Yoobu 42

1Yoobu u Yinni Gusunɔ wisa u nɛɛ, 2na yɛ̃ ma kaa kpĩ a kpuro ko. Gãanu kun kpɛ̃ nu wunɛn himba gɔsia. 3A gerua a nɛɛ, na dera tɔmbu ba ǹ wunɛn himba tubumɔ ka nɛn wiira gari. Na wura. Na gari gerua yi na ǹ yɛ̃. Gari yi, yi man kpãaru kere. 4A man sɔ̃ɔwa a nɛɛ, n nun swaa dakio kpa a man gari sɔ̃. Kaa man gari bikia, kpa n nun yi tubusia. 5Na raa wunɛn gari nua yi tɔmba gerumɔ, adama tɛ̃ na nun wa ka nɔni. 6Yen sɔ̃na na tii taarɛ wɛ̃ ma na gɔ̃ru gɔsia na tii tua ka torom wisi nuku sankiranun sɔ̃. 7Sanam mɛ Yinni Gusunɔ u ka Yoobu gari kua u kpa, yera u Elifasi Temagii sɔ̃ɔwa u nɛɛ, na ka wunɛ ka wunɛn bɔrɔba yiru ye mɔru mɔ̀ too too. Domi i ǹ nɛn gari gerua dee dee nge mɛ nɛn bɔ̃ɔ Yoobu u gerua. 8Yen sɔ̃, i seewo i naa kinɛnu nɔɔba yiru ka yãa kinɛnu nɔɔba yiru sua i ka da nɛn bɔ̃ɔ Yoobun mi, i ka yãku dɔ̃ɔ mwaararuginu ko. Kpa u bɛɛ kanaru kua. Kon kana te mwa. Kpa n ku maa bɛɛ kua ye kon daa bɛɛ kua bɛɛn wiira garin sɔ̃. Domi i ǹ nɛn gari gerua dee dee nge mɛ Yoobu u gerua. 9Yera Elifasi Temagii ka Bilida Suagii ka Sofaa Naamagii ba seewa ba da ba kua nge mɛ Yinni Gusunɔ u bu sɔ̃ɔwa bu ko. Ma Yinni Gusunɔ u Yoobun kanaru mwa. 10Ye u kana te kua win bɔrɔban sɔ̃ u kpa, yera Yinni Gusunɔ u nùn win yellun wãaru wesia, u nùn ye u raa mɔn suba yiru wɛ̃. 11Yoobun wɔnɔbu ka win maabu ka win sesubu ka win yellun bɔrɔba ba nùn beram da ma ba di mi ka wi sannu. Ma ba win wɔnwɔndu wa, ba nùn nukuru yɛmiasia nɔni swãa te Yinni Gusunɔ u dera u wan sɔ̃. Yera ben baawure u nùn sii geesun gobi ka taabu wuraguu kã. 12Gusunɔ u nùn domaru kua win sanam dãakim mɛ sɔɔ n kere win yellun wãaru. Win arumani ye u wa wee, yãanu nɔrɔbun suba wɔkura nnɛ (14.000) ka yooyoosu nɔrɔbun suba nɔɔba tia (6.000) ka naa wuku nɔrɔbun suba yiru (2.000) ka kɛtɛku ninu nɔrɔbu (1.000). 13Yen biru u maa bii tɔn durɔbu nɔɔba yiru mara ka bii tɔn kurɔbu ita. 14U win bii wɔndia gbiikoo yĩsiru kã Yemima, yiruse maa Kɛsia, itase maa Kerɛni Hapuku. 15Tem mi kpuro sɔɔ, wɔndia goo sari wi u Yoobun bii wɔndia be buram tura. U bu tubi wɛ̃ nge mɛ u win bii tɔn durɔbu wɛ̃. 16Yeniban biru, Yoobu u maa kua wɔ̃ɔ wunaa weeru (140). Ma u win bibu wa ka win debuminun bibu. 17Yoobu u tɔkɔ kua kɔ̃ɔ kɔ̃ɔ ma u kpuna u gu.

will be added

X\