Yoobu 3

1Yeniban biru, Yoobu u den nɔɔ wukia ma u gari gerua u tɔ̃ɔ te ba nùn mara bɔ̃rusi. 2U nɛɛ, 3bɔ̃rurara tɔ̃ɔ tè sɔɔ ba man mara. Bɔ̃rurara wɔ̃ku tè sɔɔ ba nɛn gura sua. 4Yen tɔ̃ɔ te, tu ko yam wɔ̃kuru mam mam. Gusunɔ u ku maa ten gari ko wɔllu mi. U ku de yam bururam mu maa koora te sɔɔ. 5Gɔribun wãa yerun yam wɔ̃ku bakaru tu tu wukiri, kpa guru wiru ta n tu wukiri. Yen dɔma te, suru ka sɔ̃ɔ bu mwaana kpa bɛrum mu n wãa tem sɔɔ. 6Gusunɔ u de wɔ̃ku te, tu tĩra n banda. U ku maa tu garisi wɔ̃ɔn tɔ̃nu sɔɔ. U ku maa tu garisi surun sɔ̃ɔ sɔɔ. 7U de tɔ̃ɔ te, ta n sãa tɔ̃ɔ baruka sarirugiru, kpa goo u ku raa nuku dobu ko te sɔɔ. 8Sɔrobu bu tɔ̃ɔ te bɔ̃rusio. Be ba waa bakan dweebu yɛ̃ bu tu bɔ̃rusio. 9Kperi yi yi koo yari tɔ̃ɔ ten yoka yi ku balli. Tà n yam bururam yĩiyɔ, tu mu bia. Tu ku maa buruku sɔ̃ɔ wa. 10Domi ta ǹ nɛn mɛron nukuru yinasie. Ta derawa ba man mara n ka wahala yeni wa. 11Mban sɔ̃na na ǹ gu nɛn mɛron nukurɔ. Mban sɔ̃na na ǹ gu sanam mɛ ba man marumɔ. 12Mban sɔ̃na nɛn mɛro u man mara u taaru swĩi. Mban sɔ̃na u man nɔɔri u bom kã. 13Nà n daa gu dɔma te, na ko n daa kpĩwa, kpa na n dò na n wɛ̃re, 14nge sinambu ka ben bwisi kɛ̃ɔ be ba tii sina kpaanu bania tem mɛ sɔɔ ma nu kua bansu. 15Mɛya na ko n wɛ̃re nge sina bii be ba ben dia wura ka sii geesu yibia, ma ba gu. 16Ǹ kun mɛ, na n wɛ̃re nge bii wìn nukuru ba yara, ǹ kun mɛ, nge bii wi ba mara ma u yande gu u ǹ sɔ̃ɔ wa. 17Na ko n wãa gɔriɔ mi tɔn kɔ̃sobun tii ba wɛ̃re, ka sere mi be ba wasira ba ǹ maa dam mɔ ba wãa ba wɛ̃re. 18Miya pirisɔmba ba wɛ̃re, ba ǹ maa be ba bu dam dɔremɔn nɔɔ nɔɔmɔ. 19Damgibu ka bwɛ̃ɛbwɛ̃ɛbu ba wãa mi sannu. Yobu bà n da mi, ba ra yakiarewa saa ben yinnin min di. 20Mban sɔ̃na Yinni Gusunɔ u ra de tɔnu wi u wahala mɔ̀ u yam sãreru wa. Mban sɔ̃na u ra de wi u nuki sankire u n wãa. 21Domi tɔn ben bwesera ba gɔɔ kĩ, adama ba ǹ nùn wasi. Ba gɔɔ win binɛ mɔ n kere dukia. 22Ba ku ra n nuku dobu mɔ sere bà n ben siki wɔru wa. 23Adama na sãawa wi u kun yɛ̃ mi u dɔɔ, ma Yinni Gusunɔ u nɛn swaa kɛnusi u ka sikerena. 24Weeweenun saabu, na ku ra di. Nɛn wuri kun nɔru mɔ nge nim mɛ mu kokumɔ. 25Yèn bɛrum na mɔ̀, yera ya ra man deemɛ. Ye na maa nasie, yera ya ra man wɔri. 26Wee, na ǹ wãa sɛ̃ɛ, na ǹ maa wɛ̃re. Na ǹ bɔri yɛndu mɔ, ma na ra n burisinɛ.

will be added

X\