1 A yɛ̃ saa yè sɔɔ kpee bɛra ya ra yen binu ma? A ka nɛmun marubu yinnare? 2 A ra nin guran suru gari, kpa a n yɛ̃ saa ye nu koo ma? 3 Nu ra yiire nu nin binu ma, kpa nu yari marubun wahalan di. 4 Nin bii ni, nu ra kpɛ̃yɛ nu dam ko yakasɔ, kpa nu yarina nu nin mɛro deri. Nu ǹ maa wee mi. 5 Wara u ra de gbeeku kɛtɛku ga n tii mɔ, goo u kun gu bɔkua. N ǹ nɛ? 6 Na dera ga wãa tem mi gãanu ku ra kpi, ka maa tem bɔrugimɔ. 7 Gen baaye ka wuun wɔkinu. Ga ǹ maa yinni goon gbãsukubu nɔɔmɔ. 8 Ga ra n bɔsuwa guunɔ gu ka gen dim wa. Yaka bekusa ga ra n kasu. 9 Gbeeku kɛtɛ ya koo wura yu nun sɔmburu kua? Ya koo wura yu kpuna wunɛn naa gɔ̃ɔwɔ? 10 Kaa ye wɛ̃ɛ doke yu nun sɔmburu kua? Ya koo wura yu nun tem kusanu kɔsukua wɔwa sɔɔ? 11 Kaa ye naanɛ ko yèn sɔ̃ ya dam bakam mɔ? Kaa ye wunɛn sɔmburu kpuro nɔmu sɔndia? 12 Kaa naanɛ ko yu nun wunɛn dĩanu gurama yu ka da doo soo yerɔ? 13 Taataarun kasa ya ra n wã tà n ye dɛrie. Mɛya yen sansu maa waabu wã. 14 Taataa te, ta ra ten sɛ̃ɛnu sikewa temɔ. Kpa yani sɛɛri yi nu swĩasia. 15 Ta ra duari ma goo ǹ kun mɛ gbeeku yaa gaa koo kpĩ yu nu taaku yu kɔsuku. 16 Ta ra n sɛ̃ ka ten binu. A ǹ kaa n mam tamaa ten bina. Ta ra ten wahala duari ye ta kua ta ka nu mara. 17 Domi na ǹ tu bwisi kã, na ǹ maa tu laakari kã. 18 Adama tà n seewa ta duka mɔ̀, ta ǹ maasɔ ka win duma gara. 19 Wuna a dumi dam wɛ̃? Wuna a yi sarubasu dokea? 20 Wuna a ra de yi yɔ̃ nge twee? Yin wura ya ra tɔmbu nandasie, 21 kpa yi n tem bwiyamɔ wɔwa sɔɔ yi n nuku dobu mɔ̀ yin dam saabu. Yì n tabu durɔbu wa, yi ra bu tabu wɔriwa ka dam. 22 Yin baaye ka bɛrum. Yi ǹ gãanu nasie. Yi ku ra maa biru wure yì n takobi wa. 23 Yin yinnibun sɛ̃ɛ bwãanu ka ben yaasi yi ra n wɔki kpa yi n ballimɔ yin wɔllɔ. 24 Bà n tabun kɔba so, yi ra n gàri wɔrawa, kpa yi n tem kɔsukumɔ. 25 Mɛya yì n kɔba ye nua, yi ra n sɔɔru kpeerewa, kpa yi n tabun woo numiamɔ tontonden di, kpa yi n yibɛrɛba ka ben sinambun nɔɔ damgisu nɔɔmɔ. 26 Wuna a ra kasa bwisi kɛ̃ yu ka kɔsɔru da sɔ̃ɔ yɛ̃san nɔm dwaru gia? 27 Wuna a ra gunɔ bakeru sɔ̃ tu ka se tu ten sokuru ko guuru wɔllɔ? 28 Kpee baaba sɔɔra ta ra ten wãa yeru ko, mì gãanu kun kpɛ̃ nu tu mwa. 29 Saa min diya ta ra ten nɔni kɔ̃ tu ka yaa sãkiria. 30 Mi a yaa goru wa, miya a ra maa tu wa. Yɛma ten binu nu ra nɔ.
