Yoobu 5

1Yoobu, a kuuki koowo, goo ù n koo re nun wisi. Nge Gusunɔn gɔrado wara kaa soku kpa u na u nun wurari. 2Gari bɔkɔ u ra gbiwa win mɔrun sɔ̃. Bwisi sarirugii u ra gbiwa win nisinun sɔ̃. 3Na gari bɔkɔ wa u kuura. Ma na wa win wãa yera wɔriki. 4Ma win biba faaban swaa deri. Goo sari wi u koo bu wɔra siri yerɔ. 5Tɔn tukoba koo win dĩa ni u gã kata ko bu gura, baa ka ni u kara koosi ka sãki. Kpa be ba win dukian binɛ mɔ bu ye sua bu ka doona. 6Wahala ku ra yari saa tuan di. Mɛya nɔni swãara ku ra maa kpi saa tem di. 7Adama wi ba mara kpuro u koo wahala kowa, nge mɛ bà n dɔ̃ɔ wure, dɔ̃ɔ buri yi ra yɔ̃. 8Adama nɛ Elifasi, ǹ n nɛn sɔ̃n na, Gusunɔwa kon somiru kana. Kpa n nùn nɛn wahala kpuro sɔ̃. 9U ra gãa bakanu kowa ni tɔnu kun kpɛ̃ u gia. U ra maamaaki dabinu ko. 10U ra de gura yu nɛ tem sɔɔ, kpa gbea yu nim wa. 11U ra be ba tii kawe wɔlle sue, kpa u be ba nuki sankire yara ben nuku sankirarun di. 12U ra be ba bwisi kɔ̃si mɔn himba kam koosie, kpa bu ku maa kpĩ bu ye yibia. 13U ra dewa bwisigibun tiin bwisi yi bu yina mwa, kpa ben wesianɔ gu ko kam. 14Ben mi, sɔ̃ɔ sɔɔ gbãara ya ra n bu sãawɛwa yam wɔ̃kuru, kpa ba n babi. 15Adama Gusunɔ u ra dam sarirugii ganɛ ben tabu yãnun di, kpa u nùn wɔra ben nɔman di. 16Nge mɛya u ra dam sarirugii wi yĩiyɔbu wɛ̃, kpa u durumgiin nɔɔ kɔre. 17Domarugiiwa wi Gusunɔ Dam kpurogii u sɛɛyasiamɔ. Yen sɔ̃, Yoobu, a ku yina ù n nun sɛɛyasiamɔ. 18Domi wiya u ra tɔnu mɛɛra ko, kpa u yɛ̃ron bosu nɔɔri. Wiya u ra tɔnu kɔsuku, kpa u nùn bɛkia. 19Nɔn dabinu u koo nun yara nuku sankirarun di, kpa kɔ̃sa gaa yu ku maa nun deema. 20Gɔ̃ɔru tà n dua tem sɔɔ, u koo nun gɔɔ gbarari, kpa u nun faaba ko tabu sɔɔ. 21U koo nun bɔ̃ri gbara. Sanam mɛ yibɛrɛba ba koo tem kam koosia, u koo nun wɔra. 22Kpa a n yɛ̃ɛmɔ gɔ̃ɔrun saa sɔɔ, ka sanam mɛ ba tem kam koosiamɔ. A ǹ kaa n maa yaa gɔba gaan bɛrum mɔ. 23A ǹ maa asɔrɔ wasi wunɛn gberɔ. Domi ba ǹ tu kpenu suremɔ. Yɛɛ gɔbi kun maa duɔ mi. 24Kaa n bɔri yɛndu mɔwa wunɛn yɛnuɔ. Kpa wunɛn sabenun gɔ̃ɔ ga n yiba baadomma. 25Mɛya maa wunɛn bibun bweseru ta koo kpɛ̃a kpa tu kɔwara nge yaka bii. 26Tɔkɔru sɔɔra kaa gbi nge mɛ ba ra dobi gɛ̃ yen saa yà n tura. 27Gãa niniwa sa gia bɛsɛn wãaru sɔɔ. Nu maa sãawa gem. Yen sɔ̃, a nu bwisikuo, kpa a nu mwa wunɛn tiin sɔ̃.

will be added

X\