa i nɛn gari gɔburu wa, i yi mɛɛri kam, kpa i man taarɛ wɛ̃, nɛ wi na ǹ maa gãanu yĩiyɔ? 27Bɛɛ, i ko kpĩ i gobeku tɛtɛ toosi, kpa i mam bɛɛn bɔrɔ dɔra. 28Tɛ̃, na bɛɛ kanamɔ, i man mɛɛrima. Kon bɛɛ weesu kuawa batuma sɔɔ? 29I suuru koowo, i de i kun sãa murafitiba fa! I de i nɛn dɛɛraru wa. 30Gari kɔ̃si yi ra n wãa nɛn nɔɔwɔ? I tamaa na ku ra gea ka kɔ̃sa wunanɛ?

will be added

X\