Yoobu 33

1Elihu u nɛɛ, tɛ̃, Yoobu a swaa dakio a nɛn gari kpuro nɔ. 2Wee kon nɔɔ wukia n gari gere. 3Geeya kon nun sɔ̃, n ǹ ka murafitiru. 4Gusunɔ Dam kpurogiin Hundewa u man taka kua. Ma u man wãaru wɛ̃. 5A sɔɔru koowo mɛ kaa ka tii yina, kpa a man wisi à n kaa kpĩ. 6Nɛ ka wunɛ sa sãawa tia Gusunɔn wuswaaɔ. Domi tema u ka bɛsɛ kpuro mɔma. 7Ǹ n mɛn na, a ku nɛn bɛrum ko, kpa a n tamaa na kĩ n nun nɛn yiiko sɔ̃ɔsiwa. 8Adama na yaaye ye a man sɔ̃ɔwa. A nɛɛ, 9a dɛɛrewa mam mam a ǹ durum mɔ. Taarɛ gaa maa sari wunɛ sɔɔ. 10Ma a nɛɛ, ka mɛ, Gusunɔ u wunɛn toranu waamɔ. Ma u nun garisi win yibɛrɛ. 11U ǹ derimɔ a da mi a kĩ. Ma u wunɛn kookoosu kpuro laakari sãa. 12Adama nɛ, na nun sɔ̃ɔmɔ ma a ǹ gem mɔ gari yi sɔɔ Yoobu. Domi Gusunɔ u tɔnu kere. 13Mban sɔ̃na a ka nùn taarɛ wɛ̃ɛmɔ a mɔ̀, u ku ra tɔnu wisi. 14Gusunɔ u ra ka tɔnu gari kowa ka swaa dabinu, adama tɔnu u ku ra ye laakari ko. 15Gasɔ u ra ka nùn gari ko dosu sɔɔ wɔ̃kuru, ǹ kun mɛ kãsiru sɔɔ sanam mɛ u kpĩ win kpin yerɔ u dò. 16Miya u ra nùn kure u ka nùn kirɔ ko. 17Kpa u nùn gbara kɔ̃san di. Kpa u maa nùn yara tii suabun di. 18Nge mɛya u ra ka nùn yare gɔɔn yiran di, kpa u kun maa gu. 19Gasɔ, u ra maa nùn sɛɛyasie ka wahala, u de bararu garu tu nùn kpĩ, win wasi yi n diirimɔ, 20kpa u kun maa dĩanun mɛm kĩ, baa ka ni u ra n kĩru bo. 21Kpa u woora, win kukunu nu tera. 22Kpa a deema u gɔɔ turuku kua. 23Gasɔ Gusunɔn gɔradoba nɔrɔbu (1.000) sɔɔ, turo u koo se u da u nùn somi, kpa u nùn swaa gea sɔ̃ɔsi ye n weenɛ u swĩi. 24Saa ye sɔɔ, u koo tɔnu win wɔnwɔndu wa kpa u nɛɛ, u nùn faaba koowo, kpa u ku raa gbi. Domi u swaa wa ye u koo ka nùn yakia. 25Kpa win wasi yi wurama yi ko nge sanam mɛ u sãa aluwaasi. 26Ù n Gusunɔ kana, u koo win kanaru mwa. Kpa u Gusunɔ sã ka nuku dobu, yèn sɔ̃ u nùn win wãaru wesia. 27Kpa u womu ko tɔmbun wuswaaɔ u nɛɛ, u durum kua, u gem yina. Adama Gusunɔ kun nùn yen sɛɛyasiabu kue. 28U win hunde wɔra, u ǹ due siki wɔruɔ. Ma u yam bururam waamɔ. 29Yeni kpuron diya Gusunɔ u ra ka tɔnu gari ko nɔn dabi dabinu, 30u ka nùn gɔɔ gbara, kpa u de u n wãa wãaru sɔɔ. 31Tɛ̃, a man swaa dakio, Yoobu. A den mario mɛ, kpa n maa gari gere. 32À n gari gɛɛ mɔ a ka man wisi, a man wisio. Domi nɛn kĩra n ka nun gem wɛ̃. 33À kun maa gɛɛ mɔ a gere, a man swaa dakio. A mario, kpa n nun bwisi kɛ̃.

will be added

X\