Yoobu 37

1Nà n yeniba kpuro wa, nɛn torora ra karewa kpa na n diirimɔ. 2I swaa dakio i Gusunɔn nɔɔ nɔ ge ga kukirimɔ nge gura. 3Ga nɔɔra baama wɔllɔ. Ma guru maakinu nu ballimɔ handunian goonu nnɛ sɔɔ. 4Guru maaki nin biru, Gusunɔn nɔɔ ga ra nɔɔre ka dam kpa yande guru maaki kpaanu nu sɔ̃ɔsira. 5Ù n gbãra, tɔmbu ba ra biti soorewa. Gãa bakana u kua mi, ni tɔnu kun kpɛ̃ u tubu. 6U ra guru kpenu sɔ̃ u nɛɛ, nu nɛɛyɔ. U ra maa guran tii sɔ̃ u nɛɛ, yu nɛɛyɔ ka dam. 7U ra de tɔmbu kpuro bu ben sɔmburu yɔ̃rasia gura yen sɔ̃, kpa bu gia ma wiya u ye kpuro mɔ̀. 8Baa ka gbeeku yɛɛyɔ u ra dewa yi da yi kpuna yin wãa yerɔ. 9Guru woo bɔkɔ ga ra nɛwa saa sɔ̃ɔ yɛ̃san nɔm dwaru gian di, kpa pura yu na sɔ̃ɔ yɛ̃san nɔm geu gian di. 10Yinni Gusunɔwa u ra nim wom wure, kpa mu bɔbia nge guru kperu. 11Wiya u ra de kakoru ta n wãa guru wiru sɔɔ, kpa u tu yarinasia ka guru maakinu sannu. 12U ra tu gɔsiewa nge mɛ u kĩ. Kpa tu ko nge mɛ u gerua handunia sɔɔ. 13Ta sãawa nge bokuru te u ra ka tɔmbu sɛɛyasie ǹ kun mɛ u ka bu win kĩru sɔ̃ɔsi. 14Yoobu, a yeniba kpuro laakari koowo. A Yinni Gusunɔn sɔm maamaakiginu mɛɛrio a wa. 15A yɛ̃ nge mɛ Gusunɔ u ra nu dendisinɛ, kpa u de guru maakinu nu balli guru winu sɔɔ? 16A yɛ̃ nge mɛ guru winu nu ka bwɛ̃ɛ wɔllɔ? Wi u yenin bweseru kua, win yɛ̃ru ta yiba mam mam. 17Woo gà n sweema sɔ̃ɔ yɛ̃san nɔm dwaru gian di, yam susura ra nun ko, à n wunɛn yãnu doke. 18Kaa kpĩ a wɔllu tɛria nge wi, kpa ta n dam mɔ nge digi ye ba kua ka sisu? 19A sun sɔ̃ɔsio ye n weenɛ su Gusunɔ sɔ̃. Domi sa ǹ wa ye sa ko nùn wisi bɛsɛn yɛ̃ru sarirun sɔ̃. 20Tilasiwa bu ka nùn sɔ̃ nà n gari gerua? Tilasiwa bu ka nùn nɔɔsia ye na gerua? 21Wee u ra de yam mu tĩra subaru sɔɔ, kpa guru winu nu n sɔ̃ɔ berua. Adama u ra de woo gu se gu wɔllu dɛɛrasia. 22Saa ye sɔɔra yam bururam mu koo na saa sɔ̃ɔ yɛ̃san nɔm geu gian di, kpa mu n nùn sikerenɛ ka nanum bakam. 23Sa ǹ kpɛ̃ su Dam kpurogii tubu. Domi win dam mu kpã. U ra maa kpuro ko dee dee. U ku ra wi u gem mɔ dam dɔre. 24Mɛya u ku ra maa be ba tii mɛɛra bwisigibu garisi gãanu. Yen sɔ̃na n weenɛ tɔmbu bu nùn nasia.

will be added

X\