Yoobu 29

1Yoobu u maa win gari gerum wɔri u nɛɛ, 2na kĩ nɛn yellun wãaru tu wurama ta n sãa nge saa ye Gusunɔ u man kɔ̃su. 3Na kĩ na n wãa nge saa ye u fitila sɔ̃re nɛn wuswaaɔ, ma win yam bururam man yam bururasie wɔ̃kuru. 4Na kĩ na n sãawa nge saa yè sɔɔ na dam mɔ, ma Gusunɔ u man kɔ̃su ka kĩru. 5Saa ye sɔɔ, Gusunɔ Dam kpurogii u ka man wãa, ma nɛn biba ka man wãa. 6Mɛya nɛn yaa sabenu nu ra n bom yiba. Mɛya maa nɛn olifi ya ra man gum wɛ̃ mu n kokumɔ nge daa koka. 7Saa ye sɔɔ, nà n yara tɔɔwɔ na da na sina wuun gbãrarun kɔnnɔwɔ su ka siri, 8aluwaasiba bà n man wa, ba ra man bɛɛrɛ wɛ̃wa bu doona min di, kpa durɔ tɔkɔnu nu se nu yɔ̃ra. 9Tɔn bokobu bà n man wa ba ra ben gari gerubu yɔ̃rewa. 10Mɛya maa sinambu ba ra nɔɔ mari, kpa n sãare ben yara ben daro mani. 11Wi u nɛn gari nua u ra nɛɛwa, doo nɔɔrugiiwa na sãa. Wi u maa man wa seeda gea u ra man diiye. 12Domi na ra wɔnwɔndo somi ù n somiru kana, kpa n gobeku wi ba yina bu somi dam kɛ̃. 13Be ba gɔɔ dɔɔ, ba ra man domaru kuewa. Kpa n gɔminibu nukuru yɛmiasia n de ba n nuku dobu mɔ gɔ̃ruɔ. 14Gem kobu bu ra n man wãasiwa nge yabe te na sebua, ǹ kun mɛ nge dawani ye na bɔkua. 15Na ra n sãawa wɔ̃kobun nɔni, kpa na n sãa kɔ̃ri kpirirugibun kɔ̃ri. 16Na kua sãarobun tundo. Na ra sɔbu nɔɔri, n ben gari mɛɛri yi ba ka na. 17Adama na ra tɔn kɔ̃sobun nɔsu bɔɔku, n bu wɔrari ye ba mwa. 18Ma na tii sɔ̃ɔwa na nɛɛ, kon gbiwa tɔkɔru sɔɔ, nɛn kpin yeru wɔllɔ. Nɛn wãarun tɔ̃nu nu ko n dabiwa nge yani sɛɛri. 19Ko na n sãawa nge dãa tèn gbini yi wãa nim bɔkuɔ. Kpa kakoru ta n wãa nɛn kãasin wɔllɔ. 20Saa ye sɔɔ, nɛn yiiko ya koo wurama, kpa na n dam mɔ nge tɛn te ba gawe. 21Yellu, tɔmbu ba ra yɔ̃rewa bu nɛn gari swaa daki. Ba ra nɔɔ mariwa bu nɛn bwisi nɔ. 22Nà n gari gerua na kpa, goo ku ra maa gãanu wisi. Nɛn gari yi, yi ra bu duuriwa kpurɛ kpurɛ nge nim mɛ mu dãakumɔ. 23Be kpuro ba ra n man marawa nge tom buruku gura. 24Kpa n yɛ̃ɛ musɛɛ n ka bu dam kɛ̃ sanam mɛ ba dam bie. Ba ǹ kpɛ̃ bu man nuki sanku n wuswaa burisina. 25Nɛna na ra n bu swaa gbiiye, kpa na n wãa ben suunu sɔɔ nge sina boko wi u ra win tɔmbu nukuru yɛmiasie.

will be added

X\