Yoobu 38

1Yinni Gusunɔ u Yoobu wisa guru woo bɔkɔ gagun di u nɛɛ, 2mban sɔ̃na a dera tɔmbu ba ǹ nɛn himba tubumɔ ka wunɛn wiira gari. 3Tɛ̃, a sɔɔru koowo, kpa a yɔ̃ra nge tɔn durɔ wɔrugɔ. Kon nun gari bikia, kpa a man yi tubusia. 4Mana a wãa sanam mɛ na tem kua. A ye geruo, à n bwisi mɔn na. 5A yɛ̃ wi u mɛn goonu yi yi? Wara u nu yĩira ka wɛ̃ɛ. 6Ma sɔɔra ba mɛn kpɛɛkpɛɛku swĩi. Wara u mɛn gɔmburun kperu swĩi. 7Saa ye wɔllun gɔradoba ba dɛsiru karamɔ, ma n sãare kperin tii yi nuku dobun womu mɔ̀ yam sãre bururu, 8wara u nim wɔ̃ku kɛnua ka gamboba sanam mɛ ga yarima tem nukurun di. N ǹ nɛ? 9Na guru wiru kua gen bekuru, ma na gu yam wɔ̃kuru wukiri. 10Na gu wooda wɛ̃ na nɛɛ, gu yɔ̃ro mini. Ma na gu gamboba ka kɔkɔrɔba dokea. 11Na gu sɔ̃ɔwa na nɛɛ, gu na sere mini, kpa gu yɔ̃ra gu ku sara. Miniwa gen nim kurenun dam mu koo yɔ̃ra. 12Saa mìn di a wãa, a sɔ̃ɔ sɔ̃ɔre u yario bururu, 13kpa u yarima u da handunian goonu nnɛ sɔɔ, u nuku kɔ̃surugibu terasia ben kuku yenun di, 14kpa tem kpuro mu kɔsi nge sɔndu te ba yĩreru doke, kpa ta n sãa nge wi u yabe buraru sebua? 15Adama nuku kɔ̃surugibu ba ǹ yam bururam kĩ, domi mu yinamɔ bu ben kom kɔ̃sum ko. 16Yoobu, a bɔsum daare sere mi nim wɔ̃kun nɔnu ga wãa? A daare sere gen temɔ? 17Ba nun gɔribun wãa yeru sɔ̃ɔsire? A ten kɔnnɔ waare? 18A handunian kpãaru laakari koore? A man sɔ̃ɔwɔ à n ye kpuro yɛ̃. 19Mana swaa wãa ye ya dɔɔ yam bururam gia. Mana yam wɔ̃kuru ta ten wãa yeru mɔ. 20À n yen swɛɛ yɛ̃n na, a ǹ kaa da mi? 21Kaa n ye kpuro yɛ̃, domi ba nun mara n tɛ. 22A daare sere mi nim mu ra gɔsie nge kperu? A wa mi guru kpenu nu ra n wãa? 23Na nu yiiwa saa gaan sɔ̃, yè sɔɔ tɔmbu ba koo nuki sankira tabun sɔ̃. 24A yɛ̃ mìn di yam bururam mu ra nɛ? A maa yɛ̃ mìn di sɔ̃ɔ yari yerun woo ga ra nɛ? 25Wara u gura swaa yaba. Wara u guru maakinu ka guru kukiribun swaa yi yi. 26Wara u ra de gura yu nɛ gbaburɔ, tem mi goo sari, 27kpa yu tem mi n daa gbere yɛmiasia, kpa yakasu su kpi. 28Gura ya tundo mɔ ro? Wara u kakoru mara. 29Man diya guru kpenu nu ra yari. 30Wara u ra nim bɔbiasie wɔllɔ nge kperu, kpa u nim wɔ̃kun wɔllɔ ko nge kpee bakaru. 31Kaa kpĩ a wɔllun kperi swaaru bwese bweseka bɔke, kpa a maa yi kusia? 32Wuna a ra de wɔllun kperi bwese bweseka yi yari yin saa sɔɔ, kpa a yin wuunu kpara? 33A yɛ̃ nge mɛ wɔlla ka sĩisinamɔ? Kaa kpĩ a ka ten woodaba sɔmburu ko tem sɔɔ? 34Wuna a ra nɔɔgiru sue a guru wiru soku, kpa gura yu ka nɛ yu nun so? 35Wuna a ra guru maakinu koosie? À n nu koosia, nu ra nɛ wunɛn mi nu nɛɛ, nu sɔɔru kpa, kpa nu maakinu ko? 36Wara u tɔnun gɔ̃ruɔ laakari doke. Wara u tɔnu bwisi wɛ̃. 37Wara ka win bwisi kpuro, u koo kpĩ u guru winu gari, kpa u nu sikasia gura yu nɛ, 38kpa gura ye, yu yanim gura yu subu, kpa yu tem kusanu mɔnsina. 39Yinni Gusunɔ u maa nɛɛ, Yoobu, wuna a ra gbee sunɔ gen dĩanu kasue, kpa a gen binun gɔ̃ɔru kpeesia 40sanam mɛ nu kpĩ nin wãa yerɔ nu yaa mara? 41Wara u ra gunɔ bakeru ten dĩanu wɛ̃ sanam mɛ ten binu nu nɔɔ sue nɛn mi gia, ǹ kun mɛ, nù n bɔsu nu dĩanu kasu.

will be added

X\