1 Yoobu u nɛɛ, tɔmba yɛ̃ mìn di sii geesu ka wura ya ra yari bu sere ye tea. 2 Tem diya ba ra maa sisu wunɛ, kpa bu sii gandu sɔwa kperun di. 3 Be ba sisu sɔwamɔ, sere tem sɔɔwɔwa ba ra ka fitila du kpa ba n duɔ sere mi su wãa yam wɔ̃kuru sɔɔ, 4 kpa bu wɔru gbe sere tem sɔɔwɔ, bu swaa wĩa mi, mi goo sari. Ba ǹ kpɛ̃ bu sĩ mi. Wɛ̃ɛya ba ra n gasirimɔ bu ka du mi. 5 Tem wɔllɔwa dĩanu ra kpi. Adama mɛn sɔɔwɔ, n sãawa nge gãanu kpuro dɔ̃ɔ mwaare. 6 Tem sɔɔ miya kpee gobiginu ra n wãa. Mi sɔɔra ba ra maa wura wa. 7 Kasa ya ǹ swaa ye yɛ̃. Mɛya maa yabereku ga ǹ ye waare. 8 Gbee sunɔ ka yɛɛ yi yi tii naanɛ sãa yi ǹ ye mwaare. 9 Adama tɔnu u kãka u kperu wɔri u kɔsuka, sere u guunun kpɛɛkpɛɛku girari. 10 Kpee ten nɔɔwɔra u ra swɛɛ wunɛ, kpa u gãa gee ni wa, ni nu wãa mi. 11 Ù n nim kamɛ sɔɔ mi, u ra mu swaa ganɛwa, kpa u ka dukia yarima ye ya berua sɔɔ mi. 12 Adama mana tɔnu u koo kpĩ u bwisi wa. Mana yi sika. 13 Tɔnu kun yin gobin geeru yɛ̃. Domi yi ǹ wãa handunia yeni sɔɔ. 14 Yi ǹ wãa daarɔ. Yi ǹ maa wãa nim wɔ̃ku sɔɔ. 15 Ba ǹ kpɛ̃ bu ka yi wura kɔsina. Ba ǹ maa kpɛ̃ bu yi dwe ka sii geesu. 16 Ba ǹ kpɛ̃ bu yi weesina ka wura ye ya wee Ofirin di, ǹ kun mɛ ka kpee gobigii ni nu nɔni boogu ka bɛrɔ wuru mɔ. 17 Ba ǹ kpɛ̃ bu yi weesina ka digi, ǹ kun mɛ ka nɔra ye ba kua ka wura, 18 kaa sere gere kpee gobigii ni ba sokumɔ korai ka kirisitali? Bwisi yi kpee gobiginu bɛɛrɛ kere. 19 Ba ǹ kpɛ̃ bu ka yi Etiopin kpee gobigii ni nu nɔni dɔm buuru mɔ weesina. Ba ǹ maa kpɛ̃ bu yi weesina ka wura gea. 20 Ǹ n mɛn na, man diya bwisi yi wee. Mana yin nuura wãa. 21 Tɔnu kun kpɛ̃ u yi wa ka nɔni. Gunɔ ge ga yɔ̃ɔwa ga ǹ kpɛ̃ gu yi wa. 22 Gɔɔ ka gɔribun wãa yera koo nɛɛwa, yin gariya ba nɔɔre tɔna. 23 Gusunɔ turowa u bwisin swaa yɛ̃. Wiya u maa yin wãa yeru yɛ̃. 24 Domi wiya u handunian goonu nnɛ kpuro waamɔ. U maa kpuro waamɔ ye ya wãa tem sɔɔ. 25 Sanam mɛ u wom bunum mɛɛra ma u nim kpãaru mɛɛra, 26 ka sere swɛɛ yi gura koo swĩi yu ka nɛ, ka maa swɛɛ yi guru maakinu ka guru gbãsukubu koo swĩi, 27 yera u bwisi yi wa. Ma u yin asansi wɛ̃ɛra u yi. 28 Saa yera u tɔmbu sɔ̃ɔwa u nɛɛ, bu nùn nasio, yera ya sãa bwisi. Wi u maa kɔ̃sa gɛɛrari, wiya u bwisi mɔ.
