1 Tɛ̃ wee bibu ba man yɛ̃ɛmɔ, ba ǹ mam nɛn tɔkɔru gara, be, bèn baababa ba ǹ tura bu nɛn bɔ̃nu somi bu ka nɛn yãa gɔ̃ɔ kpara. 2 Mba ba koo raa kpĩ bu man kua, be, be ba sãare ba gɔɔ dɔɔ. 3 Wee ba sãaru ka gɔ̃ɔru soore. Ba da gbaburɔ bu ka dĩanu kasu bu di. Adama gãanu sari mi. 4 Ba ra dewa dãa kikun bɔkuɔ bu yakɔ bura ge ga bɔru mɔ ga n sãa ben dĩanu, kpa ba n kiku gagun gbini dimɔ. 5 Ba ra bu girewa tɔmbun suunu sɔɔn di, ba n bu naa swĩi nge gbɛnɔbu. 6 Kpa bu da ba n wãa kpee wɔrusɔ ka wɔwi sɔɔ, 7 ba n wãa ba n taasinɛ sãkin suunu sɔɔ, kpa ba n kuuki mɔ̀ kikisɔ, 8 ba n sãare nge wiirobu, ǹ kun mɛ nge be ba gɛma ba gira wuun di. 9 Tɛ̃ wee, ben biba ba man yɛ̃ɛmɔ, ba man womusu dokemɔ. 10 Ba ra man biru kisi yèn sɔ̃ ba ǹ kĩ bu man wa. Kpa bu man yãatam sie. 11 Domi Gusunɔ u man funɛ wuna, u sekuru doke. Yen sɔ̃na ben goo kun nɛn bɛɛrɛ yɛ̃ baa fiiko. 12 Tɔn kɔ̃so be, ba man seesimɔ. Ba kasu bu man tɛ̃ka di bu sura. Ba swaa kasuwa bu ka man kam koosia. 13 Ba nɛn swɛɛ bɔɔra. Ba kookari mɔ̀ bu ka man kam koosia, be, be goo kun somiru wee. 14 Be wee ba yaba mi na kukua. Ma ba dumɔ min di ba man wɔrimɔ. 15 Ma bɛrum man mwa, nɛn bɛɛrɛ ya doona nge woo. Nɛn bɔri yɛnda doona nge guru wiru. 16 Tɛ̃, na wãawa gɔɔ sɔɔ. Na wahala wɔri na kpa. 17 Nɛn kukunu kpuro ra n tennamɔwa wɔ̃kuru. Na ku ra wɛ̃re wahala yen sɔ̃. 18 Ya man sɛ̃ke baama ka dam nge yaberun wĩiru. 19 Wee Gusunɔ u man kpɛ̃ɛ pɔtɔkɔ sɔɔ. Torom ka tua na ka weenɛ. 20 Gusunɔ nɛn Yinni, na nun somiru kanamɔ, adama a ǹ man wisa. Na seewa na yɔ̃ra wunɛn wuswaaɔ adama a ǹ nɛn laakari kue. 21 A sɛ̃siawa, ma a man sɛ̃re ka wunɛn dam bakam. 22 Wee a dera woo guna ya man sua ya toorimɔ. 23 Domi na yɛ̃ ma a ka man dɔɔwa gɔribun wãa yerɔ mi tɔmbu kpuro ba koo da. 24 Adama ka mɛ, baa tɔnu ù n gɔɔ dɔɔ, u ǹ nɔma suamɔ u faaba kana? Wi u wãa wahala sɔɔ u ǹ somiru kanamɔ? 25 Na ǹ bu swĩiyɛ be wãara sɛ̃sie? Na ǹ nuki sankire sãarobun sɔ̃? 26 Wee nuku doba na ra n yĩiyɔ, adama nɔni swãara na waamɔ. Yam bururama na ra n yĩiyɔ, adama yam wɔ̃kura na waamɔ. 27 Nɛn bwɛ̃ra ku ra kpunɛ yèn sɔ̃ na ka wahala gabirinamɔ. 28 Na ra n sĩimɔwa nuku sankiraru sɔɔ. N sãare sɔ̃ɔ ku ra yari nɛn mi. Baa nà n wãa tɔn wɔru sɔɔ, na ra n somiru kanamɔwa. 29 Nɛn gɔɔ wuri yin sɔ̃, na kua nge gbeeku bɔ̃ɔ, ǹ kun mɛ nge taataaru. 30 Nɛn gɔna tĩra, nɛn wasi gberamɔ. 31 Tɛ̃ nɛn mɔrɔku ga wãawa n ka gɔɔ wuri ko. Kpa n nɛn guuru so ka be ba gɔɔ wuri mɔ̀ sannu.
