1 Elihu u maa gerua u nɛɛ, 2 Yoobu, sanam mɛ a Gusunɔ sɔ̃ɔwa a nɛɛ, baa à n dɛɛre, a ǹ gãanu wasi, à kun maa durum kue mba yen arufaani, a tamaa yeni ya sãa dee dee? A tamaa a gem mɔ Gusunɔn wuswaaɔ? 4 Nɛna kon bɛɛ wisi wunɛ ka wunɛn bɔrɔ be. 5 A wɔllu mɛɛrio, kpa a guru winu laakari ko nge mɛ nu toma. 6 À n durum kua, taarɛ yerà a Gusunɔ kua. À n maa wunɛn durum sosimɔ, mba ya nùn kuammɛ. 7 À n gea mɔ̀, arufaani yerà ya ka nùn naawammɛ. Mba u waamɔ wunɛn nɔman di. 8 A n yɛ̃ ma wunɛn berusewa wunɛn nuku kɔ̃suru ta koo nɔni sɔ̃. À n maa gea mɔ̀, tɔnuwa u koo yen arufaani di. 9 Bà n tɔmbu dam dɔremɔ ba ra n weeweenu mɔ̀wa, kpa ba n somiru kasu. 10 Adama baa ben turo kun bikiamɔ u nɛɛ, mana Gusunɔ u wãa wi u nùn taka kua, wi, wi u ra de wɔnwɔndobu ba n nuku dobun womusu mɔ̀ wɔ̃kuru. 11 Wiya u ra maa tɔmbu bwisi kɛ̃ n kere yɛɛgii ka gunɔsugii. 12 Bà n somiru kana Gusunɔ u ku ra wure, yèn sɔ̃ ba tii sue ma ba sãa tɔn kɔ̃sobu. 13 Ba ko n kuuki mɔ̀, adama kam sɔɔra mi. Domi Yinni Gusunɔ Dam kpurogii u ǹ nɔɔmɔ u sere ben laakari ko. 14 Yoobu, baa mɛ a gerua a nɛɛ, a ǹ Gusunɔ waamɔ, a n yɛ̃ ma u wunɛn laakari mɔ̀. Ǹ n mɛn na, a tɛmanɔ a nùn swaa daki. 15 Yèn sɔ̃ Gusunɔ u ǹ tɔmbu sɛɛyasiamɔ tɛ̃, yen sɔ̃na a tamaa u ǹ durum garisi gãanu? 16 Ǹ n mɛn na, wunɛn gari yi a gerua kpuro yi sãawa nge wom dirum. Yi ǹ maa asansi mɔ.
