Yoobu 36

1Ma Elihu u kpam gerua u nɛɛ, 2a yɔ̃ro fiiko, gari gɛɛ maa tie yi kon Gusunɔ gerua. 3Kon nɛn yɛ̃ɛ bakaru dendi n ka sɔ̃ɔsi ma nɛn Taka kowo u gem mɔ. 4A naanɛ koowo ma nɛn gari kun sãa weesu. Na yɛ̃ sãa sãa ye na gerumɔ. 5Gusunɔ u sãawa Dam kpurogii. U ku ra maa goo gɛm. U dam mɔ kpuron wɔllɔ. U ku ra win gere kɔsi. 6U ku ra de tɔn kɔ̃sobu ba n wãa. Adama u ra wɔnwɔndobu siriewa dee dee. 7U ku ra gemgibu deri. U ra bu swĩiwa nge sinambu kpa ba n bɛɛrɛ mɔ sere ka baadommaɔ. 8Adama be ba bɔkua ka yɔni, ba wahala mɔ̀ ye ba kuan sɔ̃, 9Gusunɔ u ra bu sɔ̃ɔsi ma ba daa kɔ̃sa kua, ma ba tii sue, 10kpa u bu kirɔ ko bu ka win gari nɔ, kpa bu wa bu daa kɔ̃sa duka suuri. 11Bà n gari yi mɛm nɔɔwa, ma ba tii wɛ̃, ba koo ben wãaru diwa bɔri yɛndu sɔɔ, ka nuku dobu sɔɔ sere ka ben gɔɔn tɔ̃rɔ. 12Adama bà kun yi mɛm nɔɔwɛ, ba koo bu gowa subaru sɔɔ ka takobi. 13Tɔn kɔ̃sobu ba ra ka Gusunɔ mɔru sewa. Ù n bu bɔkua ka yɔni, ba ku ra nùn suuru kanɛ. 14Ba koo gbiwa sɛkum aluwaasiru sɔɔ, kpa bu ko tia ka daa bɛrɛtɛkɛgibu. 15Adama Yinni Gusunɔ u ra wɔnwɔndo faaba kowa ù n wãa nɔni swãaru sɔɔ, kpa u nùn kirɔ ko ka wahala ye. 16Yoobu, mɛya u koo nun yara wahalan di, kpa u de a n bɔri yɛndu mɔ ta n kpã. Kpa u maa de a n dĩa geenu yiba a n dimɔ. 17Adama tɛ̃, à n ka tii yinamɔ, n ǹ maa koorɔ a yari sɛɛyasia bin min di. 18A ku de mɔru yu nun gawa a ka kɔ̃sa ko. A kun maa tamaa kaa Gusunɔ kɛ̃ru garu wɛ̃wa kpa u ku ka nun sɛɛyasia. 19Wunɛn wura, ǹ kun mɛ wunɛn arumani gaa, ǹ kun mɛ wunɛn dam, yen gaa kun kpɛ̃ yu nun yara nɔni swãa ten di. 20A ku wɔ̃ku te kĩa tè sɔɔ ba koo tɔmbu go. 21A n tii sɛ kpa a ku ra kɔ̃sa ko. Domi wahala ye, ya nun deemawa kpa a wa a ka kɔ̃sa duka suuri. 22Yinni Gusunɔ u kpã win dam saabu. Wara u koo kpĩ u keu sɔ̃ɔsi nge wi. 23Wara u ra nùn wooda wɛ̃ ye u koo swĩi. Wara u koo kãku u nɛɛ, kɔ̃sa u mɔ̀. 24A ku duari a win sɔma wɔlle sua, yè tɔmbu kpuro ba siara ka womusu. 25Tɔmbu ba ye waamɔ baa yà n toma. 26Gusunɔ u kpã sere goo kun kpɛ̃ u win kpãa ten asansi gere. Mɛya maa win wãarun wɔ̃ɔ ga ǹ garirɔ. 27U ra nim buri yi yi seemɔ baaman di mɛnnɛwa, kpa u yi gɔsia guru winu. 28Kpa guru wii ni, nu de gura yu nɛ, yu tɔn wɔru so. 29Wara yɛ̃ nge mɛ guru winu nu ka sĩisinamɔ. Wara yɛ̃ nge mɛ gura ra ka gbãre. 30Yoobu, a yɛ̃ ma Gusunɔwa u guru maakinu kua nu ka nùn sikerenɛ. Ma yam wɔ̃kura wãa nim wɔ̃kun sɔɔwɔ. 31Ka yebara u ra ka tɔmbu siri. Kpa u maa ka bu dĩanu wɛ̃ nu n kpã. 32U guru gbɛ̃ɛ nɛni win nɔmaɔ, ma u yi sɔ̃ɔsimɔ mi yi koo wɔri. 33Guru gbãsukunu nu sɔ̃ɔsimɔ ma u wãa. Mɛya yaa sabenu nu maa yɛ̃ ma u wãa turuku.

will be added

X\