Yoobu 27

1Yoobu u kpam win gari gerubu torua u nɛɛ, 2na bɔ̃rumɔ na mɔ̀, sere ka Yinni Dam kpurogiin wãaru, wi, wi u yina u man nɛn gem wɛ̃, ma u man nuku sankiranu sosiammɛ, 3ù n gesi dera na wãa na wɛ̃siamɔ, 4na ǹ weesu mɔ̀. 5Gusunɔ u man bere n ka bɛɛ gem wɛ̃. Sere ka nɛn gɔɔn tɔ̃rɔ, ko na n mɔ̀wa na dɛɛre. 6Na yɔ̃rariwa ma nɛn daa ya wã. Nɛn gɔ̃ru ga ǹ man taarɛ wɛ̃ɛre nɛn wãarun tɔ̃ru garu sɔɔ. 7Gusunɔ u de tɔn kɔ̃son kɔkɔrɔ yu nɛn yibɛrɛba deema, be, be ba man seesimɔ mi. 8Sanam mɛ Gusunɔ u tɔn kɔ̃son wãaru wuna, yĩiyɔ birà bu maa nùn tie. 9Gusunɔ u koo nùn swaa daki sanam mɛ nɔni swãara nùn deema? 10I tamaa u ko n win nuku dobu kasu Gusunɔ Dam kpurogiin mi? I tamaa u koo Gusunɔ kana saa kpuro? 11Kon bɛɛ Gusunɔn dam gari sɔ̃wa. Na ǹ bɛɛ win himba beruammɛ. 12Bɛɛ kpuro i wa nge mɛ u sãa. Mban sɔ̃na i gari gerumɔ yi yi ǹ asansi mɔ. 13Wee ye Gusunɔ Dam kpurogii u tɔn kɔ̃so yiiye. 14Bà n bibu mara ba dabi, ba koo gbiwa tabu sɔɔ. Ben bibu ba ǹ dĩanu wasi bu di ba n ka wãa. 15Barara ta koo ben bwese te ta tie sua. Ben gɔminibu ba ǹ kpɛ̃ bu bu swĩiya. 16Baa bà n gobi waamɔ nge tua, ma ba yãnu guramɔ nge yanim, 17gemgiiwa u koo yãa ni dendi, kpa u gobi yi di. 18Tɔn kɔ̃so ù n diru bana ta ko n sãawa nge narin wɛ̃ɛ, ǹ kun mɛ nge kuu te kɔ̃so u kua. 19U koo gbiwa ka gobigiru. Adama ba ǹ nùn sikumɔ ka gobi yi. U ǹ yi wasi gɔriɔ. 20Nandaba bu koo nùn deema subaru sɔɔ nge nim mɛ mu daru bɔ̃ɔ saramɔ. Woo guna ya koo ka nùn doona wɔ̃kuru. 21Sɔ̃ɔ yari yerun woowa ga ra nùn wuke saa win wãa yerun di gu ka da sere mi n toma. 22Gusunɔ u ko n nùn tweemɔwa ka wɔnwɔndu sariru. Kpa u duka yakura u wa u ka sɛ̃ɛ ni suuri. 23Tɔmbu bà n wa mɛsum kpa bu nùn yɛ̃ɛ ba n taki mɔ̀, kpa bu nùn wia koosi saa ye u doonɔ.

will be added

X\