1 Elifasi, ka Sofaa, ka Bilida ba ǹ maa Yoobu gɛɛ wisa yèn sɔ̃ u tii garisi taarɛ sarirugii. 2 Adama durɔ goo wãa Ramun bweseru sɔɔ wi ba mɔ̀ Elihu. Win tundowa Barakɛli, Busin yɛnugii. Wiya u mɔru bara yèn sɔ̃ Yoobu u tii garisi taarɛ sarirugii Gusunɔn wuswaaɔ. 3 U maa ka Yoobun bɔrɔba ita be, mɔru kua yèn sɔ̃ ba kpana bu Yoobu wisi dee dee, ma ba sere nùn taarɛ wɛ̃ɛmɔ. 4 N deema Yoobun bɔrɔ be, ba Elihu bukuraru kere. Yen sɔ̃na u gina saka u ǹ ka Yoobu gari kue sanam mɛ bɔrɔ be, ba ka nùn gari mɔ̀. 5 Adama ye u deema ba ǹ maa wa ye ba koo Yoobu wisi, yera u mɔru kua. 6 Ma u gari sua u nɛɛ, nɛ bii aluwaasiwa. Bɛɛ maa i sãawa bukurobu. Yen sɔ̃na bɛrum man mwa n ka bɛɛ nɛn bwisikunu sɔ̃. 7 Ma na tii sɔ̃ɔwa na nɛɛ, durɔ tɔkɔna nu ko n gari gerubu yɛ̃. Niya n weenɛ nu tɔmbu bwisi kɛ̃. 8 Adama ka gem, na wa ma Gusunɔ Dam kpurogiin Hundewa u ra tɔnu bwisi wɛ̃. 9 N ǹ mɔ tɔnun wɔ̃ɔn kpãara ta ra nùn yɛ̃ru wɛ̃. N ǹ maa tɔkɔru ta ra nùn bwisi kɛ̃ u ka siri dee dee. 10 Yen sɔ̃na na nɛɛ, i man swaa dakio i nɔ, kpa n maa gere ye na bwisika. 11 Domi na maari sere i ka bɛɛn gari kua i kpa. Na maa yi swaa daki mam mam, na nua kpuro bwisi yi i ka Yoobu siri. 12 Na bɛɛ swaa daki ka laakari, adama na wa bɛɛn goon gari kun Yoobu kamiɛ. Goo kun maa kpĩa u nùn wisa dee dee. 13 Yen sɔ̃, i ku gere i nɛɛ, i win garin wɛ̃ɛ nɔɔ wa. Gusunɔ turowa koo kpĩ u nùn siri, n ǹ mɔ tɔnu. 14 N ǹ nɛ Yoobu u ka gari kua. Ǹ n daa nɛn na, ye kon nùn wisi nɛnɛma. 15 Yoobu, wee ba nɔɔ mari tɛ̃, ba bia ye ba koo wisi ma ba wãa sekuru sɔɔ. 16 Na saka sere ba ka gari yi kua ba kpa, ma ba mari, ba ǹ wa ye ba koo wisi. 17 Tɛ̃, kon gari sua, kpa n gere ye nɛ na maa bwisika. 18 Domi gari wãa nɛn gɔ̃ruɔ yi kpã, na maa sɛnde n ka yi gere. 19 Wee yi gbisimɔ nɛn nukurɔ nge tam mɛ ba doke gɔnan bɔɔ kpaaru sɔɔ ma ta kĩ tu kura. 20 Tɛ̃, i de n maa gari gere kpa nɛn bwɛ̃ra yu kpuna. Kon nɔɔ wukia, kpa n baawure wisi. 21 Na ǹ goon biru yɔ̃ramɔ. Na ǹ maa goo fufu mɔ̀. 22 Domi na ǹ yeniban dɔɔnɛ mɔ. Nà n daa yen dɔɔnɛ mɔn na, nɛn taka kowo u n man kpeerasie n tɛ.
