Yoobu 4

1Yeniban biru, Elifasi Temagii u Yoobu sɔ̃ɔwa u nɛɛ, 2sà n gari gerua yi koo nun du? Wara u koo sere gari yini nɔ u n maari. 3Wee tɔn dabina a keu sɔ̃ɔsi, ma a nuku sankirobu dam kã. 4Wunɛn gari yi be ba raa kpanamɔ dam kã. Ma a be ba gɔma dwiiya tãsisia. 5Wee tɛ̃ gari yi nun deema, ma a kpanamɔ. Wee wahala ya nun girari, ma a burisinɛ. 6N ǹ Gusunɔ sãara ta sãa wunɛn dam? N ǹ wunɛn yĩiyɔbu bu ra n wãawa Gusunɔ win mi yèn sɔ̃ a nùn mɛm nɔɔwammɛ? 7Ǹ n mɛn na, a bwisikuo wunɛn wãaru sɔɔ, à n nɔɔre ba taarɛ sarirugii goo go, ǹ kun mɛ ba gemgibu mwɛɛra ba kpeerasia. 8Nɛ, na gabu waare, kɔ̃san sɔmbura ba ra n mɔ̀, kpa ba n weesu swĩi. Mɛya ba ra maa ye kpuron are wa. 9Ba ra n Gusunɔn mɔru seeye kpa yu ka bu kam koosia nge woo bɔkɔ. 10Kpa ben kukiri bi ba ra ko nge gbee sunɔ bu nɔru ko. Gusunɔ u ra ben nɔsu bɔɔkuwa. 11Ba ko n sãawa nge gbee sunɔ mɛro ge ga yaa bia gu di, ma ga gu, gen binu yarina. 12Gari gɛɛ man naawa asiri sɔɔ wɔ̃kuru, ma nɛn swasu su yi nua fɛrɛ fɛrɛ, 13wɔ̃ku suunu sɔɔ, saa ye ta nanum kua ta kpa, ma tɔmba kpĩ kpata kpata ba dosimɔ. 14Saa yera na nanda, ma nɛn wasi kpuro diira. 15Ma gãanu man sweema nge woo, ma nɛn wasi kiri seewa. 16Na goo wa wi na ǹ tuba. Ma na nɔɔ gagu nua ga gerumɔ tɛɛru tɛɛru ga mɔ̀, 17tɔnu u koo kpĩ u n dɛɛre Gusunɔn wuswaaɔ? U koo kpĩ u n dɛɛre wi u nùn taka kuan nɔni sɔɔ? 18Gusunɔ u ǹ mam win sɔm kowobu gɔradoba naanɛ kue, ma u toranu waamɔ be sɔɔ. 19Kaa sere gere tɔn be ba mɔma ka tem, be ba koo kpĩ bu sunku nge kɔkɔbu? 20Tɔnu koo kpĩ u n wãa bururu, ǹ n kua yoka kpa a deema u gu, kpa goo kun mam gara nge u gu. 21Win wãaru ta kasira. U ǹ bwisi kpuro wa u ka gu.

will be added

X\